U merrte para bizneseve për mos t'i gjobitur, SPAK dërgon për gjykim ish-inspektorin e ISHSH, Marvin Mersini

Prokuroria e Posaçme Kundër Korrupsionit dhe Krimit të Organizuar në bashkëpunim me Drejtorinë e Përgjithshme të Policisë së Shtetit si dhe Hetuesit e Byrosë Kombëtare të Hetimit përfundojnë hetimet dhe dërgojnë për gjykim pranë Gjykatës së Posaçme të Shkallës së Parë për Korrupsionin dhe Krimin e Organizuar dosjen  në ngarkim të ish Inspektorit pranë Inspektoriatit Shtetëror Shëndetësor, Marvin Mersini. 

Ai akuzohet për "Korrupsion pasiv i personave që ushtrojnë funksione publike”, parashikuar nga neni 259, paragrafi i dytë i Kodit Penal

Sipas dosjes së SPAK Mersini shkonte në biznese dhe i kërcënonte se do i gjobiste nëse nuk i jepnin gjysmën e gjobës. Hera e fundit ishte më 24 maj 2023 kur Mersini ka vajtur për kontrolle në një biznes, edhe pse nuk ishte i planifikuar të shkonte, dhe ka bërë presion, duke pretenduar se biznesi nuk kishte licencimin e duhur për vijimin e aktivitetit. Mersini i thotë përfaqësuesit të biznesit se gjoba në këto raste shkonte deri në 1.000.000 lekë të reja, si dhe me mbylljen e biznesit.

Në këmbim të mos vendosjes së gjobës Mersini ka kërkuar gjysmën e shumës, pra 500.000 lekë të reja , por me kusht që një pjesë e kësaj shume monetare duhej të paguhej brenda 24 orëve.

"Nga hetimet e kryera ka rezultuar e provuar se, më datë 24.05.2023, Prokuroria e Posaçme është informuar nga hetuesit e Byrosë Kombëtare të Hetimit, që i pandehuri Marvin Mersini duke qenë me detyrën e Inspektorit pranë Inspektoriatit Shtetëror Shëndetësor, duke mos qenë i planizuar që të vente për kontroll tek subjekte të ndryshëm tregtarë, ka vajtur dhe ka ushtruar presion pranë një subjekti tregëtar në qytetin e Tiranës, duke pretenduar se nuk kishte liçensimin e duhur për vijimin e aktivitetit, dhe se gjoba në këto raste shkonte deri në 1.000.000 (një milion) lekë, si dhe me mbylljen e biznesit deri në likuidimin e kësaj mase administrative.

Më tej, i pandehuri i ka thënë administratorit të subjektit tregtar se “një problem i tillë” mund të zgjidhej kundrejt përfitimit të parregullt, vetëm pas marrjes prej tij të gjysmës së shumës së gjobës që vihet në raste të tilla, e më konkretisht të shumës prej 500.000 (pesëqind mijë) lekë, por me kusht që një pjesë e kësaj shume monetare duhej të paguhej brenda 24 orëve, ose në të kundërt do vijohej me procedurat administrative të aplikimit të gjobës dhe mbylljes së aktivitetit deri në likujdimin e masës administrative" informoi sot SPAK.

Arrestimi i ish inspektorit pranë Inspektoriatit Shtetëror Shëndetësor, Marvin Mersini u krye më 25 maj 2023 dhe në mjetin me të cilin po udhëtonte, ju sekuestrua dhe shuma monetare prej 200.000 (dyqind mijë) lekësh, e përftuar prej tij në mënyrë të paligjshme.

S.G/Shqiptarja.com

TAG:
• Marvin Mersini
• spak
• Tirane