TIRANË- Për herë të parë, kryeministri Edi Rama, me një mesazh publik drejtuar qytetarëve, ka reaguar në lidhje me kërkesën e SPAK për arrestimin, e një prej bashkëpunëtorëve të tij më të ngushtë, siç edhe ai e quan, ish-ministrin e ish-zv.kryeministrin, Arben Ahmetaj.

'Arben Ahmetaj nuk është as një njeri i panjohur dhe as një bashkëpunëtor i largët për mua. Ai është një ndër bashkëpunëtorët me të cilët jam takuar më shumë, kam komunikuar më shumë në telefon, kam diskutuar më shumë për shumë nga vendimmarrjet tona gjatë këtyre viteve.'- tha Rama.

Kreu i qeverisë, i cili votoi sot në Kuvend, pro kërkesës së SPAK për arrestimin dhe kontrollin e banesës së Ahmetajt, tha se iu vu para një dosje e një punë voluminoze hetimore, ku kishte dyshime të mjaftueshme që mos të pengonin prokurorinë për të kryer kontrolle e lejuar arrestimin e ish-ministrit. Ndryshe nga sa veproi me ish-ministrin e Brendshëm Saimir Tahiri, në 2017, kur PS nuk pranoi kërkesën e prokurorisë për heqjen e mandatit të deputetit, pasi sipas Ramës prokuroria nuk kishte bërë asnjë hetim, këtë herë, shtoi kreu i qeverisë, ishte një rast kur kërkesa e prokurorisë duhej miratuar pa asnjë ndryshim. Tani, tha Rama, drejtësia do të thotë fjalën e fundit.

'Ndryshe nga atëherë, kur Prokuroria erdhi në Kuvend si lexuese gazetash të mëngjesit, pa bërë asnjë hetim, këtë herë na u vu përpara dosja e një pune voluminoze hetimore. Në mos e provoftë fajësinë e deputetit, çka mund dhe do ta thotë vetëm gjykata, ajo dosje krijon përshtypjen se ka dyshime të mjaftueshme, për të mos e ndaluar autorizimin e kërkuar nga SPAK-u për Kuvendin.'- tha Rama.

Siç ka bërë edhe më parë, kryesocialisti përsëriti sërish mesazhin e tij, se Partia Socialiste nuk mban mbi shpinë askënd që abuzon me pushtetin, për të fryrë xhepat e tij me anë të pushtetit. Për kryeministrin Rama, kush ngatërron rrugën e nuk punon për shtetin, por për xhepin e tij, do të marri përgjegjësinë vetë. Sipas Ramës, atyre që kanë zgjedhur të bashkudhëtojnë me të në këtë rrugë të pushtetit, nuk do t'i mbrojë, nëse ata abuzojnë me pushtetin. Rama u shpreh se nuk zgjedh asnjë bashkëpunëtor për të mos e lëshuar, kur ai e lëshon veten jashtë rrugës së përbashkët.

'Prandaj po e përsëris edhe njëherë sot për të gjithë familjen tonë politike, atë që e kam thënë me fjalë të tjera disa herë më parë, po e kam stërthënë shumë herë, qysh ditën e parë të hyrjes në këtë godinë, në të gjitha mbledhjet e takimet e të gjitha niveleve të qeverisjes, se kush e ngatërron rrugën e përbashkët me një rrugë ku bën dy punë, edhe për shtetin edhe për xhepin, merr një përgjegjësi që nuk e ndan dot as me mua, as me ne, po duhet ta mbajë vetë, qoftë kur del para pasqyrës, qoftë kur sheh lart nga Zoti, apo qoftë kur i bie të gjendet para derës së drejtësisë.'- tha Rama.

Një mesazh, Rama e kishte edhe për kundërshtarët e Reformës në Drejtësi! Për kryeministrin Edi Rama, ata që duhet të ishin opozita e këtij vendit, janë turpi dhe mallkimi i vjetër më shumë se një shekullor i Shqipërisë.

Sot nuk është dita, shtoi Rama, për të thënë të metat e Reformës në Drejtësi, por është dita për t’u kujtuar të gjithëve se çfarë po ndodh me luftën kundër kundër korrupsionit të zyrtarëve të lartë e faktin se për herë të parë në Shqipëri të pushtetshmit po humbasin pushtetin mbi drejtësinë. Kjo, nënvizoi, kreu i qeverisë se ka zanafillën nga vullneti i PS-së për t’i hyrë detit në këmbë, në kërkim të një drejtësie për Shqipërinë, për shqiptarët dhe me shqiptarët.

