Mark Marku lë mandatin e deputetit, shpërthen në akuza ndaj Berishës e Bashës: E shndërruan PD në parti që mbron interesat personale të dy liderëve të vet

Mark Marku nuk do të jetë pjesë e Kuvendit të ri, duke hequr dorë nga mandati i deputetit që e fitoi në qarkun  e Lezhës. I kontaktuar nga Report TV, Marku tha se këtë vendim e mori pasi nuk është dakord me vendimet e lidershipit të PD, Lulzim Basha. Marku ka shpërthur akuza të forta jo vetëm ndaj Lulzim Bashës por edhe ndaj Sali Berishës, për të cilët thotë se e kanë shndërruar Partinë Demokratike në një parti që vetëm mbron interesat personale të tyre, ndërsa në një editoriali për gazetën Panorama, ka listuar një sërë arsyesh se pse ndërmori këtë veprim që lidhet me etapat e njëpasnjëshme të rënies së vazhdueshme te PD-së në një rutinë humbëse dhe se Basha është thjesht "kryetar i partisë së Berishës".

Demokrati Mark Marku, i cili doli deputet i parë në qarkun e Lezhës në zgjedhjet e 25 Prillit shkruan se nuk do të marrë pjesë në mbledhjen e Këshillit Kombëtar të PD dhe as nuk do të jetë deputet në Kuvendin e ri, pasi partia po u shërben servilëve dhe kjo u pa si pas zgjedhjeve të 25 prillit, si në zgjedhjet brenda PD për kryetarin e ri, por edhe në Kuvendin e PD, ku askush nuk ngriti zërin për të thënë të vërteta por heshtën pas servilizmit që i bënë Bashës. Për Markun, fushata për zgjedhjen e kryetarit të PD,  ishte pa vizion dhe nuk solli asnjë platformë ndryshimi se si demokratët do të vijnë në pushtet. Ai pati kritika të forta edhe për Kuvendin e PD, ku tha se fjalimi i Bashës i la demokratët edhe më të paqartë në lidhje me vizionin e ri të partisë.

"Etapat e njëpasnjëshme të rënies së vazhdueshme te PD-së në një rutinë humbëse dhe se Basha është thjesht "kryetar i partisë së Berishës", PD po shndërrohet në një parti që mbron interesat personale të dy liderëve të vet, Berishës dhe Bashës dhe të një grupi të ngushtë drejtuesish të PD-së duke tradhtuar interesat e atyre që e kanë mbështetur me aq mund, përkushtim e sakrifica...Fushata për zgjedhjen e Kryetarit ishte  pa vizion, pa alternative pa perspektivë dhe rrugëdalje nga kriza dhe pa platformë ndryshimi për të sjellë demokratët në pushtet. Basha fitoi thjeshtë për rutinë dhe PD është parti ku secili avancon politikisht prej servilizmit ndaj kryetarit. Edhe në Kuvendin e PD shumë pak ngritën zërin dhe kjo më trishtoi. Aty u votuan njëherë propozimet e Bashës dhe më pas propozimet e tjera. edhe për kandidatët për Këshillin Kombëtar askush nuk kuptoi se si u përzgjodhën ata dhe kush i votoi. Për këtë arsye kam vendosur të mos marr pjesë në etapën e katër të një rutine të tillë humbëse. Madje, kam vendosur të mos e marr as mandatin e deputetit", shkruan ndër të tjera Marku.

Pas dorëheqjes së Mark Markut pritet që vendin e tij ta marrë Elda Hoti si më shumë e votuara në listën e deputetëve të PD-AN. Elda Hoti erdhi në listë si pjesë e koalicionit të PD, si kandidate e Partisë Republikane dhe renditej e 5-ta në listë me 2733 vota.

Kritikat e Marku Markut për PD, nisën që më 17 korrik në Kuvendin e PD,  i cili theksoi se PD-ja duhet të ndryshojë, pasi në të kundërtën rrezikon që të mbetet në opozitë edhe për 4 vitet e ardhshme, e ndërsa nuk i ka kursyer kritikat as për analizën e humbjes dhe as për propozimet e Bashës. Sa i përket analizës së humbjes, Marku tha se ajo është hartuar nga një nga përgjegjësit kryesor të humbjes, siç është Gazment Bardhi, e ndërsa sa i përket ndryshimeve në statut të propozuara nga Basha, deputeti tha se “janë propozime që në thelb s’kanë kurrfarë relevante për gjendjen ku ndodhemi”.

Edhe pa nisur sesioni i ri parlamentar të dalë nga zgjedhjet e 25 prillit 2021, 5 deputetë të zgjedhur hoqën dorë nga mandati i tyre. I pari ishte Tom Doshi, me pas 3 deputetët e zgjedhur nga PS, Gramoz Ruçi, dhe Najada Çomo dhe një nga PD Mark Marku.

Editoriali i plotë/ Mark Marku: Pse nuk do të shkoj në Këshillin Kombëtar të PD-së dhe as në Kuvendin e Shqipërisë

Dje, si është bërë e ditur edhe në publik, është lajmëruar mbledhja e Këshillit Kombëtar të PD-së, e cila do të mbahet më datë 30 gusht. Me sa shihet nga axhenda e dërguar, nga kjo mbledhje do të dalin organet drejtuese të PD-së, që, sipas statutit, zgjidhen nga ky këshill. Përves kësaj, në axhendë nuk parashikohet asgjë tjetër. Është dëshpëruese të vëresh se ngado ta shqyrtosh çështjen, të gjitha aksionet politike të përcaktuara nga lidershipi i PD-së vazhdojnë rutinën e humbësit.

