Bashkia Dimal ka zhvilluar sot një mbledhje emergjente të Këshillit Bashkiak, ku në fokus ka qenë propozimi i PS për hartën e re territoriale, i cili parashikon shkrirjen e kësaj bashkie dhe bashkimin e saj me Bashkinë Berat.

Në nisje të mbledhjes është lexuar relacioni i propozuar për shkrirjen e Bashkisë Dimal. Sipas anëtarëve të Këshillit Bashkiak, argumentet e paraqitura në relacion lidhen me lidhjen historike të hershme mes zonave, shtrirjen përgjatë lumit Osum dhe ekzistencën e Spitalit Rajonal në Berat.

Këshilltarët e Bashkisë Dimal i kanë kundërshtuar këto argumente, duke deklaruar se ato nuk përputhen me analizën e raportit të ekspertëve.

Sipas tyre, gjatë 10 viteve të fundit, Bashkia Dimal ka realizuar mesatarisht rreth 38% të investimeve me buxhetin e vet aktiv, duke u renditur e pesta në rang vendi. Ndërsa, sipas këshilltarëve, Bashkia Berat e ka pasur këtë tregues në një mesatare prej rreth 7%.

Këshilltarët kanë argumentuar gjithashtu se bashkimi me Bashkinë Berat nuk do të sjellë rritje të kapaciteteve investuese për Dimalin. Përkundrazi, sipas tyre, shkrirja mund të ndikojë negativisht në ekonominë e zonës, veçanërisht tek fermerët, të cilët prej vitesh eksportojnë prodhimet bujqësore dhe të serave në tregjet ndërkombëtare.

Pas diskutimeve, anëtarët e Këshillit Bashkiak kanë dalë në përfundimin se relacioni nuk argumenton, sipas tyre, me fakte dhe studime fizibiliteti avantazhet e shkrirjes së Bashkisë Dimal.

Këshilltarët i janë referuar edhe nenit 89, duke argumentuar se, në këto kushte, propozimi për shkrirjen e bashkisë është i pavlefshëm.

Në përfundim të mbledhjes, 18 nga 21 anëtarët e Këshillit Bashkiak Dimal kanë votuar “Pro” pavlefshmërisë së relacionit të propozuar për shkrirjen e bashkisë, si dhe “Pro” mos-shkrirjes së Bashkisë Dimal dhe vijimit të saj si njësi vendore më vete.

Rendit zhvillimet sipas orarit:
Ora 21:30
Reforma Territoriale, banorët e Dimalit sërish në protestë: Ne do të mbetemi bashki (VIDEO)

 

Reforma Territoriale, e cila parashikon shkrirjen e Bashkisë Dimal dhe bashkimin e saj me Bashkinë Berat, ka nxjerrë sërish në protestë banorët e Dimalit.

Me moton “Dimali mbetet Dimal. Zëri i qytetarëve duhet të dëgjohet”, banorët kanë kërkuar që qeveria të mos e prekë Bashkinë Dimal dhe të tërheqë propozimin për shkrirjen e saj.

“Dimali nuk duhet të preket. Dimali do të mbetet bashki”, shprehen banorët.

Sipas tyre, Dimali është një zonë me histori, tradita dhe potencial të rëndësishëm ekonomik. Banorët e lidhin historinë e saj me periudha të hershme, duke theksuar rëndësinë që ka pasur ndër vite.

Protestuesit i bëjnë thirrje kryeministrit Edi Rama të mos e prekë Bashkinë Dimal, emri i së cilës, sipas tyre, u ndryshua në vitin 2015, nga Urë Vajgurore në Dimal, me vendimin nr. 34 të Kuvendit të Shqipërisë.

Banorët argumentojnë se bashkimi i Dimalit me Beratin do të ndikojë negativisht në ofrimin e shërbimeve për qytetarët, por edhe në zhvillimin ekonomik të zonës.

Ata veçojnë veçanërisht sektorin bujqësor dhe prodhimin në sera, që shtrihet në fshatra si Kutalli, Samaticë, Drenovicë, Cukalat, Goriçan dhe zona të tjera. Sipas banorëve, prodhimet bujqësore të kësaj zone prej vitesh furnizojnë edhe tregjet ndërkombëtare.

Banorët paralajmërojnë se do të vijojnë të kundërshtojnë çdo përpjekje për shkrirjen e Bashkisë Dimal.

Xh.K/Shqiptarja.com