POP 5

Lajmet më të lexuara të 5 minutave të fundit

Çmimet e larta ulin tregtinë e mallrave në 4 mujor, INSTAT: Eksport-importi në porte e hekurudha u ul me mbi 21%! Të ardhurat në buxhet janë rritur mbi 18%

Tregtia e mallrave në katër-mujorin e parë të këtij viti ka pësuar rënie dyshifrore dhe shkaku kryesor janë çmimet e larta në tregjet ndërkombëtare. INSTAT thotë se importet dhe eksportet deri në prill u ulën me mbi 21%, ndërkohë që Banka e Shqipërisë thotë se bizneset kanë rritur kërkesën për kredi me qëllim që të përballojnë importin e mallrave pavarësisht çmimeve të larta.

Rritja e shpejtë e çmimeve në tregjet ndërkombëtare ka goditur tregtinë e mallrave. INSTAT raporton se në 4 mujorin e parë të vitit volumi i tregtisë së mallrave të importuara dhe eksportuara nga deti dhe hekurudha është ulur me 21.15%.  Nga janari deri në prill të këtij viti nëpër porte janë ngarkuar dhe shkarkuar 1.426 mijë ton, mallra duke u ulur me 6,9 %, krahasuar me 2021.

Ndërsa volumi i tregtisë nëpërmjet hekurudhës është ulur me 35.4%. Rritje ka regjistruar vetëm tregtia nga ajri. Por pavarësisht se volumi i tregtisë në sasi është në rënie dyshifrore, tregtia në vlerë financiare është rritur për shkak se për të njëjtat produkte po paguhet më shumë për ti blerë. Në vlerë financiare vlera e importeve nga portet është rritur me 31.7%, duke arritur në 137 miliardë lekë.

Por si pasojë e çmimeve të larta, janë rritur të ardhurat në buxhetin e shtetit. Konkretisht vetëm të ardhurat doganore në këtë katër-mujor të parë janë rritur me 18.1%, ku rolin kryesor e ka luajtur TVSH-ja në import. Vlera e TVSH-së që paguhet në zhdoganimin e produkteve është më e lartë për shkak se produktet po kushtojnë më shtrenjtë.

Për të mbështetur vijimin e tregtisë dhe furnizimin e vendit me produkte, kryesisht ushqimore, qeveria vendosi të japë 3 miliardë lekë garanci sovrane për importuesit e produkteve ushqimore në mënyrë që ata të krijojnë furnizime deri në tre muaj.

Ndërkohë pak ditë më parë Banka e Shqipërisë raportoi se bizneset në këtë periudhë të parë të vitit kanë rritur kërkesën për kredi me qëllim kryesor që të kenë likuiditet për të importuar.

Nga ana tjetër FMN thotë se goditja që po jep lufta në Ukrainë po përshpejton rritjen e inflacionit, çka dëshmon se rritja e çmimeve do të vijojë.

K.T./Sh.Sh/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 8 Janar, 21:20

    Berisha kundër uljes së çmimit të energjisë elektrike, si iu duket?

Lajme të tjera



×

Lajmi i fundit

Urdhër arresti i Hagës është i pavlefshëm, Netanyahu merr ftesë për të shkuar në Poloni për përkujtimin e Holokaustit

Urdhër arresti i Hagës është i pavlefshëm, Netanyahu merr ftesë për të shkuar në Poloni për përkujtimin e Holokaustit

10 Janar, 09:35