Të punosh me vdekjen mbi kokë/Report Tv në ish-uzinat e Laçit, në 5 vite 6 viktima (VIDEO)

Një i ri nga Laçi ka rrëfyer ngjarjen e dhimbshme që ka përjetuar familja e tij nga ish-Uzina e Superfosfatit në Laç. Ai ka humbur babain dhe vëllain në rrënojat e ndërtesës së degraduar, duke nxjerrë hekur për ta tregtuar për skrap.

Bledar Gjoka thotë se familja e tij është e varfër dhe kushtet e vështira ekonomike i shtynin ata të gërmonin në godinat e lëna në harresë. Çdo ditë aty punojnë njerëz, duke vënë në rrezik jetën. 

Kam humbur vëllain dhe babain në këtë uzinë. Nxirrnin hekur për shkak të kushteve ekonomike. Babai ka humbur jetën në 2004, vëllai ka dy vite, në 2016. Këtu edhe pas 1 viti do ketë aksidente të tilla. Shoh plot çdo ditë, edhe në mes të të nxehtit të madh, duke punuar këtu. 

I riu që ka humbur babain dhe vëllain në rrënojat e ish-Uzinës

Report Tv ka siguruar fotot e dy të rinjve, që humbën tragjikisht jetën në ish-Uzinën e Superfosfatit në Laç, teksa po punonin për të siguruar bukën e gojës.

Në fotot më poshtë, janë 27-vjeçari Drilon Lamaj dhe 28-vjeçari Dashamir Hajna.

Dy të rinjtë humbën jetën brenda ambienteve të ish-Uzinës, kur po nxirrnin hekur për ta tregtuar për skrap, teksa një pjesë e godinës është shembur dhe i ka zënë poshtë.


(Dy viktimat Dashamir Hajna dhe Drilon Lamaj)

Kreu i Bashkisë së Kurbinit, Artur Bardhi, ka reaguar për Report Tv lidhur me ngjarjen tragjike të një dite më parë në ish-Uzinën e Superfosfatit në Laç, ku humbët jetën dy të rinj.

Kryebashkiaku Bardhi tha se godinat e ish-Uzinës nuk janë nën administrimin e bashkisë, ndërsa shtoi se qeveria duhet të vërë dorë. Sipas tij. Deri më tani në ish-Uzinat e Kurbinit kanë vdekur katër persona.

Godinat e ish-Uzinës nuk janë në administrimin tonë. Duhet të vihet dorë nga qeveria, pasi janë në rrezik. Kemi kërkuar fonde nga qeveria për roje, por nuk na janë dhënë. Në ish-Uzina kanë vdekur 4 persona.

Kryebashkiaku Artur Bardhi