Tomorr Kulloli ishte 20 vjeç kur ja arrestuan të atin më 4 janar 1981. Në fshatin e tyre në Poroçan të Gramshit, prej vitesh jetonin me hijen e rrezikut. Burgu dhe persekutimi politik ishin bërë pjesë e jetës së tyre që pas vitit 1945. Por ai arrestim atë ditë janari ishte gjithsesi i beftë dhe në një moment të vështirë për ta. Në familje po përgatiteshin për të përcjellë ushtar Tomorrin, të cilit i kishte ardhur fletëthirrja për në datën 6 janar. Si do të shkonte ushtar duke lënë pas gjithë familjen, që do të mbetej tashmë pa mbrojtje e pa përkujdesje? Me arrestimin e të atit Hazizit 53 vjeç, në familje mbetej vetëm Tomorri i aftë për t’ju shërbyer të tjerëve. Por regjimi e kishte arrestuar qëllimisht Hazizin në atë moment të vështirë të jetës së tyre. Dhe Tomorri duhet ti bënte ballë jetës ushtarake, përgjegjësive familjare dhe ti dilte zot edhe të atit në burg për ti çuar ushqime e ndërresa çdo muaj! Rituali i vajtjes në burg te babai do të zgjaste përgjatë gjithë viteve të burgut të Hazizit, në Tiranë, Spaç apo Bulqizë dhe nga kjo eksperiencë ai ka shumë kujtime të trishta por edhe motivuese.... Diktatura i kishte shpallur armiq, dhe ata duhet ti bënin ballë me dinjitet dhe pa e ulur kokën!
