Monedha evropiane ka thelluar zhvlerësimin ndaj lekut këtë javë dhe po këmbehet me 95.3 lekë. Banka e Shqipërisë thotë se shkaqet janë tek volumi i lartë i valutës në treg prej turizmit, investimeve të huaja dhe remitancave. Kjo tkurrje po vijon të ndikojë negativisht tek eksportet dhe nga ana tjetër po favorizon importuesit.

Euro ka rënë në nivelin më të ulët historik të saj. Sipas kursit zyrtar të Bankës së Shqipërisë këtë të merkure, një euro është këmbyer me mesatarisht 95.32 lekë, niveli më i ulët i regjistruar ndonjëherë.  

Në raport me vjet, zhvlerësimi është rreth 3% dhe sipas Bankës së Shqipërisë ky dobësim lidhet me fluksin e lartë të valutës në treg, ndikuar nga turizmi, remitancat apo investimet e huaja.

Të dhënat tregojnë një forcim të vazhdueshëm të monedhës shqiptare. Nëse më 20 maj 2021, një euro vlente 123.04 lekë, sot ajo është zhvlerësuar me 27.7 lekë.

Gjasat janë që zhvlerësimi i euros të mos ndalë, pasi me afrimin e sezonit turistik, pritet që presionet mbi kursin të vijojnë, duke mbajtur euron në nivele të ulëta historike edhe në muajt në vijim.

Forcimi i lekut ka ndikim të drejtpërdrejtë në ekonomi. Nga njëra anë, ai ul koston e importeve dhe favorizon qytetarët apo bizneset që kryejnë pagesa në euro. Nga ana tjetër, zhvlerësimi i euros shton presionin mbi eksportuesit, industrinë e turizmit dhe familjet që marrin të ardhura në monedhën evropiane.

Për të mbajtur nën kontroll kursin euro-lekë, banka qendrore ka ndërhyrë vazhdimisht vjet duke blerë rreth 1 miliardë euro në treg, pikërisht për të zbutur rënien e saj, çka tregon se pa këto ndërhyrje, zhvlerësimi mund të ishte edhe më i thellë.

KËMBIMI EURO-LEKË

20 maj 2021            1 €/123.04 lekë

20 maj 2022            1 €/ 119.96 lekë

20 maj 2023            1 €/ 111.13 lekë

20 maj 2024            1 €/ 100.41 lekë

20 maj 2025              1 €/ 98.11 lekë

20 maj 2026              1 €/ 95.32 lekë

Në rënie është edhe dollari amerikan. Pas një forcimi të lehtë në muajin mars për shkak të përshkallëzimit të konfliktit në Lindjen e Mesme, ai këmbehet me 82.23 lekë nga 88 lekë që ishte vjet.