Afera Partizani/ Ish-ministri i Mbrojtjes Oketa mbron Berishën dhe mohon presionet! Gjenerali Qirjazi e akuzon se e kërcënoi në zyrë: Firmose me urgjencë privatizimin se ma kërkojnë (VIDEO)

Pesë dëshmitarë të tjerë janë thirrur në gjyqin për aferën Partizani, ish-presidenti Bamir Topi, ish-ministri i Mbrojtjes, Fatmir Mediu, ish-drejtori i klubit Isa Tare, Urim Muja, si edhe Paro Laçi. Seanca e radhës do të mbahet më datë 20 ora 11:00. Për Isa Taren, i cili deri më tani nuk është paraqitur për të dhënë dëshmi pasi familjarët pretendojnë se vuan nga demenca, GJKKO vendosi të ripërsërisë thirrjen pasi SPAK pretendoi se “nuk ka një akt që vërteton se Isa Tares i është hequr e drejta e për të vepruar (dmth i paaftë për shkak te sëmundjes), por është thjesht i biri që e pretendon. Kështu që duhet përsëritur thirrja."

Ish-ministri i mbrojtjes, Gazmend Oketa në dëshminë në GJKKO mbrojti Sali Berishën dhe mohoi që ai të ketë ndërhyrë për çështjen e Partizanit. Ndryshe nga sa thuhet në dosjen e SPAK se Oketa i kërkoi gjeneral Qirjazit të firmosë me urgjencë privatizimin, pasi edhe atij ia kishin kwrkuar.

Pjesë nga dëshmia në GJKKO

Avokatja Gjyzari: Stefan Tane është caktuar në shtator 2007. Ju ishit ministër?

Gazmend Oketa: Jo.

Avokatja Gjyzari: Çfarë është Komanda Mbështetëse?

Gazmend Oketa: Është një strukturë që, sipas kujtesës sime, ushtron funksionin e administrimit të një pjese të pronave të Ministrisë së Mbrojtjes, si Spitali Ushtarak, shtëpitë ushtarake të pushimit.

Avokatja Gjyzari: Klubi i futbollit, kur kaloi në Ministrinë e Mbrojtjes, në pronësi të kujt ka qenë?

Gazmend Oketa: Të Ministrisë së Ekonomisë.

Avokatja Gjyzari: Jeni në dijeni se cili subjekt është ngarkuar me regjistrimin e kësaj pasurie të paluajtshme?

Gazmend Oketa: Mendoj se i njëjti sektor që ka të bëjë me regjistrimin e pronave, që besoj është Komanda Mbështetëse.

Avokatja Gjyzari: Kur Komanda Mbështetëse ju njoftoi se nuk e kishte mbështetur, keni ndërmarrë veprim tjetër?

Gazmend Oketa: U kam thënë të ndiqnin praktikën e regjistrimit.

Avokatja Gjyzari: Qirjazi ka shkruar se nuk u paraqit pala që duhej ta dorëzonte. Çfarë donte të thoshte Qirjazi?

Gazmend Oketa: Nuk më kujtohet shkresa.

Avokatja Gjyzari: Sipas legjislacionit, kur paguhet çmimi nga pronari, kishte ndonjë afat?

Gazmend Oketa: E kam konsideruar se kur një pronar paguan faturën, pjesa tjetër është çështje teknikalitetesh.

Avokatja Gjyzari: VKM-ja ka afatin 45 ditë për dorëzim.

Avokatja Gjyzari: Me çfarë cilësie erdhi Xhani?

Gazmend Oketa: Në cilësinë e presidentit të Klubit Partizani.

Avokatja Gjyzari: I përdorte ai objektet?

Gazmend Oketa: Me sa më kujtohet, po.

Avokatja Gjyzari: Ka ndërmarrë Qirjazi ndonjë veprim me Policinë Ushtarake për t’i marrë në dorëzim ato prona?

Gazmend Oketa: Nuk më kujtohet.

Avokatja Gjyzari: Ju e emëruat apo e gjetët ju Qirjazin?

