Veliaj: 2 fusha të reja sportive
në shkollën “Vasil Shanto”

Krahas rikonstruksionit të mjediseve mësimore në shkollat e kryeqytetit, Bashkia e Tiranës po i kushton një vëmendje të veçantë edhe shtimit të hapësirave sportive, për të nxitur të rinjtë që të merren me aktivitete.

Rreth 1300 nxënës të shkollës 9-vjeçare “Vasil Shanto” kanë terrene të reja sportive, të cilat pas mësimit mund të përdoren edhe nga komuniteti i zonës.
 
Kryetari i Bashkisë së Tiranës, Erion Veliaj, përuroi fushat e reja të futbollit dhe të tenisit për nxënësit e shkollës dhe falenderoi ata që kontribuuan për shtimin e ambienteve sportive në kryeqytet.
 
Kreu i bashkisë theksoi se ndërtimi i këtyre ambienteve i shtohen këndeve të tjera sportive që ka ndërtuar Bashkia e Tiranës.
 
“Ky është këndi i 12 sportiv që hapet brenda një viti në shkollat e Tiranës apo në hapësirat rekreative të qytetit. Do të kalojmë më shumë kohë me sport dhe aktivitete fizik, më pak kohë nëpër kafe, nëpër bingo e baste. Megjithatë, dua që t’i ftoj të gjithë qytetarët, që kush ka mundësi të kontribuojë”, tha ai.
 
Duke e cilësuar marsin që një muaj shumë pozitiv për realizimin e punëve publike, Veliaj theksoi se është e rëndësishme që t’i kushtohet më shumë vëmendje përmirësimit të mjediseve në shërbim të komunitetit.
 
“Këtë muaj kemi mbjellë me mijëra pemë, duke filluar nga Liqeni i Farkës, te Liqeni Artificial, te Bulevardi i Ri, te sheshi “Skënderbej”. Nëse kalojmë më shumë kohë me gjëra konkrete për fëmijët, siç janë këndet e lodrave, këndet sportive apo mbjelljet e gjelbërimet, dhe më pak kohë me fjalë, me sherre e përçarje, qyteti ecën përpara. Jam i bindur se të gjitha investimet në infrastrukturë nuk vlejnë asgjë në qoftë se nuk kemi kulturë dhe besoj se ky investim është më i rëndësishëm, ndoshta edhe se infrastruktura, sepse krijon një kulturë te djemtë dhe vajzat e qytetit si të luajnë në ekip, si të mësojnë të fitojnë, por edhe të humbasin”, tha ai.
 
Veliaj premtoi se institucioni që ai drejton do të vijojë me investimet edhe te palestra e shkollës “Vasil Shanto”.

[gallery]21618[/gallery]

Redaksia Online
(B.K/Shqiptarja.com)