Qytetarë të thirrur nga aktivistë e ambjentalistë u mblodhën sërish sot në Tiranë në një protestë kundër investimit 4 miliardë eurosh që është parashikuar të kryhet në Zvërnec.

Për mbi dy orë protestuesit, të cilët e nisën tubimin nga sheshi Skendërbej, për t’u zhvendosur më pas drejt ministrisë së Brendshme dhe para Kryeministrisë kërkuan anulim të projektit dhe dorëheqjen e kryeministrit Rama, duke e akuzuar qeverinë se po u fal oligarkëve pronën e përbashkët, ndërsa investitorët se po zaptojnë tokën shtetërore.

Me pankarta në duar me mesazhe si  “Zëri ynë e ardhmja jonë’, “Shqipëria nuk është në shitje”, protestuesit bënin thirrje Rama në burg, Berisha në burg.

Kërkesës së tyre për anulim të projektit të Zvërnecit, kreu i qeverisë iu përgjigj fillimisht nga Berati gjatë fjalës së tij në 35 vjetorin e themelimit të PS-së. Kryeministri bëri thirrje që qytetarët të mos bien pre e manipulimeve duke saktësuar se projekti ende nuk ka përfunduar dhe se po punohet prej tre vitesh në emër të interesit të shqiptarëve.

Ndërkohë që në një reagim pasues në ‘X’, Rama u përgjigj se nuk ka një projekt të cilin duhet ta anulojë. Kryeministri sqaron se aktualisht projekti po punohet nga pesë studio ndër më prestigjozet në botë! Ndërsa premton se kur ai të jetë gati do ta prezantojë atë publikisht sikurse ka ndodhur edhe në projekte të tjera.

Dhe për të gjitha të pavërtetat, gënjeshtrat dhe manipulimet e bëra mbi këtë çështje, thotë kreu i qeverisë, e vërteta nuk do të vonojë.  

Revolta e qytetarëve erdhi pas pamjeve të paprecedenta nga Zvërneci, ku gjatë një proteste të shtunën e kaluar, një protestues u dhunua në mënyrë brutale nga disa roje të një kompanie sigurie private.