"Erotizmi në letërsinë shqipe", shoqëruar me një antologji, vjen për herë të parë si një studim i mirëfilltë i kësaj teme mbi autorët me të mëdhenj shqiptarë. Gazetarja Blerina Goce është e para autore shqiptare që i vë qëllim vetes të gjejë kufijtë midis lirikës së dashurisë dhe lirikës erotike, duke naviguar nëpër ngushticat terminologjike e kulturore. Pyetjet që u shtruan në studion e Rreze Dielli nga Androniki Kolka sollën qartazi idenë sesi autorë të ndryshëm flasin për temat erotike në periudha të ndryshme kohore. A ka dallim sesi autorët shqiptarë meshkuj dhe femra i qasen temave erotike? Si ndikon gjinia në këto shprehje letrare? Si reagojnë lexuesit në Shqipëri ndaj letërsisë që eksploron tema erotike? Çfarë roli ka luajtur censura në formësimin apo kufizimin e shprehjes së temave erotike në letërsinë shqipe gjatë epokës komuniste? Si krahasohet portretizimi i erotizmit në letërsinë shqipe me atë në peizazhin e gjerë letrar ballkanik? A besoni se autorët bashkëkohorë shqiptarë janë më të hapur për të eksploruar tema erotike, apo tabutë vazhdojnë ende…? Blerina Goce është gazetare kulture pranë Report Tv. Ajo është aktive në televizion, radio, si dhe në median e shkruar në Shqipëri dhe ka një eksperiencë 25 vjeçare në fushën e gazetarisë së kulturës. Blerina ka realizuar edhe disa dokumentarë sociale edhe artistikë të cilët janë vlerësuar me çmime. Ky është libri i dytë i saj.