E rëndë në Shkodër/ 15-vjeçari vritet me thikë pas një sherri, autori e qëlloi disa herë dhe u largua! I mituri u gjet nga një kalimtar, ndërroi jetë në spital (EMRI)

SHKODËR- Një ngjarje e rëndë tronditi qytetin e Shkodrës, ku një 15-vjeçar u vra pasi u godit disa herë me thikë. I mituri Emiljano Gjoni gjeti vdekjen në spitalin rajonal të Shkodrës, pasi nuk u mbijetoi dot plagëve të rënda që kishte marrë.

Ngjarja ndodhi rreth orës 19:30 të 14 tetorit në lagjen “Skenderbeg”. Autori i vrasjes ende nuk është identifikuar nga blutë e Shkodrës, pasi u largua menjëherë nga vendi i ngjarjes. Motivi ende nuk është i qartë, por Policia njofton se gjithçka ka nisur pas një sherri dhe më pas i mitur është goditur disa herë me thikë.

Pa mëshirë, autori e ka lënë të miturin në mes të rrugës dhe është larguar nga vendi i ngjarjes. Burime për gazetarin e Report Tv, Ergys Kavaja bëjnë me dije se autori shoqërohej edhe nga një person tjetër.

Ka qenë një kalimtar i rastit që ka gjetur të miturin të shtrirë në tokë dhe të gjakosur. 15-vjeçari ka pasur ende shenja jete dhe kalimtari i ka dërguar në spital për të marrë ndihmë mjekësore. Fatkeqësisht i mituri nuk mundi t’i mbijetojë plagëve të marra dhe humbi jetën në spital.

"Rreth orës 19:30, në zonën e Fermentimit, në lagjen “Skenderbeg”, dyshohet se gjatë një konflikti për motive të dobëta, një shtetas ende i paidentifikuar ka dëmtuar me mjet prerës (thikë),  një të mitur 15-vjeç, i cili si pasojë e plagëve të marra ka ndërruar jetë në Spitalin Rajonal Shkodër. Shërbimet e Policisë kanë shkuar menjëherë në vendngjarje ku po punojnë për identifikimin dhe kapjen e autorit", njoftoi policia. 

Report Tv solli edhe pamjet nga vendi i ngjarjes, ndërsa tashmë Policia dhe grupi hetimor kanë zbritur në terren për të zbardhur ngjarjen, motivet, dinamikën, si edhe për të identifikuar dhe arrestuar autorin e vrasjes.

Rendit zhvillimet sipas orarit:

Të Fundit Të Parat

SI.E./S.G/Shqiptarja.com

TAG:
• Shkoder
• Policia e Shkodrës
• vrasje
• Emiljano Gjoni