Kronikë

Komiteti Teknik i ekspertëve për COVID-19 tha se ora policia pas 22:00 do të vijojë të jetë ende në fuqi, ndërsa theksoi shqetësimin se po rriten rastet pozitive te moshat e reja 25- 34 vjeç. Universitetet do të vijojnë mësimin online edhe për 2 javë, ndërsa pezullimet e fluturimeve me Britaninë do të vijojnë deri më 18 janar.

Kompania e vetme që ka mbetur në garë për të bërë të mundur identifikimin elektronik të votuesve në zgjedhjet e ardhshme është “Smartmatic”. Komisioni Qendror i Zgjedhjeve aktualisht është në fazën e shqyrtimit të dokumentacionit, vlerësimit të ofertës si dhe vlerësimit të pajisjes së paraqitur nga kompania për demonstrim.

Në datën 16 dhjetor Operacioni Forca e Ligjit ka dërguar formularët e fundit të deklarimit të pasurive. Përmes një Akti Normativ të miratuar në të njëjtën datë në Këshillin e Ministrave është vendosur që pasi OFL përfundoi në 31 dhjetor të shtyhet afati i shqyrtimit të kërkesave nga SPAK dhe GJKKO.

Ditën e djeshme janë aksidentuar dy shqiptarë në Itali. E gjithë ngjarja ka ndodhur në “sytë e publikut”, pasi dy të rinjtë ishin duke filmuar live për rrjetet e tyre sociale.

Si rezultat i një operacioni policor, në Spanjë janë arrestuar 6 persona të dyshuar, me origjinë shqiptare pasi kultivonin bimë narkotike.

Vëllezërit e 2 motrave Zhaneta Metani dhe Kristina Bardhi të vrara mëngjesin e 31 dhjetorit në zonën e Astirit në Tiranë nga i dashuri i tyre, Përparim Ademi, i kanë dërguar mesazhe kërcënuese djalit të këtij të fundit Kristo Telo, duke e kërcënuar me jetë.

Zbardhet dëshmia e dy vajzave 16-vjeçare nga Tirana, të cilat u gjetën dje në Përmet. Burime nga Policia pohuan se vajzat kanë thënë se janë larguar nga shtëpia me dëshirë pasi familjet grindeshin dhe u bërtisnin.

Për shkak të pandemisë tradita shekullore e hedhjes së kryqit në ujë dhe kapja e saj nga besimtarët për të marrë bekimin për këtë vit do të mungojë në qytetin e Korçës, Sarandës, Fierit, Durrësit dhe Gjirokastrës por jo në Vlorë, Pogradec dhe Berat, ku i pranishëm ishte edhe presidenti Ilir Meta.

Arrestohet një 25 vjeçar lidhur me ngjarjen e rëndë ku mbeti i vrarë babai Armando Baboçi (mban mbiemrin e gruas) dhe u plagos i biri Erald Gjini, pas një sherri të çastit në Durrës. Në pranga ka rënë Enriko Gjini, vëllai i viktimës.

Komisioni i Pavarur i Kualifikimit ka konfirmuar në detyrë gjyqtaren Arta Duka, e cila ka aplikuar për t’u emëruar në Apel.

Policia ka gjetur në vendin e ngjarjes trupin e pajetë të 50-vjeçarit G.GJ, banues në Vajkan anës rrugës, ndërsa dyshon se ai mund të jetë përplasur nga një mjet.

Mbetemi në ndikimin e masave ajrore të paqëndrueshme, të cilat do të diktojnë vranësira dhe reshje shiu në pjesën më të madhe të Shqipërisë, por në zonat e thella malore do kemi reshje dëbore.