Gati 17 vite më parë Mirgen Shamblli nisi të koleksiononte lodrat e fëmijëve që dikur luanin brezat e para viteve '90. Fillimisht i ranë në duar disa kukulla plastike të prodhuara në Shqipëri e më pas kaq mjaftoi të niste dëshira për të shtuar koleksionin me pasionin e një fëmije. Vetëm pak ditë më parë, ai hapi një ekspozitë dedikuar qeramikës shqiptare. Objektet janë të shumta afërsisht 1200 të periudhave të ndryshme kohore. Ekspozita u hap tek "Trekënçi" si dhe në pazarin e Korçës tek "Qoshka e koleksionistëve" ku janë vendosur disa objekte. Mirgen Shamblli ka në qilarin e shtëpisë me qindra lodra të formave dhe përmasave të ndryshme të prodhuara që nga viti 1930 e deri në fund të viteve 90'. Me krenari thotë se ka pjesën më të madhe të lodrave të prodhuara nga fabrika e gomës në Durrës, e cila më vonë u njoh si "Plastika Durrës", e deri tek lodrat e importit që ishin prodhim kinez, rumun, çek apo bullgar. Mirgeni koleksionin e ka vazhduar dhe me qelqet, qeramikën dhe objektet e drurit apo bakrit të prodhuara në Shqipëri.
