Ëndrra Euro 2020 vazhdon, Shqipëria gjunjëzon me goleadë Islandën në Elbasan, fiton 4-2 (VIDEO-FOTO)

Shqipëria gjunjëzon Islandën në Elbasan. Cikalleshi shënon golin e katërt për kuqezinjtë. Pas një topi në zonë dhe duke shfrytëzuar edhe euforinë në kampin e Shqipërisë, Cikalleshi çoi topin në trekëndësh duke çuar në qiellin e shtatë tifozët e pranishëm.

'Raketa' e Shqipërisë, Odise Roshi shënon golin e tretë për Shqipërinë, duke kaluar po kaq herë në avantazh kuqezinjtë. 

Kolbeinn Sigthorsson ka barazuar shifrat për islandezët. Me të shënuar Hysaj, trajneri islandezët menduan të hedhin në fushë sulmuesin kryesor të tyre. Dhe numri 9 shënon shumë shpejt duke barazuar rezultatin në 2-2. 

Islandezët kanë ndëshkuar dy herë brenda disa minutave kuqezinjtë duke i thyer euforinë disa minutëshe.

Kapiteni Elseid Hysaj ka kaluar në avantazh përsëri Shqipërinë pas një aksioni fantastik të Rei Manaj. Shqipëria u trondit pak nga goli i Sigurdsson dhe barazimi i befasishëm i Islandës por situata zgjati shumë pak.

Sërish një gol nga mbrojtja, kësaj radhe nga Elseid Hysaj i cili shënon golin e parë me fanellën e kombëtares kuqezi.

Islanda ka barazuar rezultatin me fillimin e pjesës së dytë. Gylfi Sigurdsson ka arritur të shënojë falë një pasigurie të mbrojtjes shqiptare. I gjendur në mes të zonës Sigurdsson ka çuar në cep të portës i pashqetësuar topin dhe 1-1. 

Shqipëria e filloi në sulm këtë pjesë të dytë por islandezët janë treguar tepër të ftohtë duke shfrytëzuar paqartësinë e mbrojtësit Ismajli në mbrojtje. 

Kastriot Dermaku kalon në avantazh Shqipërinë përballë Islandës me një gol me kokë. Mbrojtësi ka shënuar pas një harkimi në zonë të kapitenit Hysaj. 27- vjeçari i cili i mori vendin Mavrajt ka shpërblyer me gol jo vetëm Shqipërinë por dhe besimin e Edy Rejas për këtë sfidë kaq të rëndësishme.

Shqipëria në minutën e 32' e gjen veten në avantazh minimal 1-0 pas një pjese të parë vërtet sulmuese. Kur pritej të shënonte një sulmues shënoi një mbrojtës.

Shqipëria është shfaqur që në minutat e para të ndeshjes sulmuese ku dhe ka rrezikuar me një rast të Sokol Cikalleshit. Një rrëmujë në zonën e islandezëve nuk u shfrytëzua mirë nga Cikalleshi i cili goditi jashtë në minutën e 11'. 

Portieri Halldorsson në këtë rast të mirë për shqiptarët ishte thuajse i mposhtur por bomberi kavajas u nxitua duke goditur keq dhe topi më pas përfundoi. Nuk mungoi ovacioni dëshpërues i tifozëve të shumtë shqiptarë në Elbasan Arena.

Lojtarët e kombëtares shqiptare të futbollit kanë prekur tapetin e gjelbër të 'Elbasan Arena'. Duke u ambientuar qetësisht me atmosferën e cila pritet të jetë e ndezur, i vetmi që duket i levizshëm në fushë është trajneri Reja. 

Italiani po jep udhëzimet e fundit para sfidës përballë Islandës dhe duket se më i përqëndruar është tek kapiteni Elseid Hysaj, i cili sot do të ketë gjithë peshën e krahut të majtë. Ndërkohë nuk mungojnë as bisedat miqësore mes lojtarët të Shqipërisë dhe atyre të Islandës.

Futbollistët e Shqipërisë sapo kanë mbërritur në 'Elbasan Arena', ku do të luajnë përballë Islandës. Në fakt islandezët janë treguar më 'strikt' pasi kanë ardhur 5 minuta më herët në stadium. 

Gjithsesi të dyja ekipet sonte janë të motivuara për rezultat, edhe pse për Shqipërinë sot fitorja është detyrim nëse do të duhet të vazhdojë ëndrrën për t'u kualifikuar në EURO 2020 siç deklaroi një ditë më parë dhe trajneri Edy Reja.

Janë publikuar formacionet e ndeshjes Shqipëri- Islandë dhe janë 6 ndryshime në krahasim me ndeshjen ndaj Francës. Siç Eduardo Reja paralajmëroi, Shqipëria reshtohet në një formacion tipik italian 3-5-2, dhe Mavraj ulet në stol për t'ia lënë shiritin e kapitenit Elseid Hysaj. 

Në portë Reja i beson Thomas Strakoshës, ndërsa ajo çfarë bie në sy është mbrojtja. Berat Gjimshiti, Ismajli dhe Dërmaku i cili zëvendëson Mavrajn do të kenë çelësat e mbrojtjes përballë Islandës. Nga krahët do të luajnë Elseid Hysaj në të djathtë dhe në të majtë një lojtar me mjaft eksperiencë si Ermir Lenjani. 

Mesfusha është tepër cilësore pasi në këtë ndeshje shkatërrues do të luajë Klaus Gjasula, i cili la mbresa nga ndeshja me Francën, edhe pse u aktivizua gjatë pjesës së fundit. Ndërsa Memushaj dhe Bare do të jenë ata të cilët do të duhet të organizojnë lojën. 
Sulmi ndryshe nga ndeshja me Francën ku luajti vetëm Bekim Balaj, tani do të tentohet gjithçka, me Rey Manajn dhe Sokol Cikalleshin. Reja i ka besuar dy sulmuesave tipikë qendrorë për ndeshjen e cila do të vendosë fatet. Shqipërisë pa dyshim i duhet fitore.

Burime nga Federata Shqiptare e Futbollit bëjnë me dije për Report Tv se më pak se dy orë para fillimit të ndeshjes janë shitur 8 mijë bileta. Elbasan Arena do të jetë me siguri i mbushur në 2/3 e tij. 

Gjithsesi kjo nuk është një shifër përfundimtare pasi ka dhe më pas se dy orë kohë që shqiptarët të mbushin sot stadiumin e Elbasanit, për të mbështetur kombëtaren e tyre. Koha e freskët i favorizon që të ndjekin një ndeshje të nivelit të lartë për kualifikueset e EURO 2020 shtojmë dhe rëndësinë e ndeshjes e cila është vendimtare për fatin e këtyre eleminatoreve për Shqipërinë. 

Përballë kanë Islandën dhe kuqezinjve i duhet me patjetër një fitore. Barazimi është i barazvlerfshëm me një humbje pasi tre ekipet të cilat Shqipëria ka ''mbi kokë'' janë 6 pikë larg.