“Lajmi që erdhi nga salla e ceremonive ishte një shaka e hidhur dhe e përsëritur. Nuk u dha çmim për letërsinë për fëmijë. U përpoqa të mësoj se çfarë kishte ndodhur dhe më thanë se ‘kështu u vendos’. Kërkova të mësoj më shumë, por nuk mora përgjigje. Më në fund nga burimi zyrtar mësova se nuk kishte ‘mjaftueshëm prurje cilësore’. Ka ardhur koha t’i jepet fund deklaratave pa argumente dhe me verdikte si nga frone zotash, sepse të gjithë, kush më shumë e kush më pak, janë pjesë e këtij realiteti në letërsinë shqipe për fëmijë. Mos i shkarkoni problemet tuaja mbi shkrimtarët! Ata nuk zgjidhin hallet që nuk u takojnë, ndërkohë që me librat e tyre mund të parandalojnë halle dhe probleme që bëhen jetike. Ata shkruajnë dhe do të vazhdojnë të shkruajnë edhe kur rreth tyre të ngrihet një atmosferë mohuese dhe negative që përsëritet kohë pas kohe. Ata do të shkruajnë edhe kur të mbetet lexuesi i fundit.” – Ky është një pasazh i marrë nga revolta e gazetares dhe shkrimtares Rovena Rrozhani pak ditë më parë. As këtë vit nuk u ndanë çmime për letërsinë e fëmijëve. Shkrimtarët ndjehen të shqetësuar për mungesën e një kritike të mirëfilltë të librave që ata shkruajnë, por jo vetëm kaq… Diskutojmë në studion e Rreze Dielli me dy shkrimtaret për fëmijë Rovena Rrozhani dhe Sonila Strakosha mbi problematikat e vërteta të letërsisë shqipe për fëmijë.