Kryebashkiakja e Shkodrës, Voltana Ademi, ka reaguar pas lajmit se është ndaluar ditën e sotme nga policia, me pretendimin se kishte thyer rregullat e qarkullimit rrugor. Përmes një statusi në ‘Facebook’, Ademi sqaron situatën, teksa sulmon policinë, duke i cilësuar aksionet e tyre si alla-komuniste, që iu fusin frikën qytetarëve.

Kryebashkiakja e djathtë deklaron se nuk është ndaluar nga policia, por ka preferuar të flasë vetë drejtpërdrejt me policët, pas situatës që ka parë në rrugët e qytetit, të cilat sipas saj, ishin mbushur me policë.

Sërish propaganda prodhon fake neës. Paraditen e kësaj të shtune ndërsa isha nisur për në zyrën time në Bashkinë e Shkodrës, në krye të detyrës për tu shërbyer qytetarëve, u përballa me një situatë të paprecendent në qytetin e Shkodrës.

Një qytet tërësisht i bllokuar nga policia në akset ku mund të lëvizin automjetet. Qytet i mbushur me patrulla policie, që më shumë ua veshtirësojnë lëvizjen qytetarëve se sa i orientojnë apo u shërbejnë atyre. Në këtë aksion alla-komunist, ku u futet frika qytetarëve, u përballa vetë me policinë rrugore. NUK JAM NDALUAR nga Policia Rrugore, sepse makina ime ishte në oborrin e Bashkisë së Shkodrës, por kam preferuar të komunikoj vetë me ta drejtpërdrejt pas situatës që pashë në rrugët e qytetit tim.

Nuk mund të pranoj që të paralizohet tërësisht qarkullimi dhe jeta e qytetareve nga pseudo post-blloqe të policisë. Një polici selektive ndaj qytetarëve që nuk sheh parkimet dyshe në çdo rrugë apo në rrugët që janë destinuara për biçikleta. Një polici e verbër përballë automjeteve që për vite me radhë kanë bllokuar qarkullimin duke u lënë aty për shitje.

Pra nuk është ndaluar kryetarja e bashkisë, sepse unë isha në oborrin e Bashkisë së Shkodrës, por situata e rrugëve në qytet është e papranueshme e kjo është krijuar nga policia rrugore. Nisur nga kjo komunikova vetë drejtpërdrejt jo vetëm me efektivët rrugore por edhe me drejtuesit e tyre që më siguruan që do të marrin masa. E këtu është një pikë ku unë bie dakort: të merren masa për tu shërbyer qytetarëve e jo për të "shitur" fake neës. (Më poshtë po iu ilustroj përmes fotove situatën në rrugët e qytetit të Shkodrës).

voltana
(Postimi i Voltana Ademi)

d.c./shqiptarja.com