Në studion e “Rreze Dielli” flasim me Xhoi Jakaj, një nga mësueset më pasionante të Gjimnazeve të Tiranës. Edhe pse është shkëputur nga mësimdhënia ajo i kujton si vitet e saj më të bukura të karrierës. Edhe pse në një tjetër formë, Xhoi vijon edhe sot të punojë me fëmijët duke u fokusuar në evidentimin e talenteve të tyre.  Pikërisht dy vajzat Iris Hysendhima dhe Jusra Zykollari që i bashkohen bisedës janë mjaft të talentuara, por dhe nxënëse të shkëlqyera. Dy nxënëset e vogla flasin për raportin që kanë me mësueset e tyre. Pyetjes se si është modeli i një mësuesi të mirë në ditët e sotme, ato i përgjigjen: Mësuesi duhet të jetë mirëkuptues, të mos jetë shumë i rreptë, por të ketë autoritet dhe rregulla. Dy vajzat tregojnë edhe raste kur nuk kanë rënë dakord me mësuesit, për nota të caktuara apo kur kanë ndarë opinione të ndryshme.  Ndërsa Xhoi Jakaj kujton dy mësuesit e saj, të cilët në njëfarë mënyre i kanë shënjuar jetën, organizimin dhe bllokun e shënimeve duket se dhe sot e kësaj dite e ka të trashëguar pikërisht nga njëri prej mësuesve të saj. “Sfida e mësuesit sot është të edukojë dhe t’i japë dije edhe atyre nxënësve që janë më problematikë” shprehet Xhoi.