Lëngu i kockave, i cili shpesh herë është cilësuar si ilaçi i gjysheve është një ndër lëngjet më të pasuara me minerale. Nutricionisti Altin Joka i ftuar në emisionin “Rreze Dielli” në Report TV shpjegoi disa sekrete sesi duhet gatuar apo konsumuar ky lëng, si dhe ndau me shikuesit vlerat që ka për organizmin tonë.

“Lëngu i kockave është ndër përbërësit më të dënduar me lëndë ushqyese. Eshtë rigjenerues indesh sidomos kur gatuhet ngadalë në mënyrë që kolagjeni natyral të kthehet në xhel, dhe ndikon jashtëzakonisht në mukozën e zorrës, forcon nyjet si dhe përmirëson gjumin. Kjo ndodh sepse aminoacidet janë baza që gjenden tek kockat, ndërsa glicina përmirëson gjumin, forcon sistemin imunitar si dhe ndihmon lëkurën të mos plaket”, theksoi Joka.

Nutricionisti u ndal edhe në mënyrë të detajuar tek disa elementë të rëndësishëm që gjenden tek lëngu i kockave.

“Prolina, ndër pjesët kryesore të lëngut, ndihmon në rritjen e elasticitetit të lëkurës si dhe forcon indet. Arginina, përmirëson qarkullimin e gjakut si dhe ndikon tek hormonet. Lëngu i kockave ka gjithashtu shumë minerale si zink, hekur, etj, dhe kjo e bën të përdoret si ushqim në spitale, tek fëmijët që janë në rritje si dhe për nënat që janë në gji”, shpjegoi Joka.

Nutricionisti tha gjithashtu se lëngu i kockave ka peptide me veti antinflamatore, acid hialuronik, kolagjen të tipit 1, 2, 3 si dhe është një detoksifikues shumë i mirë duke ndikuar edhe në mbarëvajtjen e sistemit tonë imunitar.

Por ja çfarë duhet të dini për llojin e kockave dhe vlerat e tyre në organizëm

Kockat e viçit kanë kolagjen të tipit 1 dhe 3

Kockat e pulës kanë kolagjen të tipit 2

Halat e peshkut kanë kolagjen të tipit 1

“Arkitekti i lëkurës është kolagjeni i tipit 1 që gjendet tek kockat e viçit dhe halat e peshkut. Ai ndikon në forcimin e tendinave, lëkurës, flokëve dhe thonjve. Është i pasur me kalcium dhe fosfor. Kolagjeni i tipit 2 gjendet tek kockat e pulës, ai ndikon në forcimin e kyçeve si dhe ndihmon zorrët dhe stomakun duke ulur fryrjet. Ndërsa tek kockat e peshkut gjendet kolagjen i tipit 1 që ndikon tek lëkura dhe tiroidja, por edhe në sistemin nervor, pasi ka jod dhe selen”.

Ja si duhet ta përgatisni në mënyrën e duhur lëngun e kockave që të merrni maksimalisht të gjitha vlerat!

Zjeria duhet bërë afatgjatë, kockat e viçit duhen zjerë nga 10 orë deri në 12 orë. Kockat e pulës duhen zjerë nga 6 deri në 10 orë. Kockat e qengjit duhen zjerë 7-8 orë, ndërsa peshku maksimumi 1 orë. Temperatura në të gjitha rastet duhet të jetë konstante 80-90 gradë, sepse kolagjeni shpërbëhet në xhelatinë duke çliruar aminoacidet dhe mineralet.

Njihuni me një mënyrë sesi përgatitet lëngu i kockave që kthehet në kolagjen

“Shtojini uthull molle sepse e ndihmon lëngun të bëhet më acid, por kujdes 1 lugë me uthull molle në 4 litra ujë dhe 4 kg kocka. Fillimisht kalojini në furrë kockat 20-35 minuta me temperaturë 80-90 gradë, shtoni pak hudhër, qepë, karrotë, rozmarinë dhe këto element më pas i vendosim edhe në zjerie”. 

Po vendosja në ngrirje me kubikë, a mund të rrezikojë shkatërimin e vlerave?

Sipas Jokës, nuk ndikon. Lëngu sa ftohet futet në ngrirje, bëhet në kubikë dhe kjo nuk sjell dëmtim të elementëve përbërës. Megjithatë mirë është të konsumohet i freskët sepse rritet niveli i histaminës dhe kjo ndikon tek zorrët. Lëngu i kockave konsumohet 1-2 gota në ditë, mund ta përdorin edhe ata që kanë probleme me kolesterolin, nuk është yndyrë trans siç është tek vajrat vegjetalë.

Në perfundim Joka theksoi se lëngu i kockave është i rëndësishëm për problemet e zorrëve, fryrjet, inflamacionin gastrointensinal, për artiritin, artrozën, gripin, ftohje, por edhe për flokët, aneminë, shqetësimet hormonale dhe për gjumin. Gjithashtu detoksifikon mëlçinë si dhe ul stresin.