Forcat ajrore ukrainase kanë bombarduar rrugën që lidh Selydovën me Pokrovskin për të bllokuar forcat ruse. Buletini i fundit nga Forcat e Armatosura të Kievit thotë se "forcat e Mbrojtjes po ndërpresin rrugët logjistike të përdorura nga armiku për t'iu afruar Pokrovskit." Deklarata ushtarake shpjegon se "pas një sulmi ajror, rruga që lidh Selydovën me Pokrovskin u shkatërrua. Si rezultat, rusët kanë humbur aftësinë për të përdorur këtë rrugë për të infiltruar Pokrovskun me automjete të lehta."

Në zona të tjera, sipas buletinit, forcat ukrainase po vendosin pengesa shtesë mekanike dhe komanda ruse thuhet se po dërgon "skuadra vetëvrasëse" atje për t'i larguar ato. Sektori më i vështirë i frontit mbetet kështu Pokrovski, konfirmon zëdhënësi i Gardës Kombëtare Ruslan Muzychuk, ku po regjistrohet intensiteti më i madh i luftimeve dhe sulmeve ajrore, njëmbëdhjetë vetëm në 24 orët e fundit. Pokrovski është një nga fortesat e fundit ukrainase në rajonin e Donetskut dhe rënia e tij do të hapte një çarje në vijën e fortifikimeve të ndërtuara nga ushtria e Kievit pas përleshjeve të vitit 2014 me separatistët pro-rusë.

Nga ana tjetër, Moska thotë se ushtarët e  saj, i kanë dhënë fund rrethimit pranë Dimitrovit, në Donetsk. Eksperti ushtarak Andrey Marochko deklaroi për agjencinë TASS, se trupat ukrainase janë të rrethuara plotësisht dhe nuk mund të largohen nga qyteti. "Rrethimi pranë Dimitrovit është praktikisht i mbyllur. Ukrainasit janë të rrethuar", tha ai.

Ukraina së shpejti pret të marrë sisteme të reja të mbrojtjes ajrore dhe avionë luftarakë nga aleatët e saj, veçanërisht Franca. "Vendimet përkatëse tashmë janë duke u përgatitur: kjo do të jetë një marrëveshje historike", raportoi RBC-Ukrainë, duke cituar fjalimin e mbrëmjes të Presidentit ukrainas Volodymyr Zelensky. Udhëheqësi ukrainas më pas kujtoi se këtë javë shtetet nordike dhe baltike ranë dakord të ndajnë 500 milionë dollarë për programin PURL, i cili do t'i sigurojë Ukrainës armë amerikane. Kjo do të ndihmojë ndjeshëm në pengimin e sulmeve ruse. "Ne po përgatisim gjithashtu," siguroi ai, "dorëzimin e sistemeve të tjera të fuqishme të mbrojtjes ajrore: ne po përgatisim një marrëveshje të fortë me Francën dhe do ta finalizojmë atë së shpejti. Jam i bindur se e jona është një marrëveshje historike."