Kërkesa drejtuar qeverisë, Basha mbështet Dhomën Amerikane të Tregtisë: Ka të drejtë, të shtohen fondet

TIRANE-Kryetari i PD-së, Lulzim Basha ka reaguar duke mbështetur kërkesën e Dhomës Amerikane të Tregtisë drejtuar qeverisë për të ndihmuar edhe biznesin e madh në luftën kundër koronavirusit. Lideri demokrat ka ripërsëritur kërkesën për qeverinë që të të rialokojë fondet e vendosura në buxhet për PPP-të, nga shpenzimet operative si edhe nga investimet publike dhe ti vërë ato në funksion të nevojave shëndetësore dhe ekonomike.

"Shqetësimet dhe propozimet e Dhomës Amerikane të Tregtisë janë të drejta. I kam kërkuar qeverisë angazhimin e të gjitha resurseve ekonomike në buxhet për të mbështetur biznesin nga vështirësitë e shkaktuara prej pandemisë. Qeveria shqiptare duhet të rialokojë fondet e vendosura në buxhet për PPP-të, nga shpenzimet operative si edhe nga investimet publike dhe ti vërë ato në funksion të nevojave shëndetësore dhe ekonomike.

Fondet e shpallura nga qeveria prej 50 milionë euro në total për 3 muaj, për shtresat në nevojë, pagat e biznesit të vogël dhe pagesën e papunësisë, nuk i mbulojnë nevojat e krizës. Pas shëndetit, ekonomia duhet të jetë prioritet absolut i qeverisë. Shqipëria ka nevojë për masa gjithpërfshirëse dhe jo fjalë. Koha është tani, sepse çdo vonesë do kushtojë shtrenjtë" shkruan Basha.

TAG:
• edi rama
• lulzim basha
• dhoma amerikane e tregtise
• koronavirusi ne shqiperi