Gazmend Oketa: Në mos gaboj, e kam propozuar dhe e kam emëruar. Kur u largova unë, ishte në të njëjtën detyrë.

Avokatja Gjyzari: Ka pasur procedura të tjera privatizimi?

Gazmend Oketa: Po.

Avokatja Gjyzari: Kishte prona të tjera të pushtuara?

Gazmend Oketa: S'e di. Nuk ikja nga zyra pa verifikuar të gjitha praktikat. Nuk di nëse kanë qenë të pushtuara ose jo, por s'ka qenë çudi të ketë pasur prona të tjera të pushtuara. Di që ka pasur raste që vinin informacione nga ushtarakë apo civilë, kështu që nuk e përjashtoj mundësinë.

Avokatja Gjyzari: Në lidhje me mënyrën e caktimit të Komandës Mbështetëse për dorëzimin e pronës. Komanda Mbështetëse ishte subjekti i ngarkuar me përdorimin e këtyre pronave?

Gazmend Oketa: Është një praktikë. Pronarët kanë dorëzuar kërkesën, është vijuar me praktikën, është gjetur e drejtë. Nuk e zgjodhi ministri Komandën Mbështetëse, e gjeti praktika e punës.

Avokatja Gjyzari: Për çfarë keni komunikuar me Berishën? Akuza ndaj Berishës ka qenë se ka vendosur në funksion të dhëndrit administratën e tij dhe të Bashkisë. A keni pasur komunikim me Berishën?

Gazmend Oketa: Asnjë komunikim derisa praktika të mbyllej. Nuk ka pasur asnjë ndikim. Berisha, edhe për çështjen më banale, ngrinte në këmbë antikorrupsionin. Nuk ka pasur asnjë diferencim për këtë çështje.

Gjykata: Thatë se patët takim. Si ka qenë komunikimi me Berishën?

Gazmend Oketa: Nuk di të them nëse më është kërkuar informacion me apo pa shkrim. Unë, si ministër, kam folur me urdhër dhe e kam kryer detyrën time si ministër.

Avokatja Gjyzari: Ligji për kthimin e pronave përcakton se... Ju thatë se këto objekte ishin pa rëndësi për Ministrinë e Mbrojtjes. Këto objekte mund të privatizoheshin?

Gazmend Oketa: Nuk ka qenë prioritet. Më vjen mirë që kritikohem për sportet dhe jo për të tjera. Ne kishim prioritet NATO-n dhe Kosovën e shpallur të pavarur. Kjo çështje ishte shumë periferike.

Avokatja Gjyzari: Parashikohet në ligj e drejta e kundërshtimit të privatizimit nga Ministria e Mbrojtjes dhe Komanda Mbështetëse?

Gazmend Oketa: Nuk di të ketë pasur.

Klodian Skënderi: Plani i përhapjes, çfarë ka qenë?

Gazmend Oketa: Një nga dokumentet e para që më është vënë në dispozicion ka qenë një draft i planit të përhapjes, i përgatitur nga administrata me mbështetjen e SHBA-së. Ju them me siguri se në draftin final kemi gjykuar që ato prona që vlerësonim t’i mbeteshin planit të përhapjes, dhe shefi i Shtabit të Përgjithshëm ishte këshilltar i Presidentit për çështjet e sigurisë.

Plani i përhapjes, Ministria e Mbrojtjes mund të nxjerrë prona nga plani i përhapjes, por ka mundësi edhe të marrë prona, t’i blejë e t’i investojë.

Klodian Skënderi: Referuar se keni urdhëruar Komandën Mbështetëse për regjistrimin e objekteve të Sport Klub Partizanit, si jeni vënë në lëvizje për urdhrin?

Gazmend Oketa: Gjykoj se praktika ka qenë njëlloj si për rastet e tjera. Kur është paraqitur kërkesa, është ndjekur e njëjta praktikë. Nuk ka ardhur nga aktorë apo faktorë jashtë Ministrisë së Mbrojtjes, të paktën tek unë nuk ka pasur asnjë ndikim.

