2 viktima nga COVID-i në 24 orë dhe 53 raste të reja! 68-vjeçari doli nga spitali se u përmirësua, vdes rrugës! Infektohet muzikanti në Përmet, mbyllet konsultorja në Pogradec!

Postimi i Edmond Spahos

Një i afërm i nënkryetarit të Partisë Demokratike, Edmond Spaho ka humbur jetën pasi ishte i infektuar me koronavirus.

Lajmin e ka bërë të ditur vetë Spaho me anë të një postimi në Facebook.

"Homazh per shokun, vellain, mikun dhe djalin e tezes ing. Luan Qemo të cilit Covid 19 sapo i mori jetën. Kemi ecur sebashku që fëmijë fare të vegjël e deri me sot. Do më mungosh shumë...", shkruan Spaho në Facebook.

Deri tani sipas raportimeve të ministrisë së Shëndetësisë kanë humbur jetën 43 persona. Ndërs pasditen e kësaj të shtune ndërroi një 68-vjeçar, i cili sapo kishte dalë nga Spitali Infektiv. Sipas ministrisë pacienti ishte negativizuar dhe vdiq nga sindromi hepato-renal.

Për rastin e pacientit, i cili vdiq rrugës për në Gjirokastër ka reaguar edhe ministria e Shëndetësisë.  Sipas ministrisë, pacienti ishte negativizuar me COVID dhe ka humbur jetën nga sindromi hepato-renal.

Sqarimi i ministrisë së Shëndetësisë
Lidhur me lajmin e publikuar në media të një pacienti që ka ndërruar jetë gjatë transportimit drejt Gjirokastrës, Ministria e Shëndetësisë sqaron si vijon: Një pacient 68 vjeçar nga Gjirokastra, i cili vuante nga ciroza hepatike në stad terminal, ka ndërruar jetë teksa po transportohej nga spitali infektiv, drejt Gjirokastrës, pasi ishte negativizuar nga COVID19, me dy tamponë negativë.  Gjatë transportit, ka pësuar humbje jete të papritur si pasojë e sindromit hepato-renal, i komplikuar me arrest kardiak. Ministria e Shëndetësisë i shpreh ngushëllime familjes së të ndjerit.

Ka shkuar në 44 numri i viktimave nga koronavirusi në vendin tonë. Burime për Report Tv bëjnë të ditur se një 68-vjeçar nga Gjirokastra, i cili po trajtohej tek spitali infektiv ka humbur jetën. Po sipas burimeve bëhet e ditur se pacienti dukej në gjendje të stabilizuar dhe është nxjerrë nga spitali, por teksa po transportohej për në Gjirokastër ka ndërruar jetë.  Mësohet po ashtu se 68-vjeçari vuante nga sëmundje të tjera bashkëshoqëruese.

Pas tre rasteve pozitive që u shënuan sot, duke e futur qytetin në hartën e të prekurve, në Pogradec është mbyllur konsultorja e fëmijëve. Burime bëjnë me dije se një mjek dhe dy infermiere të kësaj qendre rezultojnë të infektuar ndërsa përgjigjet për pjesën tjetër të personelit kanë rezultuar negative

Sipas burimeve 11 punonjës të konsultores së fëmijëve në Pogradec janë karantinuar. Ndërkohë që njësia vendore e kujdesit shëndetësor ditën e sotme ka marrë tamponë të tjerë të personave të kontaktit si familjarë por dhe nënave dhe fëmijëve që janë vizituar pranë kësaj qendre shëndetësore ditëve të fundit.

Ambientet e qendrës ditën e sotme janë dezinfektuar. Zyrtarisht nuk bëhet me dije se si janë infektuar tre punonjësit, por nuk përjashton mundësinë që të jenë transmetuar nga nëna të cilat kanë shkuar për të kërkuar shërbim mjekësor për fëmijet e tyre në këtë konsultore.

Sot u regjistruan 6 raste të reja me COVID në Shkodër. Njëra është punonjëse e gjykatës së rrethit gjyqësor Shkodër, tjetri është një pacient i cili ka qenë i shtruar në spitalin rajonal. Ndërsa pjesa tjetër janë kontakte të personave të cilët kanë rezultuar pozitivë ditë më parë.

Në Durrës në 24 orët e fundit është shënuar vetëm një rast pozitiv. Bëhet fjalë për një person, i cili pas simptomave shkoi për t'u vizituar në spital, ku i bënë tamponin dhe rezultoi pozitiv, asimptomatik.