SPAK kërkon arrestimin e ish zv/kryeministrit Arben Ahmetaj, të cilin po e heton për tre akuza “mosdeklarim, deklarim të rremë dhe fshehje të pasurisë”, vetëm dhe në bashkëpunim, “Korrupsion pasiv të funksionarëve të lartë shtetërorë ose të zgjedhurve vendorë” në gjashtë raste, “Pastrimit të produkteve të veprës penale ose veprimtarisë kriminale”. Bëhet fjalë një dosje voluminoze ku krahas Ahmetajt ka dhe persona të tjerë të përfshirë dhe nuk është çudi që SPAK të mund të kërkojë masa dhe për persona të tjerë, mes tyre dhe biznesmenë.

Rendit zhvillimet sipas orarit:
Ora 19:20
Rama: S’është dita për të treguar të metat e Reformës në Drejtësi, por faktin që të pushtetshmit po humbasin pushtetin në drejtësi

 

Në fjalën e tij drejtuar qytetarëve, kryeministri Edi Rama tha se sot nuk është dita, për të thënë të metat e Reformës në Drejtësi, por është dita për t’u kujtuar të gjithëve se çfarë po ndodh me luftën kundër kundër korrupsionit të zyrtarëve të lartë e faktin se për herë të parë në Shqipëri të pushtetshmit po humbasin pushtetin mbi drejtësinë. Kjo, nënvizoi, kreu i qeverisë se ka zanafillën nga vullneti i PS-së për t’i hyrë detit në këmbë, në kërkim të një drejtësie për Shqipërinë, për shqiptarët dhe me shqiptarët.

‘Kjo nuk është as dita për t’i thënë dobësitë dhe të metat e punës së organeve të reja të drejtësisë, as për t’i shprehur shqetësimet mbi problematikat e mprehta të veprimtarisë së tyre të re. Kjo është dita për t’u kujtuar të gjithëve edhe njëherë, se gjithë çfarë po ndodh me luftën kundër korrupsionit të zyrtarëve të lartë dhe fakti se për herë të parë në historinë e Shqipërisë, të pushtetshmit po humbasin pushtetin mbi drejtësinë - përtej të tëra rezervave që të gjithë mund të kenë, për arsye të ndryshme, këndvështrime të ndryshme, SPAK-u, Gjykata Speciale - e ka zanafillën pikërisht tek kjo shumicë që qeveris vendin, tek vullneti i Partisë Socialiste të Shqipërisë, tek këmbëngulja e grupeve të saj parlamentare dje dhe sot, tek vendimmarrja jonë, më e guximshmja në historinë politike shqiptare të këtyre tre dekadave, për t’i hyrë detit në këmbë, në kërkim të një drejtësie për Shqipërinë, për shqiptarët dhe me shqiptarët. Të qartë se o i hyjmë ne, o kurrë nuk bëhet. Të bindur se vetëm ne mund t’i hyjmë dhe ta bëjmë.’- tha Rama.

M.Q./Shqiptarja.com

Ora 18:55
Rama mesazh 'matrapazëve' dhe 'armiqve të reformës': Jeni turpi dhe mallkimi i vjetër më shumë se një shekullor i Shqipërisë

 

Për herë të parë, kryeministri Edi Rama, me një mesazh publik drejtuar qytetarëve, ka reaguar në lidhje me kërkesën e SPAK për arrestimi e një prej bashkëpunëtorëve të tij më të ngushtë, siç edhe ai e quan, ish-ministrin Arben Ahmetaj.

Në fjalën e tij Kryeministri Edi Rama kishte dhe një mesazh kundërshtarët e reformës në drejtësi.

