Aeroporti Ndërkombëtar i Tiranës thyen një tjetër rekord në korrik 2024

Aeroporti Ndërkombëtar i Tiranës ka thyer një rekord të ri në trafikun e pasagjerëve, duke mirëpritur 1,191,182 të tillë vetëm për muaji korrik 2024.

Nga pasagjerët e muajit korrik, 840,358 ishin shtetas të huaj, ndërsa 350,824 ishin shtetas shqiptarë.

Ky rekord pasqyron një rritje të konsiderueshme të turizmit në vend por edhe thekson rëndësinë e Shqipërisë si një qendër lidhëse rajonale.

Por jo vetëm përgjatë muajit që lam pas, Aeroporti i Rinazit ka njohur rekord turistësh edhe në shtatë muajt e parë të vitit 2024. Gjithsej nga janari në korrik, aeroporti ka mirëpritur gjithsej 5,982,066 pasagjerëm nga të cilët 3,547,987 udhëtarë janë të huaj dhe 2,434,078 shqiptarë. Numri i pasagjerëve të huaj paraqet një rritje të dukshme prej 1,113,908 krahasuar me të njëjtën periudhë të vitit të kaluar, duke shënuar një rritje prej 157% nga janari deri në korrik të 2023, kur numri i pasagjerëve të huaj arriti në 1,378,503. Të dhënat janar-korrik 2024 tregojnë një shpërndarje pasagjerësh ku 60% janë shtetas të huaj dhe 40% shtetas shqiptarë.

Krahas rritjes së numrit të pasagjerëve, Aeroporti Ndërkombëtar i Tiranës arriti edhe një moment historik të ri operacional në korrik, duke procesuar 126 fluturime në mbërritje dhe 126 nisje brenda një dite, gjithsej 252 fluturime, numër ky më i lartë i regjistruar deri më sot.

Ndërkohë aeroporti po avancon edhe punimet e zgjerimit të terminalit për të rritur kapacitetet e tij. Ndërtimi do të rrisë numrin e portave duke i dhënë mundësinë aeroportit të mirëpresë më shumë pasagjerë në të ardhmen.

Këto arritje të jashtëzakonshme i dedikohen investimeve dhe menaxhimit të Kastrati Group, i cili vazhdon të përmirësojë dhe zgjerojë infrastrukturën dhe shërbimet e aeroportit duke e shndërruar në një faktor kyç të rritjes ekonomike të Shqipërisë.

G.K/I.M/Shqiptarja.com

TAG:
• shqiperi
• Tirane
• aeroporti i rinasit