Çiftelia shqiptare në filarmoninë e Hamburgut! E ftuar në “Rreze Dielli” Hava Bekteshi, vajza nga Gostivari, e rritur në Gjermani, e para që ka futur çiftelinë në orkestrën e Hamburgut. Ajo njihet si e reja që po ndërkombëtarizon çiftelinë, duke e bërë shumë të pëlqyeshme për publikun gjerman dhe jo vetëm. Hava ka mbaruar fillimisht fakultetin e parë në ekonomi, ndërsa të dytin për pedagogji si mësuese e gjermanishtes. E rritur në një familje me tradita shqiptare, ajo vendosi të eksperimentonte pasionin e saj për çiftelinë, gjë që u pëlqye shumë nga publiku gjerman. Falë talentit, ra në sy dhe u pranua të ishte pjesë e Filarmonisë së Hamburgut, ku aktualisht luan me çifteli duke u kombinuar shumë mirë me instrumentet e tjerë.
