Emri i Lea Ypit u përfol shumë ditët e fundit  si një nga figurat e mundshme për drejtimin e një qeverie teknike, të kërkuar nga Partia Demokratike. Pas këtyre përfoljeve, Ypi ka reaguar përmes një mesazhi publik, duke bërë të ditur largimin e saj nga Shqipëria dhe shprehur zhgënjim për mënyrën si u trajtua në hapësirën publike.

“Mirupafshim Shqipëri. Llaçin e shpifjeve dhe pluhurin e konspiracioneve biografike, ideologjike, gjeopolitike, sociale, materiale e sa e sa të tjera që më kanë dëgjuar veshët e parë sytë për veten këto ditë, t'i kam lënë në derë”, shkruan Ypi.

Në reagimin e saj, ajo flet për klimën e debatit publik dhe përhapjen e teorive e akuzave në rrjete sociale dhe media, duke e cilësuar këtë si një realitet që ushqehet nga “hiçi dixhital e mediatik”.

"Në fund të fundit hiçi dixhital e mediatik mbi diçka duhet ngritur që atij grushti logosh ku tek asgjëja çlirohet vetmia, trishtimi, mllefi, dështimi, varfëria e mendimit, shfrytëzimi, paburrëria, ti mbushet mendja se mbase diçka është" thotë ajo

Në reflektimin e saj, Ypi përdor edhe një metaforë për gjendjen e botës sot, duke e krahasuar me “labirintin e minotaurit”, ku, sipas saj, njerëzit kërkojnë rrugëdalje nga krizat dhe përbindëshat e dukshëm e të padukshëm.

“Ndoshta secili mban në dorë një pjesë nga filli i Ariadnes, mjafton që duart të bashkohen dhe njerëzit të rigjejnë kuptimin e të qenit njeri”, shkruan ajo.

Në fund, Ypi falënderon të gjithë ata që, sipas saj, “shtrënguan dorën” në këtë periudhë në Shqipëri, duke e mbyllur mesazhin me një përshëndetje lamtumire për vendin.

Postimi i Lea Ypit në Facebook