Nga dita e sotme Ishulli i Sazanit do të jetë i hapur për të gjithë turistët.

Ka qenë kjo marrëveshja që nënshkruan këtë të mërkurë ministrja e Mbrojtes Mimi Kodheli dhe ministrja e Zhvillimit Ekonomik, Turizmit dhe Sipërmarrjes Milva Ekonomi.
 
Nëpërmjet nënshkrimit të kësaj marrëveshjeje, do të bëhet i mundur lejimi i turistëve për kryerjen e vizitave turistike në ishullin e Sazanit, i cili është pronë në përgjegjësi të Ministrisë së Mbrojtjes.
 
Turistët do të lejohen të kryejnë vizita turistike në ishullin e Sazanit, gjatë sezonit turistik veror në periudhën 1 maj 2017 deri më 31 tetor 2017. Marrëveshja përcakton gjithashtu edhe orarin dhe zonat që mund të vizitohen në këtë ishull.
 
Një fjalën e saj ministrja Ekonomi ka falenderuar Kodhelin që ka vënë në dispozicion një pronë të ushtrisë pasi sipas saj turistët sa vijnë e kërkojnë të kenë më shumë produkte turistike, gjë e cila ndihmon në rritjen e turizmit vendas.
 
“Fakti që ne lejojmë turistët të kalojnë në ishullin e Sazanit disa çaste turistike kur konsumojnë turizëm në vendin tonë, padyshim që është një lehtësim i madh për turizmin vendas. Një nga kushtet që turistët kanë pasur vazhdimisht në vëmendjen e tyre, ka qenë siguria, kështu unë ju falenderoj shumë për këtë vëmendje të veçantë që bëtë për vënien në përdorim të ishullit të Sazanit dhe për të nxitur më tej përdorimin atraksionin turistik Sazan”- tha ministrja Ekonomi.
 
Nga ana e saj ministrja Kodheli e konsideroi turizmin si një degë shumë të rëndësishme të ekonomisë shqiptare dhe për këtë shprehu gatishmërinë për të vënë në dispozicion të turistëve, asetet e Ministrisë së Mbrojtjes që ndodhen në vendet turistike, duke e vënë theksin te siguria.
 
 “Sot bota, sidomos brigjet e Mesdheut janë të trazuara dhe të shqetësuara për shkak të gjithë ngjarjeve gjeopolitike në këtë zonë dhe shumë turistë sot preferojnë të mos frekuentojnë vende me një rrezikshmëri të lartë. Ajo çka ne duhet të sigurojmë është siguria e bregdetit tonë, gjë për të cilën ne punojmë çdo ditë. Por njëkohësisht për vetë faktin që shumë nga repartet ushtarake ndodhen në vende të spikatura të një bukurie të veçantë natyrore siç është bredeti shqiptar, ne duhet dhe mund të krijojmë mundësinë e vizitimit të këtyre zonave edhe nga turistët, e cila e bën sigurisht më atraktiv të gjithë qëndrimin e tyre”- u shpreh ministrja Kodheli.

Redaksia Online
(B.K/Shqiptarja.com)