‘Rrugë të lëna rrugëve’, Basha: Rama i frikësuar, fshihet pas thashethemeve pa vlerë! Nuk mund të krahasohet me ne

Deklaratat e  Kryeministrit Edi Rama nga aeroporti i Kukësit, i cili u shpreh se çdo gjë që ka nisur gjatë qeverjes së saj, Partia Demokratike i ka lënë rrugës,  Lulzim Basha i sheh si një përpjekje e kreut të qeverisë për të  mos dhënë llogari para shqiptarëve.

Në një komunikim me gazetarët këtë të shtunë, Basha deklaroi se Rama, i cili nuk ka shtruar asnjë kilometër rrugë, nuk mund të bëjë një krahasim me qeverinë e vjetër.

"Sot në Kukës jetojnë 1/3 e banorëve që kishte qyteti kur Edi Rama erdhi në pushtet. 2/3 e kuksianëve janë detyruar të ikin nga vendi prej diskriminimit që u ka bërë Edi Rama në 7 vite. Ka premtuar 300 mijë vende pune, ka larguar 500 mijë shqiptarë nga vendi. Shqiptarët e dinë se kanë përballë një gënjeshtar kronik, që u ka kushtuar qytetarëve shumë jetë. Lëviz nëpër Shqipëri si pushtues, i pasigurtë nga shqiptarët. Një njeri që për 8 vite nuk ndërtoi asnjë km rrugë nuk ka cipën që të krahasohet me rrugët e bëra në të shkuarën. Ai përpiqet të largojë vëmendjen e asaj që do të vijë më 25 prill. Është njeriu që vazhdon të vjedhë. Nuk i ka mbetur asgjë tjetër veçse të gënjejë dhe të shpifë në prag të largimit" - tha Basha.

Ndërkohë mëngjesin e sotëm, duke folur nga Kukësi, kryeministri ka shprehur kritika të forta mbi PD-në duke filluar që nga ndërtimi i rrugës së Kombit si dhe atë të aeroportit të qytetit verilindor.

"Do të ndodhë me Shqipërinë e njëjta që ndodhi me rrugën e Kombit. E cila është e vetmja vepër e nisur nga ata që duan të rikthehen në krye të vendit me njëfarë ideje që të bëhej një vepër e standarteve më të mira. Edhe ajo rrugë e cila u inagurua për zgjedhje dhe u përurua me tantane si të ishte bashkimi i Shqipërisë me Kosovën dhe jo thjesht hapje e tunelit ndërkohë që as ajo nuk ishte përfunduar. U la rrugëve në një situatë që filloi të degradojë. U la në në një situatë ku filluan të rrëshkisnin gurët. U kthye në burim aksidentesh. Çfarë po ndodh me rrugën e kombit. Është një ndryshim cilësor. Shikoni se çfarë vepre inxhinierike po merr formë përfundimtare në nyjen kryesore" tha Rama.

Gjithashtu kryedemokrati u shpreh se në Kukës, ka mbetur vetëm 1/3 e popullsisë, pasi pjesa tjetër është larguar për faj të kryeministrit Rama. Ndër të tjera në komunikim me gazetarët, Basha preku dhe pjesën e pandemisë së koronavirusit.

Ai deklaroi se ka ndjekur situatën gjatë 24 orëve të fundit për të cilën tha se sistemi është në kolaps. Basha deklaroi gjithashtu se u angazhua me 4 raste të afërmish me COVID.

“Pavarësisht kërkesave të këtyre rasteve, testimi i pacientëve është refuzuar nga ISHP” -tha Basha ndërsa theksoi se mungesa e testimeve është  përpjekje e qëllimshme për të fshehur të vërtetën.

Ndërkohë që kryetarja e LSI-së, Monika Kryemadhi ka deklaruar se mund të bëjë koalicion me partinë e Jozefina Topallit, Basha nuk preferoi që të japë një koment. Ai tha se pyetjet lidhur me këtë çështje tu drejtohen atyre.

 

Rendit zhvillimet sipas orarit:

Të Fundit Të Parat

E.M./B.K./Shqiptarja.com

TAG:
• lulzim basha