Klodian Skënderi: Te terreni i Klubit Partizani, thatë se një shoqëri kryente aktivitet privat. Me çfarë tagri operonte?

Gazmend Oketa: S’e di.

Klodian Skënderi: Kishit informacion se ambientet ishin zënë forcërisht?

Gazmend Oketa: Jo. Të them të drejtën, e kam mësuar shumë vonë ku gjendej.

Dua të respektoj aktet e Ministrisë së Mbrojtjes. Nuk dua të hedh hije dyshimi mbi askënd, përderisa dokumentet janë aty.

Jamarbër Malltezi: A jeni në dijeni se ka pasur një shkresë nga Shtabi i Përgjithshëm i Forcave të Armatosura, e shtatorit 2006, e firmosur nga gjenerali Pëllumb Qazimi për Klubin Partizani?

Gazmend Oketa: S’e di.

Jamarbër Malltezi: A mund të ketë qenë kjo shkresë që e detyronte Komandën Mbështetëse ta regjistronte?

Gazmend Oketa: Logjika të çon se po.

Jamarbër Malltezi: Urdhri juaj ka dalë brenda ditës?

Gazmend Oketa: Besoj se jo.

Jamarbër Malltezi: A mund të ketë ardhur kërkesa para një muaji?

Gazmend Oketa: Besoj se po, varet nga praktika.

Jamarbër Malltezi: A është e shpejtë që kërkesa të presë një muaj?

Gazmend Oketa: Lidhur me shkresën, firma është e imja.

Jamarbër Malltezi: A ka shërbyer kjo shkresë si bazë për nxjerrjen e urdhrit?

Gazmend Oketa: Nuk e di nëse është ajo shkresa që ka filluar kjo histori. Atë shënim mund ta gjeni në shumë shkresa. Nuk e di nëse ka filluar me kërkesën e pronarëve apo me diçka tjetër.

Jamarbër Malltezi: Urdhri një muaj pas shkresës, tregon se ka pasur ndërhyrje apo urgjencë?

Gazmend Oketa: Nuk kam pasur ndonjë trysni deri në momentin e kthimit të pronës, kur pronarët paguan vlerën.

Jamarbër Malltezi: A ka qenë e detyruar ta bënte Komanda Mbështetëse apo ndonjë strukturë tjetër?

Gazmend Oketa: Mendoj se, përderisa e ka firmosur, i takonte.

Jamarbër Malltezi: Nëse sot nuk do të ishte bërë kthimi i pronës, sot pronarët do të kishin...?

Gazmend Oketa: Nuk di të ketë pasur ndonjë konflikt, përderisa përdorej për aktivitet sportiv.

Jamarbër Malltezi: A ju ka kërkuar misioni amerikan heqjen e pronave të tepërta, në përgjithësi?

Gazmend Oketa: Ata ishin këshilltarë dhe zyrë asistence.

Jamarbër Malltezi: Jeni në dijeni se përcaktimin e sipërfaqeve e jepte Bashkia?

Gazmend Oketa: Jo.

Jamarbër Malltezi: A jeni në dijeni se Edi Rama ka firmosur vendimin e KRRT-së të vitit 2008 dhe gjithë atë zonë e ka nxjerrë për zhvillim ndërtimi?

Gazmend Oketa: Jo, s’e di.

Jamarbër Malltezi: Ligji thotë se kur trualli nuk përdoret për destinacionin, i kthehet pronarit?

Gazmend Oketa: Kam qenë ministër i Mbrojtjes dhe jo i Ekonomisë.

Ish-ministri i mbrojtjes Gazmend Oketa këmbëngul se nuk e ka kërcënuar gjeneralin Vladimir Qirjazi dhe ti kishte kërkuar të firmoste me urgjencë të privatizimit të ish-klubit. Pasi doli nga GJKKO, Oketa tha se kishte firmosur kthimin e pronës te pronarët e ligjshëm, por nuk ishte e regjistruar në kadastër.

