POP 5

Lajmet më të lexuara të 5 minutave të fundit

Arkiva

Kosova nuk është e gatshme të presë të dëbuarit nga BE

PRISHTINË, 15 Gusht/ATSH/.- Vala e emigrimit që ishte fundvitin e kaluar dhe në fillim të këtij viti, nuk ka ndalur shtetet evropiane që të bëjnë rikthimin në Kosovë të emigrantëve. Sipas statistikave të siguruara nga KosovaPress, rezulton që në Kosovë janë kthyer 7.554 emigrantë. Vetëm 13 janë kthyer nëpërmjet pikave kufitare tokësore, ndërsa 7.541 në […]
/ATSH/.- Vala e emigrimit që ishte fundvitin e kaluar dhe në fillim të këtij viti, nuk ka ndalur shtetet evropiane që të bëjnë rikthimin në Kosovë të emigrantëve.
Sipas statistikave të siguruara nga KosovaPress, rezulton që në Kosovë janë kthyer 7.554 emigrantë. Vetëm 13 janë kthyer nëpërmjet pikave kufitare tokësore, ndërsa 7.541 në pikat kufitare ajrore.
Nga këta vullnetarisht janë kthyer 4.295 persona apo 57 për qind emigrantë kosovarë, ndërsa 3.259 persona apo 43 për qind e emigrantëve janë kthyer me forcë. Statistikat e MPB-së tregojnë se moshat që kërkuan azil variojnë nga 18 deri në 34 vjeç, bënë të ditur KosovaPress.
Edhe statistikat e EUROSTAT tregojnë që vetëm në tremujorin e parë të këtij viti, numri i kosovarëve që në mënyrë ilegale kanë shkuar në vendet e Bashkimit Evropian është rritur në mënyrë të konsiderueshme, duke arritur shifrën prej rreth 50 mijë emigrantë.
Kjo ikje e madhe e kosovarëve në shtetet e Bashkimit Evropian mbetet brengosëse për drejtorin e Departamentit për Diasporë në Aleancën për Ardhmërinë e Kosovës, Jahja Lluka.
Mungesa e perspektivës, humbja e shpresës dhe moszhvillimi ekonomik, kanë bërë që shumica e kosovarëve të cilët emigruan, të shesin pronat e tyre, e kjo vetëm për të ikur nga Kosova.
"Ne e kemi parë dhe jemi dëshmitarë që mbi 100 mijë qytetarë të Kosovës, kryesisht rinia, kanë ikur në gjashtëmujorin e parë të këtij viti dhe në fund të vitit të kaluar. Kjo është brengosëse sepse ata shumë shpejt do të kthehen në Kosovë dhe do të sjellin edhe telashe të tjera, sepse një pjesë e mirë e tyre edhe i kanë shitur pronat vetëm për t'u larguar nga Kosova. Arsyeja është shumë e thjeshtë mungesa e perspektivës, humbja e shpresës, moszhvillimi ekonomik", tregon Lluka.
Në mesin e këtyre të dhënave të nxjerra nga Statistikat e Ministrisë së Punëve të Brendshme (MPB) rezulton që meshkujt ishin ata të cilët kërkuan azil më shumë se sa femrat. Kurse të rinjtë ishin ata që prinin në kërkesat për azil. Statistikat e MPB-së tregojnë se moshat që kërkuan azil sillen nga 18 vjeç deri në 34 vjeç.
Për këtë, Lluka thotë se rinia kosovare nuk po mund të depërtojë në tregun e punës. Ai thotë se për të kthyer rininë në vend të punës duhet një plan zhvillimor për Kosovën. Sipas Llukës mbetet shqetësues edhe fakti se si Qeveria e Kosovës do të arrijë të menaxhojë situatën me të kthyerit emigrantë në Kosovë, të dëbuar nga vendet e BE-së.
"Tregu i punës në Kosovë, rinia jonë e re nuk mundet të depërtojë në punë dhe rritja ekonomike e cila po paralajmërohet diku rreth 3 për qind, nuk mund ta krijojë mundësinë që këta njerëz të gjejnë vende të punës. Për ta sjellë këtë rini në vende të punës duhet një plan tjetër zhvillimor për Kosovën, i cili do t'u sjellë njerëzve një perspektivë dhe një shpresë për të qëndruar në Kosovë. Kthimi i dhunshëm i azilantëve apo njerëzve që ilegalisht kanë migruar nëpër shtetet e Evropës, nëpërmjet Hungarisë dhe Serbisë me siguri do t'i sjellë shumë telashe Kosovës dhe Kosova s'e di sa do të jetë e përgatitur për t'i mirëpritur", tha Lluka për KosovaPress.
Në të dhënat e publikuara nga organizata për statistikat e Komisionit Evropian, EUROSTAT në qershor të këtij viti, rezulton se 185 mijë persona kanë kërkuar azil për herë të parë në Bashkimin Evropian gjatë tremujorit të parë të vitit 2015-të. Kosovarët janë ata që kryesojnë, të pasuar nga sirianët dhe afganët.

/Shqiptarja.com
  • Sondazhi i ditës: 10 Janar, 11:51

    A duhet të çojë SPAK Berishën përpara Gjykatës për masakrën e 21 janarit?

Lajme të tjera



×

Lajmi i fundit

SHBA-ja sanksionon industrinë serbe të naftës për shkak të pronësisë ruse

10 Janar, 17:21