BE-ja dha 50 mln euro për Shqipërinë për koronavirusin! Basha: Kërkova të shtohet ndihma për tre kategori

TIRANE-Kryetari i PD-së, Lulzim Basha përmes një video-mesazhi të shkurtër u shpreh se i kërkoi komisionerit për zgjerimin Oliver Varhelyi, që të shtojë ndihmën për Shqipërinë në luftën për të parandaluar përhapjen e koronavirusit.

Lideri demokrat thotë se Shqipëria është një vend me nivel të lartë varfërie dhe e ka të domosdoshme mbështetjen për familjet në nevojë, për shtresat në nevojë, për biznesin dhe për ekonominë. Lulzim Basha tregon edhe dy nga rrugët si mund të ndihmojë Brukseli Shqipërinë, përveç 50 mln eurove që dha.

Në video-mesazh, kryedemokrati thotë se i kërkoi Varhelyit, që të rialokojë fondet brenda instrumentit të paraaderimit, që njihet si IPA, por edhe përmes instrumenteve të tjera, si Banka Europiane e Investimeve dhe Banka Europiane për Rindërtim dhe Zhvillim.

"Sapo përfundova një video-konferencë me Komisionerin për Zgjerimin në Bashkimin Europian, Oliver Varhelyi. E falenderova atë dhe Bashkimin Europian për shprehjen e vullnetit pozitiv për hapjen e negociatave me Shqipërinë, pas përmbushjes së 15 kushteve. E garantova se opozita, Partia Demokratike dhe unë personalisht, do të bëjmë gjithçka që është në dorën tonë për të kontribuar për plotësimin e këtyre kushteve.

Plotësimi i 15 kushteve dhe zbatimi i reformave të nevojshme për këtë, do të sjellin jo vetëm hapjen e negociatave, por edhe forcimin e shtetit të së drejtës dhe rritjen e mirëqenies ekonomike për çdo familje shqiptare.

Komisionerin dhe Bashkimin Europian i falenderova edhe për ndihmën që i akorduan Shqipërisë për të përballuar pasojat e koronavirusit, dhe i kërkova të shohin çdo mundësi për ta shtuar këtë ndihmë, pasi përveç pamundësisë për plotësimin e nevojave në shëndetësi, Shqipëria është një vend me nivel të lartë varfërie dhe e ka të domosdoshme mbështetjen për familjet në nevojë, për shtresat në nevojë, për biznesin dhe për ekonominë.

I kërkova, po kështu, edhe mundësinë e rialokimit të fondeve brenda instrumentit të paraaderimit, që njihet si IPA, në drejtim të tre prioriteteve kryesore:

1. Mbështetje për shëndetësinë.

2. Mbështetje sociale për njerëzit në nevojë.

3. Mbështetje për biznesin dhe ekonominë shqiptare.

Po kështu i kërkova komisionerit të bëjnë gjithçka për të na ndihmuar edhe me instrumentet e tjera në dispozicion të Bashkimit Europian, si Banka Europiane e Investimeve dhe Banka Europiane për Rindërtim dhe Zhvillim.

Të dashur bashkëqytetarë!

Nuk jemi vetëm.

Pavarësisht ditëve të vështira që po kalojmë, të jeni besimplotë se ditë më të mira do të vijnë për ju, për familjet tuaja dhe për Shqipërinë" tha Basha. 

/r.k./Shqiptarja.com

TAG:
• lulzim basha
• koronavirusi ne shqiperi