“Kam pasur shumë takime me Qirjazin. Nuk më rezulton që Qirjazi të ketë përdorur fjalën kërcënuar, kom me Qirjazin ka qenë zyrtar. Ka një urdhër të Ministrisë të Mbrojtjes që del mbi çdo lloj dokumentesh, pjesa tjetër janë kujtim i dikujt tjetër. Nuk kam çfarë të shtoj asnjë lloj dokumenti. Bëhet fjalë për diçka që daton 18 vite më parë. Komunikimi ka qenë me dokumente zyrtare. Ajo që di të them unë, jo vetëm me Qirajzin, por me cilindo, komunikimi ka qenë brenda kuadrit ligjor. Qirjazi ka vazhduar i qetë detyrën deri kur unë kam qenë ministër i mbrojtjes.

Jo. Këtë ua them me bindje të plotë. Kur praktika ka ardhur në zyrën e ministrit, procedura ishte thuajse e mbaruar. Pronarët legjitimë, kishin bërë pagesën që shteti u kishte kërkuar dhe çështja e klubit partizani nuk përbënte prioritet të ministrisë së mbrojtjes,. Ishte një trajtim i një çështje prone si gjithë pronat e tjera. Nuk ka pasur asgjë që e dallon nga pronat e tjera. Në momentin që urdhri i ministrit nuk po zbatohej, kanë nisur procedurat se përse pronarët legjitime që kanë paguar një faturë, nuk po kthehet prona. Mund të ishim sot po në këtë derë, po pranë kësaj gjykate, për një akuzë të kundërt. Supozojmë që ministria e mbrojtjes nuk do ta kishte kthyer pronën. Pronarët mund ti ishin drejtuar Strasburgut dhe unë mund të isha thirrur për një dëm financiar që mund ti ishte shkaktuar shtetit shqiptar. Po e them sot, se asokohe se kam menduar, e kam trajtuar si të gjitha çështjet e tjera.

Pas praktikës që ka ardhur në tavolinën time kam lëshuar një urdhër për kthimin e pronës te pronarët e ligjshëm që kishin paguar faturën përkatëse. Një javë më pas, Qirjazi ka lëshuar një urdhër në respekt të urdhrit të ministrit për ngritjen e një grupi pune për dorëzimin e pronës. Urdhri do të thotë që është gjetur legjitim. Është hapur praktika për të nxjerrë certifikatat dhe është parë që kjo pronë nuk ishte e regjistruar dhe meqë prona nuk është e regjistruar dhe procedurat ligjore janë, është kërkuar që kjo pronë të regjistrohet dhe të mbyllet praktika”, tha ai.

Ish-ministri i Mbrojtjes, Gazmend Oketa, deklaroi në GJKKO se edhe sot do të vepronte njësoj për procedurat e privatizimit të ish-kompleksit "Partizani". Ai pranoi njohjen me Malltezin dhe i pyetur nëse ishte në dijeni se dhëndri i Berishës do të ishte përfitues nga kjo procedurë, ish-ministri tha se nuk i kujtohet. Por, edhe nëse do ta dinte, kjo sipas Oketës nuk do të përbënte ndryshim në procedurën që ka ndjekur. Vetë Oketa më herët e pranoi se e firmosi urdhrin që komanda të dorëzonte pronën.

Pjesë nga dëshmia në GJKKO

Enkeleda Millonai: Keni informuar ndonjë strukturë tjetër shtetërore lidhur me këtë situatë me Komandën Mbështetëse, për urdhrin e marrjes në dorëzim dhe a keni njoftuar që kishte ngecur procedura?

Gazmend Oketa: Kur kjo praktikë nuk po ecte, më është kërkuar nga Zyra e Kryeministrisë se çfarë po bëhej me këtë praktikë. Nuk më bënte çudi, sepse ishte i njëjti standard që ndiqej edhe me praktikat e tjera. Prandaj nuk më ka bërë çudi, se ai ishte standardi që ndiqej nga qeveria edhe për çështje shumë më pak të rëndësishme.

