Sallatë me lakër të bardhë
Përbërësit:
- 1 copë lakër e bardhë
- 1 mollë jeshile
- 1 karrotë
- 2 lugë supe salcë kosi
- 1 lugë supe arra të shtypura
- 1 limon e gjysmë
- 1/2 portokall
- Vaj ulliri dhe kripë
Përgatitja:
Për përgatitjen e kësaj sallate duhet lakër me gjethe të holla. E grijmë lakrën shumë hollë me rende, po ashtu grijmë karrotën dhe mollën jeshile. Qërojmë e shtypim 5-6 kokrra arra. Grijmë me thikë, shumë imët, gjysmë kokrre limoni e gjysmë kokrre portokalli, me gjithë lëkurë. Fillojmë përzierjen. Hedhim në një tas të bollshëm lakrën e grirë, karrotën, portokallin, limonin, arrat, pak kripë të imët dhe I përziejmë me të dyja duart që të marinohen pak. Në një tas të vogël, hedhim 2 lugë salcë kosi, lëngun e 1 limoni dhe 4-5 lugë vaj ulliri dhe i përziejmë mirë me një lugë. Kontrollojmë shijen e kripës. Salcën e përgatitur ia hedhim përsipër lakrës dhe e përziejmë me kujdes që të depërtojë në të gjithë sallatën me lakër. E shërbejmë në një pjatancë ose nëpër pjata personale duke e zbukuruar me gjethe majdanozi.