Ndërsa të tjerëve atyre që  njihen botërisht si armiqtë e reformës për drejtësi apo matrapazë publikë të luftës për drejtësi që janë në një garë të ethshme mes vedit për gjak, për baltosjen tonë nga të katër anët apo vetëngushëllim teksa era e nënvedit po i mbyt nga frika e drejtësisë u them se i mëshiroj dhe i mirëpres me durimin më të madh gjylet e baltës së tyre. Ata që duhej të ishin opozita e këtij vendi janë turpi dhe mallkimi i vjetër më shumë se një shekullor i Shqipërisë. Fatmirësisht nuk habisin askënd, mëkatarë të mëdhenj apo shpirtra të ndyrë me të cilët merret populli shqiptar si askush tjetër sa herë që dalin të kërkojnë vota, gjithnjë e më të humbur nën peshën e boshllëkut të tyre.

S.G/Shqiptarja.com

Ora 18:53
Rama ua thotë troç: Nuk zgjedh asnjë bashkëpunëtor për të mos e lëshuar kur ai lëshon veten

 

Kryeministri Edi Rama përcolli dhe një mesazh të qartë të gjithë socialistëve, atyre që kanë zgjedhur të bashkëudhëtojnë me të në këtë rrugë të pushtetit. Se nuk i mbron nëse ata abuzojnë me pushtetin

“Të gjithë bëjmë zgjedhjet tona dhe zgjedhja ime nuk ndryshon dot në asnjë mënyrë dhe për asnjë rast. Përsëris edhe një herë sot, për familjen politike atë që e kam thënë disa herë më parë dhe stërthënë qyshherë në këtë godinë se kush e ngatërron rrugën e përbashkët me një rrugë që bën dy punë edhe me shtetin edhe me xhepin merr përgjegjësi që nuk e ndan dot as me mua as me ne, por duhet ta mbajë vetë, qoftë kur del para pasqyrës, qoftë kur sheh lart nga Zoti apo kur i bie derës para drejtësisë.

Ua them troç, dhe e rithem publikisht nuk zgjedh asnjë bashkëpunëtor për të mos e lëshuar kur ai lëshon veten jashtë rrugës së përbashkët por bashkëpunëtorin e zgjedh për të mos lëshuar rrugën dhe njerëzit që na kanë zgjedhur të gjithëve ne në këtë rrugë.”

S.G/Shqiptarja.com

Ora 18:44
Rama për Arben Ahmetajn: Na u vu para një dosje voluminoze, s’mund të ndalonim SPAK për arrestimin e tij

Kryeministri Edi Rama ka folur për herë të parë për votimin e Kuvendit për ti hapur rrugë SPAK për arrestimin e Arben Ahmetaj. Kryeministri Edi Rama tha se iu vu para një dosje voluminoze dhe nuk mund të ndalonin SPAK që të kryente arrestimin e ish-ministrit.

'Ndryshe nga të tëra historitë e tjera të suksesit të politikës dhe qeverisjes, kjo histori është e vështirë të tregohet si sukses, me statistika e me krenarinë legjitime për rezultatet e arritura, sepse bëhet fjalë për njerëz të ndaluar, hetuar, gjykuar a dënuar, të cilëve ndodh t’u kesh njohur familjarët, përqafuar fëmijët apo prindërit, ngushëlluar vdekje apo uruar ditëlindje.

Arben Ahmetaj nuk është as një njeri i panjohur dhe as një bashkëpunëtor i largët për mua. Ai është një ndër bashkëpunëtorët me të cilët jam takuar më shumë, kam komunikuar më shumë në telefon, kam diskutuar më shumë për shumë nga vendimmarrjet tona gjatë këtyre viteve.

Nuk më takon mua të them nëse Arben Ahmetaj është fajtor apo i pafajshëm, por ndryshe nga një rast i disa viteve më parë, kur ishim të bindur se kërkesa e prokurorisë duhej kufizuar dhe ashtu bëmë, rasti i sotëm ishte një rast kur kërkesa e prokurorisë duhej miratuar pa asnjë ndryshim. Sepse ndryshe nga atëherë, kur Prokuroria erdhi në Kuvend si lexuese gazetash të mëngjesit, pa bërë asnjë hetim, këtë herë na u vu përpara dosja e një pune voluminoze hetimore. Në mos e provoftë fajësinë e deputetit, çka mund dhe do ta thotë vetëm gjykata, ajo dosje krijon përshtypjen se ka dyshime të mjaftueshme, për të mos e ndaluar autorizimin e kërkuar nga SPAK-u për Kuvendin.