Enkeleda Millonai: I njihnit të pandehurit?

Gazmend Oketa: Begenë dhe Pustinën jo. Malltezin e kam njohur si ish-student dhe si anëtar i PD-së, ndërsa Fatmir Bektashin kam pasur një njohje deri diku në distancë, që daton nga viti 2003.

Enkeleda Millonai: Ishit në dijeni se Malltezi ishte përfitues nga këto procedura?

Gazmend Oketa: Nuk më kujtohet, por nuk do të përbënte ndryshim, edhe nëse e dija apo nuk e dija.

Enkeleda Millonai: Keni takuar Albert Xhanin?

Gazmend Oketa: Po, më kujtohet, por kur pronarët e kishin paguar vlerën. Unë isha ministër i Mbrojtjes dhe e mora detyrën në një situatë të vështirë pas tragjedisë së Gërdecit dhe Klubi Partizani nuk ishte prioritet. Kështu që e kam pritur Xhanin. Jam shumë sportdashës dhe jam përpjekur t'i mbështes. Por edhe nëse sot do të vendosesha përballë kësaj praktike, do të merrja të njëjtin vendim. Nëse nuk e merrja, mund të isha nën akuzë, sepse pronarët mund të fitonin në Strasburg dhe mund të kishte një faturë të madhe, e të vija nën akuzë pse nuk e kisha kthyer.

Enkeleda Millonai: Objektet jepeshin me koncesion me kusht që të mos ndryshohej destinacioni?

Gazmend Oketa: Ai objekt nuk ishte në planin e përhapjes.

Enkeleda Millonai: Ndonjë strukturë nga Presidenti i Republikës, Bamir Topi, ju ka kontaktuar në lidhje me këto procedura privatizimi?

Gazmend Oketa: S'e mbaj mend kështu, që probabiliteti më i madh është jo.

Në dëshminë e dhënë në GJKKO, SPAK e ka pyetur ish ministrin e Mbrojtjes Gazmend Oketa për punësimin si Shef Kabineti në vitin 2008 të Besnik Dervishit, një personazh që rezulton shumë I lidhur me Jamarbër Malltezin.

Dervishi u punësua në një kohë kur duhet të kalonte prona e ish kompleksit Partizani nga Ushtria te familjet pronare.

“Ai ka të njëjtin profesion si unë, inxhiner ndërtimi. Jemi njohur në rrethana pune. Me kalimin në pozicionin e ministrit i propozova t’i bashkohej ekipit tim”, tha Oketa në gjyq.

I pyetur nëse ishte në dijeni që Dervishi kishte aktivitet privat, Oketa tha se “Më parë e më vonë po, por jo kur ishte drejtor kabineti”.

Ndërsa Millonai e pyeti ish ministrin edhe nëse ishte në dijeni që Besnik Dervishi ka pasur komunikim me Vladimir Qirjazin për ccështjen “Partizani” dhe Oketa tha shkurt “Secili ka mbajtur vendin e tij të punës”.

Por çfarë rezulton nga dosja?

Besnik Dervishi kishte një kompani ndërtimi me emrin Standart Alb. Fillimisht edhe pse fillon pune në Ministrinë e Mbrojtjes më 14 prill 2008 ai vazhdon punën edhe si privat. Në dosjen e SPAK thuhet se një vit pas emërimit si drejtor i kabinetit të ministrit të mbrojtjes, më 9 qershor 2009 ai ia kalon aksionet Andrea Miços. Dhe menjëherë pasi ikën nga detyra e drejtorit të Kabinetit të Ministrit në shtator 2009, pra vetëm 3 muaj më pas e rimerr sërish kompaninë.

Dervishi më vonë, në vitin 2010, hap edhe kompaninë Supervizion Profesiona. Me këtë firmë ai rezulton se ka qenë supervizori i punimeve që shoqëria Kontakt do të kryente për llogari të Homeplan në kompleksin Magnet. Punimet në vitet 2010-2020 arrijnë rreth 220 mijë euro.

