Vdekja e 18-vjeçarit dhe 32-vjeçares që ishte bërë nënë pak ditë më parë nga COVID, Rakacolli:  Më mori mjekja duke qarë në telefon (VIDEO)

Zëvendës ministrja e Shëndetësisë, Mira Rakacolli ka folur për dy rastet e rënda që tronditën vendin ditën e sotme, ku COVID i mori jetën një 18-vjeçari dhe një 32-vjeçare që kishte lindur vetëm pak ditë më parë. Rakacolli tha se të dyja humbjet ishin të rënda dhe për mjekët, ku një nga doktoreshat e kishte marrë duke qarë në telefon.

"Mjekët bënë të pamundurën, por situata ishte e rëndë nuk ia dolën dot as mjekët dhe as vetë djali 18-vjeçar. Kjo na bën që t’i këshillojmë të rinjtë. Shohim një mentalitet tek ata që mendojnë se edhe nëse na zë e kalojmë lehtë. Duhet ta marrin më seriozisht dhe të mbrohen. Edhe nëna 32-vjeçare nuk ia arriti dot dhe pse u përpoqën shumë mjekët. Duhet të bëhej një ndërhyrje, u shpëtua fëmija që edhe sot është mirë, 4-5 ditë ajo ishte mirë dhe u mendua që do kalonte, por ky është COVID, një sëmundje e rëndë që të kap në pabesi", tha Rakacolli.

Ditën e sotme një 18-vjeçar dhe një 32-vjeçare humbën jetën si pasojë e COVID. I riu prej më se një jave ishte i shtruar te ‘Shefqet Ndroqi’. Ai kishte pasur komplikacione dhe vuante nga obeziteti, për pasojë ndërroi jetë.  Edhe 32-vjeçarja nga Elbasani ka ndërruar jetë nga COVID, pak ditë pasi solli në jetë fëmijën e saj. Burime për Report Tv bëjnë me dije se mjekët ia kanë dalë që të sjellin në jetë shëndoshë e mirë fëmijën me ndërhyrje çezariane në muajin e shtatë disa ditë më parë po në spitalin "Shefqet Ndroqi", ku ajo ishte e shtruar.

Lajmi kryesor:

Rritja e rasteve me COVID, Rakacolli në Report Tv: Kemi ngarkesë të 'tonazhit të lartë' në spitale, s'jemi ende në imunitetin e tufës (VIDEO)

/b.ha./Shqiptarja.com

TAG:
• mira rakacolli
• Koronavirus