Këtu mbyllet çdo koment i imi mbi rastin konkret. Tanimë është në dorën e drejtësisë të na e tregojë deri në fund në është një rast fajësie apo pafajësie, por nuk mbyllet këtu ky mesazh, sepse më duket e udhës t’i rivendos edhe disa pika mbi “i”, për këtë rrugë që vazhdon me bekimin e shumicës së shqiptarëve. Kjo që kam zgjedhur, që ne, shumica politike e këtij vendi kemi zgjedhur, është një rrugë e përbashkët, ku të përbashkëta janë arsyet e mirëkuptuara, qëllimet e shpalluara, përpjekjet e bashkërenduara, po të përveçme, personale, janë përjetimet e fuqisë që i është dhënë një individi, çdo individi përkohësisht për të marrë vendime, të ndryshme janë virtytet e dobësitë njerëzore të secilit, raportet me veten, karrigen, paranë.'- tha Rama.

M.Q./Shqiptarja.com

Ora 18:41
Rama i prerë për Ahmetajn: Familja jonë nuk mban mbi shpinë askënd, e sidomos ata që fryjnë xhepat me anë të pushtetit

I prerë ka qenë kryeministri Edi Rama me një mesazh të fortë, të thellë e të qartë fillimisht për reformën në drejtësi dhe për gjykimin e ish zv kryeministrit Arben Ahmetajt, ish numrit dy të qeverisë së tij. Rama tha se para ligjit PS nuk mbron askënd, asnjë që fryn xhepin me buxhetin e shtetit.

'Sot ne votuam një kërkesë të SPAK-ut për të autorizuar arrestimin e një deputeti, i cili ka mbuluar detyra të rëndësishme në qeveritë tona, si ministër dhe zv.kryeministër!

Ky i zyrtarit më të lartë shqiptar që gjermësot ka përfunduar në rrjetën hetimore të SPAK-ut, ishte një tjetër test për ne, si nismëtarët e Reformës në Drejtësi, kur ishim në opozitë, udhëheqësit e saj të vendosur kur erdhëm në qeveri dhe garantët e saj të palëkundur që kur Reforma u miratua e hyri në rrugën e zbatimit të saj.

Kush më ka dëgjuar, qysh në krye të herës besoj duhet ta mbajë mend se e kam kërkuar me shumë ngulm këtë reformë. Kur kam thënë se nuk duam një tjetër arrnë nga ato të mëparshmet për drejtësinë, po duam një përmbysje të sistemit të vjetër të drejtësisë, e kam menduar shumë mirë çka flas dhe kam folur pikërisht atë që kam menduar.

Kur kam folur për sistem të vjetër, nuk kam pasur parasysh vetëm kalbësirën kutërbuese të drejtësisë gjasme demokratike të çerek shekulli tranzicion, ku pandëshkueshmëria ishte kthyer në një normë poshtëruese për shqiptarët e për Shqipërinë. Po kam pasur parasysh edhe vetë kulturën mjerane të një drejtësie të egër për njeriun e zakonshëm dhe të një drejtësie të gjunjëzuar para njeriut të veshur me pushtet, kulturë që  rrënjët i ka të shtrira qysh nga dita e parë e krijimit të shtetit shqiptar dhe deri vonë në ditët tona sepse asnjëherë, që nga viti 1912 dhe deri në vitet kur ne, Partia Socialiste e Shqipërisë, i hymë detit në këmbë, për ta nxjerrë matanë Reformën në Drejtësi, nuk kishte bërë kurrë vaki, që një shkelës ligji me pushtet, të trajtohej nga drejtësia si një njeri i zakonshëm në shkelje të ligjit.

Rasti i vetëm në memorien historike të 33 vjetëve nga rënia e sistemit të drejtësisë proletare, kur një njeri me pushtet është dënuar nga gjykatat e këtij vendi, ai i ish-kryeministrit Fatos Nano ishte në fakt, rasti i fundit i traditës shtetërore shqiptare, të persekutimit dhe burgosjes politike të një kundërshtari të pushtetit arbitrar të radhës, që nga koha e përpara mbretërisë e deri shumë vonë.

Periudha e diktaturës komuniste ishte pastaj shëmbëlltyra më e përbindshme e asaj kulture barbarie të drejtësisë sipas oreksit të të parit.