Gjithashtu nga analizimi i librave të blerjes të Kontakt SPAK ka zbuluar se Standart Alb, firma e parë e Dervishit, ka kryer shitje ndaj Kontakt në një vlerë totale prej 181,166,979 lekësh (pra mbi 1.8 milionë euro) në periudhën 2010-2021. SPAK ka gjetur edhe kontratën mes Standart Alb dhe Kontakt, përfaqësuar nga Fatmir Bektashi, për punime që do të realizohen në objektin "Homeplan".

Ish-ministri i Mbrojtjes Gazmend Oketa po dëshmon në GJKKO për dosjen e aferës Partizani. Oketa u pyet nga prokurorja e SPAK, Enkeleda Millonai për takimet me gjeneralin Vladimir Qirjazi, i cili mbante detyrën e drejtuesit të Komandës së Mbështetjes dhe ishte i vetmi zyrtar që doli hapur kundër privatizimit të kompleksit.

Në dosje thuhet se më datë 31 mars 2009 Qirjazi u thirr në një takim me ministrin e Mbrojtjes që asokohe ishte Gazmend Oketa. Vetë Qirjazi, përmes një shkresë eprorit të tij shefit të Shtabit, i tregonte këtij të fundit se ku Oketa i ka kërkuar ballë për ballë që të firmosë privatizimin, pasi kjo i gjë i kërkoj edhe vetë atij.

Por, Oketa e mohoi të kishte ushtruar presion ndaj gjeneralit, duke deklaruar se prona ishte jashtë planit të përhapjes së Forcave të Armatosura dhe se procedura e ndjekur ishte e njëjtë me atë të pronave të tjera. Ai pranoi se kishte zhvilluar disa takime me Qirjazin, por tha se nuk mbante mend t'i kishte dhënë ndonjë përgjigje shkresave me të cilat gjenerali kundërshtonte dorëzimin e pronës.

Enkeleda Millonai: I keni kërkuar që ta zbatonte urdhrin, duke i thënë se kështu jua kërkonin edhe juve?

Gazmend Oketa: Kur urdhri dorëzohet me shkrim, të tjerat nuk kanë rëndësi. Ai ashtu e ka peshuar. Mendoj se edhe unë i di arsyet pse ka vlerësuar të thotë kështu. Di që pretendimi ishte se prona nuk ishte e regjistruar. Por ai, bazuar në urdhrin tim, ngriti një grup pune për të vijuar procedurën për regjistrimin e pronës.

Pjesë nga dëshmia e Gazmend Oketës në GJKKO

Enkeleda Millonai: VKM thotë 28 mijë m², më vonë ka rezultuar 32 mijë m². Ju, kur e firmosët urdhrin, jeni njohur me ndonjë akt për këtë pronë apo thjesht me urdhrin?

Gazmend Oketa: Urdhri është kopertina e një praktike të gjatë, e cila i është bashkëngjitur urdhrit. Të gjithë kanë nënshkruar për praktikën. Nuk është prona e vetme që është ndjekur me një procedurë të tillë. Shumë prona pas vitit '90 dolën të tepërta dhe pati një plan përhapjeje, ku një pjesë që nuk ishin më të nevojshme u ktheheshin pronarëve apo përdoreshin për të tjera gjëra. Urdhri im u pasua me urdhrin e komandantit për ngritjen e grupit të punës. Është ngritur çështja nëse ka qenë e regjistruar në hipotekë.

Enkeleda Millonai: Nga Vladimir Qirjazi dhe nga një tjetër jeni bërë me dije se nuk është e Komandës Mbështetëse dhe se nuk është marrë mendimi. Ju keni autorizuar dhe keni këmbëngulur t'i kalonte Komandës. Përse?

Gazmend Oketa: Prona në fjalë ka qenë jashtë planit të përhapjes të Forcave të Armatosura. Kështu që nuk arrij ta kuptoj sensin e këtyre pretendimeve. Po, gjeneral Qirjazi dha urdhër për ngritjen e grupeve të punës. Çështja e regjistrimit vijon edhe sot e kësaj dite. Ka qenë që të regjistrohej e të mbaronte ajo punë.

