COVID-19/ Ndërron jetë Hajdar Kovaçi, arkitekti i njohur nga Durrësi, gruaja në spital e djali i vetëkarantinuar në shtëpi (VIDEO)

Arkitekti i njohur nga Durrësi, Hajdar Kovaçi ka ndërruar jetë mbrëmjen e sotme pas një muaji i shtruar në spital me COVID-19.

Report Tv mëson detaje nga familja e të ndjerit, ku djali i tij është i vetëkarantinuar në shtëpi, kurse bashkëshortja e tij ndodhet e shtruar në spital e prekur me koronavirus.

73- vjeçari që vdiq mbrëmjen e sotme tek Sanatorium në Tiranë prej COVID-19 është Hajdar Kovaçi, arkitekt i njohur në qytetin bregdetar të Durrësit.

Ai ka lënë pas për vendin tonë dhe kryesisht për qytetin e Durrësit shumë vepra para dhe pas viteve '90.

Gjithashtu Kovaçi ka zhvilluar një takim me shkrimtarin e njohur shqiptar Dritëro Agolli, pasi ky i fundit ishte miqësi të veçantë me artistin Ramiz Kovaçi, xhaxhain e të ndjerit.

Kovaçi pas përmbysjes së dikataturës me një grup shokësh krijoi studion e parë të projektimit në qytetin e Durrësit.

Pacienti 73-vjeçar me COVID-19, i intubuar prej 24 ditësh ka ndërruar jetë në spitalin “Shefqet Ndroqi” mbrëmjen e sotme.

Ai është arkitekti i njohur Hajdar Kovaçi nga Durrësi i cili prej thuajse 1 muaji ishte në gjendje të rëndë, me Insuficience respiratore akute.

73-vjeçari vuante nga pneumonia bilaterale respiratore (ARDS), me sëmundje bashkëshoqëruese Talasemi Minor dhe Hipertension Arterial.

Me gjithë pëpjekjet e jashtëzakonshme të stafit mjekësor në terapinë intensive, 73-vjeçari nuk arriti të mbijetojë.

Ministria e Shëndetësisë dhe Mbrojtjes Sociale u shpreh ngushëllimet familjeve të të ndjerit dhe apelon qytetarët t’i respektojnë me shumë rigorozitet masat e distancimit fizik, pasi janë përcaktuese për frenimin e përhapjes së COVID-19.

29 qytetarë nuk e kanë fituar dot betejën me COVID19 në vendin tonë, pavarësisht përpjekjeve të stafeve mjekësore të spitaleve COVID.

KUKËS-26 mostrat e fundit të personave të kontaktit dhe të afërmve të policëve dhe ushtarakëve  të derguar për ekzaminime në ISHP sapo u konfirmuan negative. 

Numri te shëruarve në Kukës shkon në 10 persona dhe deri tani ka 18 të prekur me COVID-19.

Kujtojmë se gjatë 24 orëve të fundit në vendin tonë 10 persona janë konfirmuar pozitivë. 10 të prekurit janë 9 raste janë në Tiranë, shumica kontakte familjare dhe një rast i ri është në Shkodër.

Dje duhet të kishte përfunduar spitali karantinë që u planifikua të kthehet godina e një ish-universiteti provat në Tiranë. Kryeministri Edi Rama në datë 26 mars u shpreh se brenda një muaji do të jetë gati. Ndërkohë që ka kaluar një muaj nga 26 marsi, që Edi Rama inspektoi punimet dhe e vendosi si afat, Report Tv pyeti zv/ ministren e Shëndetësisë nëse ka përfunduar.

Por përgjigja e Mira Rakacollit ishte evazive duke e shmangur. "Në skenarët që janë përgatitur për përballjen në mënyrë spitalore të COVID-19 është parashikuar që do të mbushen kapacitetet e COVID-1 dhe 2, pastaj do të kalohet te spitalet COVID 3 dhe 4".

Ashtu si Edi Rama dhe ministrja e Shëndetësisë më parë, Rakacolli tha sot se nëse kemi shtim të rasteve të reja pas dy javësh heqim masat lehtësuese. Rakacolli kishte një mesazh për qytetarët që janë në zonën e gjelbër dhe nga sot kanë përfituar nga lehtësimi i lëvizjes.

"Distancimi fizik është i domosdoshëm që të ruhet, sëmundja nuk është larguar. Hapja e masave, vlerësimi sa efikase kanë qenë do të duket pas dy javësh. Nëse nga mosrespektimi do të kemi rritje rastesh ka mundësi të kthehemi edhe mbrapa. Në vendet që lejohet biznesi të mbahet distancimi fizik" tha ajo.

Një i burgosur, i prekur me COVID-19 është dërguar me ambulancë në spitalin Infektiv në QSUT.

Siç shihet në foton që Report Tv sjell, ai është shoqëruar nga disa policë, të cilët të pajisur me maska dhe doreza kanë bërë shoqërimin e tij deri te Urgjenca Infektive, ku janë shtruar të pacientët e tjerë me koronavirus. Ai ka qëndruar aty për disa minuta për të bërë një skaner dhe më pas është larguar nga ambientet e këtij spitali, ku është dërguar në spitalin e burgut. 

Nuk dihet zyrtarisht se cilit nga cili burg vjen, por deri më tani institucioni i vetëm i vuajtjes së dënimit që është infektuar nga COVID-19 është 313-ta në Tiranë. Deri më tani, 19 të dënuar janë konfirmuar se janë të infektuar me koronavirus, dhe në përgjigje të pyetjes së Report Tv, përfaqësuesja e ISHP-s, Genta Qirjako tha se personat që kanë rezultuar pozitive brenda burgut janë izoluar në mjedise të veçanta pa kontakte me pjesën tjetër, por nuk ka detaje se ku janë izoluar, në cilat ambiente.

Mes 12 personave që janë shëruar në 24 orët e fundit një rast është në Krujë. I shëruari është një person nga Borizana, që lidhet me vatrën e parë. Personi që është shëruar ka një biznes makinerish të rënda.

Rasti i vetëm pozitiv që është shënuar sot në Shkodër lidhet me një grua, banuese në lagjen 'Kiras'. Dyshohet se mund të jetë infektuar nga rastet e mëparshme, megjithatë vijon hetimi epidemiologjik.

Një lajm i mirë na vjen nga Kruja, një nga vatrat më të rrezikshme të dy javëve të fundit! Një 70-vjeçar ia ka dalë të fitojë betejën me COVID-19, pas 4 javësh në terapi intensive. Ai ka lënë ditën e sotme spitalin, duke u kthyer në shtëpi më i fortë se kurrë. Lajmin e ka dhënë ministrja e Shëndetësisë, Ogerta Manastirliu, e cila mes të tjerave thekson se deri më tani 30 pacientë që kanë qenë në terapi intensive janë shëruar.

"Raste të reja të pacientëve që kanë nevojë për trajtim mjekësor, siç ka çdo ditë, pacientë që e fitojnë betejën me virusin e rrezikshëm COVID19! Me punë të palodhur e përkushtim nga mjekët dhe infermierët, pas 4 javësh në terapi intensive, 70 vjeçari nga Kruja është shëruar dhe kthehet në shtëpi Deri tani 30 pacientë të trajtuar në terapi intensive në spitalin infektiv, e kanë fituar betejën me sëmundjen, falë trajtimit mjekësor dhe shërbimit të të gjithë ekipit të palodhur të Infektivit", shkruan Manastirliu. 

Postimi i ministres së Shëndetësisë, Ogerta Manastirliu