Shembja e urës izolon 10 fshatra në Kolonjë, banorët në protestë! Në izolim edhe 6 fshatra në Dropull! Osumi, Semani e Ishmi dalin nga shtrati, përmbytin tokat

I gjithë territori i Qarkut Kukës vijon të jetë i përfshirë nga reshjet e shiut me intensitet të ulët deri mesatar. Për shkak të reshjeve, akset rrugore nacionale vijon rënia e gurëve, dherave dhe materialeve inerte.

Rëniet e gurëve dhe vërshimet e ujërave paraqiten më shqetësuese në disa segmente të rrugëve nacionale të Tropojës. Subjektet kontraktore janë në terren për pastrimin e tombinave dhe eliminimin e problematikave të hasura, kryesisht në akset, Bajram Curri - Fierzë,Dushaj - Lekbibaj, Bajram Curri - Valbonë.

Të gjitha akset nacionale në nivel qarku janë të qarkullueshme. Ndërkohë disa zona ka ndërprerje të energjisë elektrike: në Nj.Adm. Qendër Krumë, fshati Zahrisht Bashkia Has, Nj.Adm. Golaj, fshatrat Helshan, Kosturr, Perollaj.Tropojë, Nj.Adm. Bytyç,fshatrat Kam, Leshniq, Kepenek, Zherkë, Nj.Adm. Llugaj,fshatrat Bukovë, Demaliaj, Beg Pac.

Reshjet e dendura të ditëve të fundit kanë sjellë rritje të ndjeshme të rezervave hidrike në kaskadën e Drinit. Niveli i liqenit të Fierzës ka shkuar në 276.58 metra, ndërsa prurjet mesatare në hyrje janë rreth 430 m³/s.

Megjithatë, pavarësisht rritjes së prurjeve, Heci i Fierzës nuk po prodhon energji elektrike, pasi asnjë nga katër agregatët nuk është aktualisht në punë.

Niveli i lumit Vjosa pranë Urës së Mifolit në Vlorë është rritur sërish në kuotat 6.75. Lumi ka dalë nga shtrati te pjesa e pazarit. Reshjet kanë bërë që të rritet edhe niveli i lumit Shushicë. 

Në bashkinë Sarandë, ka pasur reshje shiu me intensitet mesatar, ndërsa po vijohet puna për rregullimit e argjinaturës së çarë në Çukë-Bërdënesh. 

Në Delvinë, po punohet për urën provizore që lidh Delvinën me fshatrat Lefterhor. Kakodhiq, Sopot si dhe pastrimet e rrugëve nga prezenca e gurëve. Ndërkohë, 4 banesa në fshatin Vllahat rrezikohen nga rrëshkitja e tokës. 

Ndërsa në Bashkinë Finiq, po vazhdon puna për hapjen e rrugëve rurale në fshatrat Leshnicë e Poshtme dhe Leshnicë e Sipërme si edhe Kostar e Brajlat.

Foto: Lumi Osum, Berat

Prej më shumë se një jave vendi ynë është përfshirë nga reshjet e dendura të shiut. Po si paraqitet sot situata në qarkun e Beratit?

Sipas informacioneve autoritetet lokale bëjnë me dije se:

Lumi Osum prej pasdites së djeshme ka filluar ngritje graduale të nivelit. Nga prurjet lumi ka pësuar dalje nga shtrati në fshatin Veterrik në pikën e daljes javën shkuar ku ka përmbytur toka bujqësore rreth 30-40 ha.

Momentalisht niveli i lumit Osum është drejt rënies.

Lumi Devoll, nga EC Kuçovë për shkak të shkarkimeve me kuotë të ulet nga HEC Banjë, lumi ka prurje por është brenda shtratit të tij.

Për shkak, të prurjeve të të dy lumenjve, Osum dhe Devoll, niveli në lumin Seman ka pësuar rritje dhe ka dalje nga shtrati në fshatin Goriçan, NJA Kutalli Dimal, ju janë përmbytur toka bujqësore dhe disa hektar me sera bujqësore. Këto sipërfaqe tokash janë përmbytur edhe nga reshjet e ditëve të kaluara.

Qindra hektarë tokë bujqësore në fshatin Murqinë, Krujë ndodhet nën ujë pas daljes nga shtrati të lumit Ishëm, si pasojë e reshjeve të dendura të shiut.

“Kam falimentuar nga lumi, na ka përmbytur tokat. Çfarë kemi mbjellë si kemi korrur. Asnjëherë nuk kam marrë dëmshpërblim. Tokat janë të gjitha nën ujë”, tha Arben Troksi, banor i zonës.

“Gjendja është katastrofike. Del lumi sa herë bie shi, jemi në pikë të hallit. Kemi fëmijët për të çuar në shkollë, kemi njerëz të sëmurë. I bëjmë gjilpërat vet jemi bërë si në Mesjetë. Jemi të rrethuar dhe izoluar nga uji. Këtu është 1 metër ujë”, tha një banor tjetër për Report Tv.

Ndërkohë edhe një prej lagjeve të këtij fshati ka mbetur e izoluar pasi niveli i ujit në rrugë ka shkuar 40 cm.

Në vitet e kaluara kur vendi është përballur me situata të tilla, banorët e kësaj lagjeje janë evakuuar me gomone, teksa në raste të veçanta është dashur edhe ndërhyrja me helikopter.

OSHEE njofton se disa zona në Tiranë janë pa energji elektrike. Bëhet fjalë për zonat pranë TEG - Mjull Bathore, Mullet, Daias dhe Rolling Hills. Shkak është bërë një problem në fiderat e Nënstacionit Farkë.  OSHEE thotë se po punon për të riparuar linjat e djegura.

 "Probleme në fiderat e Nënstacionit Farkë, grupet e #OSSH janë duke punuar për riparimin sa më të shpejtë të linjave të dëmtuara (djegur). Tre fiderat e parë janë vendosur herët në punë përmes skemës unazë, ndërsa për tre fiderat e tjerë jashtë pune janë angazhuar teknikët e avarive. Aktualisht pa energji elektrike janë zonat pranë TEG - Mjull Bathore, Mullet, Daias dhe Rolling Hills.", njofton OSHEE.

Reshjet e 12 orëve të fundit në Gjirokastër shkaktuan bllokimin e aksit rrugor Kolonjë-Golem, duke izoluar me dhjetëra banorë të Golemit. Bllokimi erdhi për shkak të inerteve por tashmë është rihapur. 

Në Dropull, mbetet ende i pakalueshëm aksi Glinë-Nepravishtë. Edhe në Përmet, është izoluar rruga Frashër-Verçisht, Frashër-Miçan për shkak të shkarjeve të dherave. 

Ndërkohë vazhdojnë të jenë të izoluara fshatrat Peshkëpi e Sipërme, Peshkëpi e Poshtme, Radat, Vrahogoranxi dhe Glinë si pasojë e dëmtimit të urës. Banorët qarkullojnë me këmbë në rrugë alternative përmes Nepravishtës. Deri tani emergjencat nuk kanë asnjë masë përveçse bllokimit me inerte në të dy hyrjet e urës për të parandaluar qarkullimin me makinë për shkak të dëmtimit të konstruktit.