Enkeleda Millonai: Përse nuk caktuat një funksionar të Ministrisë, por kërkonit të caktohej struktura mbështetëse?

Gazmend Oketa: Ligji e tha të kthehej prona. Është përdorur një standard për këtë pronë, si për të tjerat. Është e njëjta praktikë që ndiqet edhe sot. Nëse në rastet e praktikave të tjera është ndryshe, atëherë pretendimet mund të jenë të njëjta. Por standardet janë të njëjta.

Enkeleda Millonai: A keni marrë takim personalisht me Vladimir Qirjazin për problematikat që ngrinte ai?

Gazmend Oketa: Pse Komanda Mbështetëse? Është pjesë e Ministrisë dhe komandanti i Komandës Mbështetëse është me uniformë. Nuk do të thotë se transferoj përgjegjësitë e mia, por pretendimet pse ia latë Qirjazit e jo dikujt tjetër, nëse gjeneralët janë vetëm për yje, por jo për përgjegjësi. Me Qirjazin kemi pasur disa takime, herë në prani të komandantit të Shtabit e herë vetëm. S'e kuptoj pyetjen.

Enkeleda Millonai: Pyetje për punësimin e Hysni Dervishit, Ardian Shashajt, Roland Llazarit, Erinda Ndroqit, Kupes.

Gazmend Oketa: Hysniu ka qenë shef kabineti, Ardian Shashaj ka qenë drejtor, kurse Kupe ka qenë sekretar i përgjithshëm. Kemi pasur mbledhje të zgjeruara dhe nuk është çudi të ketë pasur bisedime me Qirjazin.

Enkeleda Millonai: A ju kujtohet ndonjë takim me Qirjazin?

Gazmend Oketa: Më kujtohet se kemi pasur shumë takime.

Enkeleda Millonai: Tema lidhej me problemet e ngritura nga Qirjazi për mosmarrjen në dorëzim të pronës.

Gazmend Oketa: Nëse bëhet fjalë për memon e përgatitur, ai gjithmonë përgatiste memo. Ai, nëse do të kishte diçka, një gjeneral i NATO-s do të shkruante me dy rreshta që për këtë arsye urdhri nuk zbatohet.

Enkeleda Millonai: I keni kërkuar që ta zbatonte urdhrin, duke i thënë se kështu jua kërkonin edhe juve?

Gazmend Oketa: Kur urdhri dorëzohet me shkrim, të tjerat nuk kanë rëndësi. Ai ashtu e ka peshuar. Mendoj se edhe unë i di arsyet pse ka vlerësuar të thotë kështu. Di që pretendimi ishte se prona nuk ishte e regjistruar. Por ai, bazuar në urdhrin tim, ngriti një grup pune për të vijuar procedurën për regjistrimin e pronës.

Enkeleda Millonai: (Lexon shkresën e Qirjazit të marsit 2009, ku thuhet se prona nuk është marrë në dorëzim dhe se nuk ka asnjë dokument për privatizimin e pronës, dhe në këto kushte Komanda Mbështetëse nuk mund të bënte procedurën e kthimit të pronës). Ju kujtohet çfarë përgjigje i keni dhënë?

Gazmend Oketa: Jo.

Ish-ministri i Mbrojtjes, Gazmend Oketa, po dëshmon në GJKKO lidhur me aferën ‘Partizani.’ Para prokurores Enkeleda Millonai, ai thotë se dikasteri që drejtonte s’kishte si tagër të bllokonte privatizimin e pronës. Më tej shton se kur praktika kishte shkuar në zyrën e tij, ishte tashmë e përmbyllur.

Ai pranon se ka firmosur urdhrin që komanda të dorëzonte pronën.

Enkeleda Millonai: Në cilën periudhë keni qenë Ministër i Mbrojtjes dhe më parë e më vonë çfarë funksionesh keni pasur?

