Ahmetaj në arrati për inceneratorët, Kuvendi i ndërpret pagën dhe shërbimet mbështetëse, por vijon të gëzojë mandatin

Një muaj pas autorizimit për arrestimin e ish-zv/kryeministrit Arben Ahmetaj, administrata e parlamentit i ndërpret pagën dhe shërbimet mbështetëse që vijnë për shkak të detyrës si deputet siç është pagesa për telefonin, automjetin, karburantin si dhe shpenzimet e banimit.

Ligjërisht Ahmetaj ende gëzon mandatin, dhe për rrjedhojë rregullorja nuk parashikon një masë të tillë, por burimet konfirmojnë se një vendim i tillë ka ardhur për shkak të shmangies së tij nga drejtësia.

Arben Ahmetaj u largua nga Shqipëria para se të firmosej urdhër-arresti dhe nga arratia pat deklaruar se po qëndronte tek vajza në Angli.

Arben Ahmetaj është shpallur në kërkim ndërkombëtar prej 24 korrikut 2023. Ai akuzohet për tre akuza “mosdeklarim, deklarim të rremë dhe fshehje të pasurisë”, vetëm dhe në bashkëpunim, “Korrupsion pasiv të funksionarëve të lartë shtetërorë ose të zgjedhurve vendorë” në gjashtë raste, “Pastrimit të produkteve të veprës penale ose veprimtarisë kriminale”. Bëhet fjalë një dosje voluminoze ku ai akuzohet se me veprimet apo mosveprimet e tij ka ndihmuar biznesmenët Klodian Zoto dhe Mirel Mërtiri të fitojnë projektet për inceneratorët e Fierit, Tiranës dhe Elbasanit. Krahas Ahmetajt ka dhe persona të tjerë të përfshirë dhe nuk është çudi që SPAK të mund të kërkojë masa dhe për persona të tjerë, mes tyre dhe biznesmenë.

S.G/SI.E./Shqiptarja.com

TAG:
• arben ahmetaj
• SPAK heton Ahmetajn