GOLAT/ Man. United përmbyset 4-3 nga Copenhagen, Bayern Munich kalon më tej! Biletën për në 1/8 e CHL e marrin edhe Sociedad, Inter e Real Madrid

Champions League zhvilloi këtë të mërkurë tetë ndeshje, për raundin e katërt në grupe. Gjithçka nisi në 18:45, ku Real Sociedad mundi 3-1 Benficën, ndërsa Napoli barazoi 1-1 me Union Berlin. Në 21:00 u luajtën gjashtë sfida, ku pas fitoreve respektive, një biletë për në 1/8 e Champions e morën Bayern Munich, Inter, Real Madrid dhe Real Sociedad. Këto skuadra i bashkohen Leipzig dhe Man. City që kaluan për më tej në ndeshjet e djeshme. Për t'u theksuar humbja 4-3 e Manchester United në transfertë me Copenhagen.

Në "San Sebastian", Real Sociedad fitoi 3-1 kundër Benficës, në një ndeshje të dominuar nga baskët dhe të mbyllur që në minutat e para. Gjithçka do zhbllokohej në minutën e gjashtë me Merino, ndërsa në të 11 minutë ishte Oyarzabal që shënoi golin e dytë. Në minutën e 15-të Merino shënoi për Sociedadin, por goli u anullua për prekje me dorë. Gjithsesi në të 21 minutë ishte Barrenetxea që shënoi për 3-0, para se Mendez në të 29 minutë të gabonte penalltinë. Në pjesën e dytë Rafa Silva shkurtoi për 3-1. Tanimë Sociedad me dhjetë pikë kryeson grupin D dhe kalon në 1/8, teksa Benfica ka zero pikë pas katër ndeshjeve duke qenë në vendin e fundit. 

Në stadiumin "Diego Armando Maradona", Napoli dhe Union Berlin barazuan 1-1 për grupin C. Italianët bëjnë një hap fals në shtëpi, me gjermanët që marrin pikën e parë në këtë turne. Dueli u zhbllokua pas 39 minutave nga Politano, me pjesën e parë që u mbyll 1-0. Në pjesën e dytë ishte Fofana që në të 52 minutë barazoi ndeshjen. Me shtatë pikë, Napoli është i dyti në grup pas Real Madridit, ndërsa Berlin me një pikë është në vendin e fundit.

Në Austri, Salzburgu vendas humbi 0-1 me Interin. Zikaltërit e Inzaghit marrin një biletë për më tej, së bashku me Sociedadin që janë me dhjetë pikë në grupin D. Ndeshja për Interin u vendos nga goli i Martinez me penallti në të 85 minutë. Në fushë për zikaltërit u fut edhe Asllani, që zëvendësoi Calhanoglu në të 61.

Në "Bernabeu", Real Madrid fitoi 3-0 kundër Bragës për raundin e katërt në grupin C të Champions League. Me këtë sukses dhe barazimin e Napolit, Real Madrid është skuadra e radhës që kalon në 1/8 me eliminim direkt. Golat për djemtë e Ancelottit u shënuan nga Diaz në të 27 minutë, Vinicius në minutën e 58 dhe Rodrygo në të 61 minutë. Real Madrid me 12 pikë mban kreun, teksa Napoli me shtatë pikë mban vendin e dytë.

Champions League - raundi 4 në grupe - e mërkurë:

Grupi A

21:00 Bayern Munich 2-1 Galatasaray (Kane 80', 86' / Bakambu 90+3')

21:00 Copenhagen 4-3 Manchester United (Elyounoussi 45', Goncalves 45+9', Lerager 83', Bardghji 87' / Hojlund 2', 28', Fernandes 69')

Grupi B

21:00 Arsenal 2-0 Sevilla (Trossard 29', Saka 64')

21:00 PSV 1-0 Lens (de Jong 12')

Grupi C

18:45 Napoli 1-1 Union Berlin (Politano 39' / Fofana 52')

21:00 Real Madrid 3-0 Braga (Diaz 27', Vinicius 58', Rodrygo 61')

Grupi D

18:45 Real Sociedad 3-1 Benfica (Merino 6', Oyrazabal 11', Barrenetxea 21' / Rafa Silva 49')

21:00 Salzburg 0-1 Inter (Lautaro 86')

Renditja:

Rendit zhvillimet sipas orarit:

Të Fundit Të Parat

S.Dh/r.k./Shqiptarja.com

TAG:
• Inter
• napoli
• real madrid
• PSV Eindhoven
• Sevilla
• arsenal
• galatasaray
• Bayern Munchen
• benfica
• real sociedad
• champions league