Gazmend Oketa: Më parë kam qenë zv/ kryeministër e më vonë Ministër Mbrojtjeje, më vonë kam qenë deputet.

Enkeleda Millonai: Çfarë ka qenë Sportklub Partizani?

Gazmend Oketa: Në aspektin e sigurisë klubi Partizani kishte zero interes, se nuk kishte të bënte me Forcat e Armatosura dhe mbrojtjen e vendit. Më shumë se ministër kam dëgjuar për klubin. Nuk kishte interes se administrohej nga persona privatë dhe pothuajse në asnjë nga diskutimet në ministri për buxhetin s’ka pasur ndonjë zë për alokimin e fondeve për këtë klub.

Enkeleda Millonai: Thatë se nuk kishte interes për Ministrinë e Mbrojtjes, por me një VKM të vitit 2008 për transformin e klubeve sportive në shoqëri aksionare. Juve ishit ministër i mbrojtjes dhe më vonë Arben Imami ka marrë masa për zbatimin e VKM. Ju keni marrë veprime për zbatimin?

Gazmend Oketa: Ministri i Mbrojtjes nuk është i sporteve. Klubi Partizani në kujtesën time ka qenë një klub privat. Nuk kemi patur një kujdes të veçantë për një klub që nuk kishte të bënte me Ministrinë e Mbrojtjes, se një klub nuk e përbënte godina, por njerëzit dhe ata që kanë pasur kompetenca.

Enkeleda Millonai: Nisur nga ligji për pronat e paluajtshme të shtetit. Në lidhje me këtë pronën që ishte në varësi të Ministrisë së Mbrojtjes, jeni interesuar për ta administruar sipas përcaktimeve ligjore.

Gazmend Oketa: Kjo çështje është e paraqitur kur është prezantuar praktika për kthimin e pronave tek ish pronarët. Kur u paraqit tek zyra ime praktika ishte përmbyllur në gjithë institucionet dhe Ministria e Mbrojtjes nuk kushte ndonjë tagër ta bllokonte këtë proces.

Enkeleda Millonai: Kush e kishte në inventarizim këtë pronë?

Gazmend Oketa: Nëse futeni në faqen e Ministrisë së Mbrojtjes, kur kryeministër ishte Nano një VKM, sipas së cilës klubi Partizani lidhej jashtë inventarit të pronave dhe se urdhërohej për ta regjistruar. Por vijoi ende procedura për regjistrimin e pronës se ende s’ka përfunduar. Prona në kujtesën time kishte pretendime nga ushtarakë se nuk ishte regjistruar. Prandaj ka qenë VKM për të ndjekur procedurën për ta regjistruar dhe kthyer pronën tek ish pronarët. Klubi Partizani s’ka qenë prioritet i Ministrisë së Mbrojtjes dhe as i imi.

Enkeleda Millonai: Keni autorizuar ndonjë ushtarak të ishte pjesë e komisionit të vlerësimit?

Gazmend Oketa: Nuk më kujtohet. Një zyrtar komunikon me shkresa zyrtare dhe ato janë aty. Nëse ka një praktikë të tillë që është nënshkruar nga unë i dal për zot. Por nuk më kujtohet të kem autorizuar ndonjë ushtarak të jetë pjesë e grupit të vlerësimit. Sigurisht Ministria e Mbrojtjes ka pasur 12 mijë vetë personel civil e ushtarak që në fillim. Unë kam deleguar kompetencat. Pasi në çdo pozicion mendoj se puna bëhet në kolektiv. Bëj pjesë tek ata politikanë që kanë deleguar kompetenca, që mendoja se ata persona duhej të ishin bashkëpunëtorë të ministrit.

Enkeleda Millonai: Keni urdhëruar komandën mbështetëse të përfaqësonte ministrinë?

Gazmend Oketa: Urdhri i tillë që ngarkonte këtë komandë dhe për këtë arsye kam firmosur urdhrin që kjo komandë të dorëzonte pronën tek pronarët e ligjshëm.