Nisin punimet për 'Unazën e Re', hiqet simboli i 100 vjetorit të Pavarësisë

Simboli “Shqiponja”, e vendosur në sheshin e pagëzuar me të njëjtin emër në hyrje të kryeqytetit, është hequr këtë të shtunë për t’i hapur rrugë projektit për ndërtimin e “Unazës së Re”. Vepra e derdhur me çelik të rëndë u vendos në nëntor të 2012-s, me rastin e 100 vjetorit të Pavarësisë, nga kryetari i atëhershëm i Bashkisë së Tiranës, Lulzim Basha.

“Shqiponja” (6 metra e lartë dhe me bazament katër metra) është vepër e artistit Albi Cifligu, e cila është konkretizuar me kontributin financiar të familjes tetovare “Destani”.

Momente nga heqja e simbolit të "Shqiponjës"

Për ndërtimin e “Unazës së Re”, banorët të cilët preken nga projekti kanë dalë përgjatë shtatë ditëve në protestë. Atyre iu është bashkuar edhe kryetari i Partisë Demokratike, Lulzim Basha, i cili e ka konsideruar këtë nismë të qeverisë një projekt të pastrimit të parave të pisëta. Banorët madje firmosën këtë të premte një peticion ku kërkojnë dëmshpërblimim e plotë, ndërsa vendosën të përshkallëzojnë protestën e tyre duke bllokuar aksin rrugor nga Pallati me Shigjeta tek sheshi “Shqiponja”, dy herë në ditë.

/r.k./Shqiptarja.com

TAG:
• Ilir Meta
• lulzim basha
• unaza e re
• simboli i shqiponjes