'Martinaj 100 mijë € Bardhit'? SPAK: Mesazhe të manipuluara, po hetojmë për burimin! Kush po i shtantazhon politikanët? Prokuroria: SMS të tilla u shkuan edhe të tjerëve

TIRANË- Bisedat në të cilat përmendej nga bosë të krimit emri i Gazment Bardhit, janë të manipuluara, tha zyrtarisht SPAK në një njoftim, duke sqaruar se nuk rrjedhin nga zbardhje që hetuesit i kanë bërë mesazheve nëpërmjet aplikacionit të koduar, Sky ECC.

Në një reagim publik SPAK thotë se është vënë në dijeni se mesazhe të tilla i kanë shkuar disa politikanëve dhe figurave publike gjatë ditëve të fundit, përmes aplikacionit të koduar Signal, aty ku i mbërriti edhe kreut të PD-së Gazment Bardhi. SPAK thotë se ka nisur verifikimet për të identifikuar burimet e këtyre mesazheve me qëllim ndjekjen penale të autorëve.

"Në përgjigje të interesimit të shtuar të mediave informojmë publikun se Prokuroria e Posaçme kundër Korrupsionit dhe Krimit të Organizuar është vënë në dijeni për disa mesazhe që i kanë mbërritur politikanëve dhe figurave publike gjatë ditëve të fundit përmes aplikacionit të koduar të komunikimit, Signal.

LEXO EDHE:
‘Mbështesim SPAK’, Alibeaj: Këta duan që të minojnë punën e tij! Komisioni ‘Xhafaj’ synim për ta delegjitimuar

Nga verifikimet e deritanishme të Prokurorisë së Posaçme, mesazhet e pretenduara se rrjedhin nga transkripte bisedash të kryera nëpërmjet SKY/ECC janë manipuluar duke sajuar biseda të pavërteta për individë dhe veprime të kundërligjshme.

Prokuroria e Posaçme, po monitoron nga afër këtë situatë dhe ka nisur verifikimet për të identifikuar burimet e këtyre mesazheve me qëllim ndjekjen penale të autorëve. I bëjmë thirrje të gjithë qytetarëve dhe aktorëve publikë të tregojnë kujdes kur ndërveprojnë me mesazhe të kësaj natyre, si dhe të shmangin shpërndarjen e materialeve të paverifikuara", njoftoi sot SPAK. 

Pasi SPAK konfirmoi se bisedat janë të manipuluara, kreu i grupit të PD, Gazment Bardhi tha në një prononcim për mediat se ishte një tentativë për ta bërë pis, por e vërteta doli.

"Me rrugë institucionale, ajo që u kam thënë ditën që kam dalë nga SPAK se prokuroria më konfirmoi se bisedat janë të sajuara, sot SPAK e ka konfirmuar me një njoftim zyrtar. Ka politikanë të lartë të mazhorancës që dihen për lidhjet me krimin, që janë vërtetë në dosjet e SPAK të përmendur për bashkëpunimin me krimin. Kishte një tentativë për të bërë pis cilido që ka vendosur të thotë të vërtetën. Gjëja e mirë e këtij zhvillimi që u shpërnda për propagandë, brenda një jave mori përgjigjen e merituar. S’mund të fshihen lidhjet e Ramës me krimin e organizuar duke sajuar mesazhe", tha Bardhi. 

Në mesazhet për të cilat Bardhi kërkoi ndërhyrjen e SPAK duke thënë se i janë dërguar për shantazh, pretendohej se Ervis Martinaj kishte porositur Erigers Mihasin,  i vrarë në Tiranë në nëntor 2021, t'i jepte 100 mijë euro Bardhit me porosi të Shkëlzen Berishës. 

Bisedat i kanë mbërritur Bardhit në Signal, për të cilat SPAK thotë se janë të manipuluara

Kodi i Sky ECC që pretendohet i Ervis Martinaj – NP8LS4

Shkon dot deri te zyra të marrësh 100 mijë euro. T’i çoje deri te M**** (emër hoteli në Tiranë) t’ia jepje Gaz Bardhit. Bëji telefon në Signal kur të jesh aty, që të ulet t’i marrë.

Kodi në SKYECC që pretendohet i Erigers Mihasit – TI8I2F –

Po pse po ju jep kaq shumë se këta nuk do vijnë kurrë në pushtet

Kodi në SKYECC që pretendohet i Ervis Martinaj – NP8LS4

Po çfarë t’i bëj Zenit se për këtë s’po e rruaj k****. Fola me të (me Bardhin nënkuptohet) i do për fushatë. I thashë edhe për grupin e shoqërimit që e paguaj unë.

Kodi në SKYECC që pretendohet i Erigers Mihasit – TI8I2F

Ja dhashë, të fala bëri. Ishte optimist për fitore

SI.E./G.K/Shqiptarja.com

TAG:
• Ervis Martinaj
• spak
• gazment bardhi
• Signal
• Sky ecc