Asnjë tender nga 1 qershori, Voltana Ademi: Është vendim antiligjor

Kryetarja e bashkisë Shkodër, Voltana Ademi ka reaguar pas ndalimit të prokurorimeve nga bashkitë për muajin qershor nga ana e Këshillit të Ministrave. Ademi ka thënë se vendimi është absurd dhe penalizon shumë Shkodrën. Ajo sjell ne vëmendje ndërtimin e qendrës në Kiras tek shkolla veterinare e parashikuar për në qershor.

"Vendimi i Këshillit të Ministrave së pari është i jashtëligjshëm. Së dyti, vjen pa paralajmëruar. Vetëm në një emergjencë civile apo emergjencë të llojit ekonomik apo problematike që mund të ketë shteti me financat mund të jetë një vendim i tillë. Kam reaguar. Është vendim antikushtetues, në kundërshtim me ligjin funksional të qeverisjes vendore, në kundërshtim me ligjin për financat vendore, në kundështim me ligjin për buxhetin e shtetit, është në kundërshtim me kartën europiane për autonomi vendore.

Ne nuk kemi Gjykatë Kushtetuese fatkeqësisht, do të ishte rasti më unik dhe më i mirë për të argumentuar se nesër asnjë qeveri nuk duhet të guxojë të mos zbatojë ligjin. Do të duhet të shkoja pranë Gjykatës Kushtetuese si i vetmi organ për ta ankimuar këtë vendim të Këshillit të Ministrave. Nuk e kam këtë mundësi sepse ky institucion mungon. Atëherë vendosa ta bëja këtë fakt publik dhe vura në dijeni të gjitha kancelaritë dhe institucionet europiane. Pas 24 orëve Këshilli i Ministrave e ndryshoi vendimin duke ndryshuar vetëm dy gjëra, që nuk e bëjnë më pak të jashtëligjshëm edhe vendimin e ri. Ata ndryshuan afatin, në vend që të ishte menjëherë, e hëna e kësaj jave ku do të bllokoheshin të gjitha bashkitë e gjithë Shqipërisë. Nuk është çështja e kryetarit të bashkisë por zhvillimit të qyteteve dhe shërbimeve për qytetet.Do të bllokohej Vlora, Elbasani, Durrësi, Tirana, Shkodra, Berati, Fieri. Nga komunikimi që kam pasur me gjithë kryetarët e bashkive, ka pasur një reagim. Është e rëndë, bllokohemi të gjithë në punën e përditshme, për shërbimet që janë themelore dhe kjo do të na e vështirësonte jetën. Tani vendimi hyn në fuqi me 1 qershor. Përsëri jemi në kushtet e antikushtetutshmërisë.I kam kërkuar kryeministrit dhe Këshillit të Ministrave që ky vendim nuk duhet të ekzistojë." ka deklaruar Voltana Ademi.

TAG:
• voltana ademi
• tenderat
• zgjedhjet lokale 2019