Kur kam thënë se nuk duam një reformë për ta vënë drejtësinë nën kontrollin e një pale kundër tjetrës, po duam një drejtësi të re, të pavarur nga pushteti i politikës, të aftë për ta luftuar korrupsionin e niveleve më të larta dhe krimin e organizuar, të ndershme në hetimet e gjykimet e saj, pavarësisht ngjyrave partiake, lidhjeve klanore, tundimeve korruptive, nuk kam qenë vetëm lideri i opozitës, po kam qenë edhe kryeministri i Shqipërisë.  Nuk kam folur për të qenë në rregull me manualin e komunikimit të kryetarit të qeverisë, si paraardhësit e mi.

As nuk jam mjaftuar me fjalët e mëdha për nevojën e Reformës në Drejtësi pa vepruar, por jam përpjekur papushim, për ta miratuar atë edhe me koston e prishjes së qeverisë së koalicionit aso kohe, e pse jo edhe të humbjes së pushtetit, po të ishte nevoja dhe për ta mbështetur atë pa asnjë bishtnim karshi qëllimit të saj të madh, edhe kur ndodh që ajo të veprojë në mënyrë jo fort bindëse në ndonjë rast të caktuar. 

Nuk jam përpjekur thjesht për korrupsionin e nivelit të lartë të atyre që dje në qeveri grabitën sa mundën dhe sot në opozitë baltosin sa mundin pa u hyrë ende as edhe një gjemb në këmbë, po e kam pasur edhe për nivelin e lartë të qeverisjes sonë sigurisht sepse mua këtë mision ma kanë besuar shqiptarët dhe përpara atyre, qoftë atyre që më kanë zgjedhur apo qoftë atyre që nuk më kanë zgjedhur për ta udhëhequr këtë përpjekje historike në të mirë të të gjithëve, për këtë vend të bekuar nga dora e Zotit dhe të penguar kaq gjatë nga dora e robit, unë nuk pajtohem dot me askënd që e abuzon këtë besim, duke e kthyer mandatin e shqiptarëve, të votuesve tanë dhe besimin tim gjithashtu, në një mundësi të palejueshme për të fryrë xhepin, duke punuar për shtetin.

Për hir të këtij misioni dhe për t’u kthyer shqiptarëve, me sa fuqitë e mia ma lejojnë, nderin e jashtëzakonshëm që më kanë bërë duke më besuar udhëheqjen e këtij vendi, unë jam gati të mbaj pa asnjë ankim baltën e pambarimtë që kundërshtarët e të gjitha llojeve më hedhin çdo ditë padrejtësisht fytyrë e në gjoks prej vitesh, por nuk kam qenë, nuk jam, e nuk do të jem kurrë gati, të mbaj në shpinë bashkë me Partinë Socialiste, askënd që e kujton gabimisht shpinën e madhe të kësaj familjeje politike, kurrizin e një kali që mund ta kalërojë për të shirë për vete, në lëmin e pushtetit të marrë nga populli.

Kur kam thënë se dua një drejtësi që të shohë drejt, pa i ulur sytë as përballë të majtës e as përballë të djathtës, që të ecë drejt, pa marrë anë, që të godasë drejtësisht, pa i matur çështjet me peshoren e politikës, e kam ditur mirë edhe çfarë them, e kam ditur mirë edhe çfarë vjen.

Natyrisht, t’i thuash këto, të përpiqesh me mish e me shpirt që kështu të ndodhë më në fund, në këtë tokë të etur për drejtësi, dhe më tej t’i shohësh të fillojnë të ndodhin kështu, gjërat për të cilat je përpjekur me të gjithë shumicën qeverisëse, nuk është, nuk ka sesi të jetë, e njëjta gjë sepse ndryshe nga çdo reformë tjetër transformuese, e cila në një mënyrë a një tjetër prek interesat e njerëzve, kjo e drejtësisë në veprim prek jetët e tyre dhe cënon edhe lirinë e njerëzve. E kur pastaj ndër këta njerëz, ndodh të jenë edhe persona me të cilët ke punuar deri edhe fare afër, ke ndarë kohë, mendime, sfida të përbashkëta, ditë të mira e të këqija, kjo histori bëhet shumë më e vështirë ta jetosh, se sa ta imagjinosh, ta planifikosh, ta krijosh me votë e ta garantosh me bindje në vazhdimësinë e saj.'- tha Rama.

G.MO/Shqiptarja.com