Pra, tre muaj pas maskaradës zgjedhore të 25 prillit, lidershipi i PD-së nuk jep asnjë përgjigje për atë se çfarë do të ndodhë në Parlamentin e ardhshëm shqiptar dhe se cili do të jetë aksioni opozitar në Parlamentin e ri. Asnjë përgjigje për strategjitë dhe taktikat, me të cilat PD, si opozita më e madhe në vend, do të përballet me regjimin e rilindjes. Është irrituese të shohësh se këto tre muaj, PD i është përgjigjur maskaradës së madhe me disa minimaskarada të ngjashme, veçse tashmë të zhvendosura nga skena kombëtare në një skenë më të vogël, në atë opozitare.

Këto maskarada, në thelb, janë etapat e njëpasnjëshme të rënies së vazhdueshme të PD-së në një rutinë humbëse. Etapa e parë e rënies: Beteja për denoncimin e manipulimit të zgjedhjeve. Zgjedhjet u manipuluan, por ne nuk protestojmë. Ne ndjekim procedurën, por harrojmë që po me procedurë triumfoi nazizmi në Gjermani, putinizmi në Rusi, erdoganizmi në Turqi.

Procedura dështoi, por kjo nuk ka rëndësi, ne prapë vazhdojmë procedurën e zgjedhjeve në parti. Meqë nuk zgjodhëm Kryeministrin, zgjedhim kryetarin tonë të partisë. Të gjithë pajtohen, askush nuk kundërshton. Po Çurçilli na mëson të kundërtën: ata që bien duke luftuar, kanë mundësi të ringrihen.

Demokracia ra, shoqëria u dorëzua, partitë (opozitare) dështuan, hajduti u bë mbret. Etapa e dytë e rënies: Fushata për zgjedhjen e kryetarit të PD-së. Fushatë pa vizion, pa alternativë, pa perspektivë rrugëdalje nga kriza, pa perspektivë të ardhjes në pushtet, pa një platformë ndryshimi, pa brejtje ndërgjegje për gjendjen e popullit opozitar dhe sakrificat e tyre, pa ndjesë për dy humbjet, pa qoftë edhe një shkëndijë shprese për rrugën e ardhshme drejt pushtetit nga asnjëri prej kandidatëve.

Lulzim Basha fitoi thjesht për rutinë, pasi në partitë shqiptare ku secili avancon në karrierë politike për shkak të servilizmit ndaj kryetarit, askush nuk mund ta konkurrojë kryetarin, aq më tepër në rastin e PD-së, ku, siç rezultoi më vonë, përtej kryetarit ka kryetar më të fuqishëm se kryetari.

Etapa e tretë e rënies: Kuvendi i PD-së, Kuvend që u mbyll para se të fillonte. Basha kishte bashkuar në një fjalim të gjatë, prej gati një ore shumë fjalë, të cilat i hodhi si fara kungulli mbi kryet e delegatëve. Pas këtij fjalimi, të gjithë ishin edhe më të paqartë për vizionin e ri të PD-së. Ishte trishtuese të shihje aty të mbledhur me mijëra përfaqësues të strukturave të PD-së, pra, elitën politike të saj, të cilët, të shqetësuar për humbjen, prisnin një debat të gjallë nga ku mund të dilnin mijëra propozime për transformimin e PDsë në një forcë politike moderne të aftë për t’i paraqitur anëtarësisë së PD-së, por edhe shoqërisë, një ofertë të re konkurruese, ndërkohë që aty nuk ndodhi asgjë e tillë.

Duartrokitjet e delegatëve ishin harxhuar në fillim të fillimit, pra, kur në sallë u shfaq kryetari i vërtetë i PD-së, Sali Berisha, i cili kishte zgjedhur këtë moment për t’u treguar të gjithëve se kush kishte qenë kryetari real i PD-së për 8 vitet e shkuara në opozitë dhe se cili do të ishte katër vitet e ardhshme, po në opozitë.

Besoj të gjithë tani e kanë kuptuar paradoksin e PD-së në tetë vjet: Basha, kryetar i partisë së Berishës.

E zbuluan të dy. Për mua ishte dyfish trishtuese, pasi nga njëra anë, kushdo që më takonte më përgëzonte për problemet e ngritura në diskutimin tim në Kuvend, nga ana tjetër pakkush prej tyre, me përjashtim të Agron Gjekmarkajt dhe ndonjë tjetri, pa llogaritur këtu rivalët në garë të Bashës, e ngriti vetë zërin aty, apo më pas publikisht për të njëjtat gjëra për të cilat binin dakord plotësisht me mua individualisht.

M’u përsërit e njëjta ndjesi e dhjetë viteve më parë, po i njëjti përgëzim pas kuintave, po e njëjta memecëri publikisht, megjithëse atëherë, disa prej atyre që më përgëzonin privatisht, me të njëjtin zell më sulmonin publikisht. Konkluzioni im: nuk mund të bësh kauza kolektive lirie dhe demokracie me ato elita politike apo intelektuale që ose e kanë humbur aftësinë e të menduarit dhe vepruarit të pavarur gradualisht ose nuk e kanë fituar këtë aftësi ende.

Gjithsesi, Kuvendi e pati një të re: votoi një herë propozimet e Bashës, pastaj hapi siparin e propozimeve të tjera, të cilat mund të votohen në kongresin e ardhshëm që do të mbahet me durim kur t’i vijë radha. Sa për Këshillin Kombëtar që u zgjodh dhe që do të mblidhet me 30 shtator, askush nuk e kuptoi si u bënë përzgjedhjet e kandidatëve, askush nuk e kuptoi si dhe sa votuan, askush sa vota mori.

Drynat e sekretit të tyre i vari në zinxhirin e florinjtë që mban në qafë Jemin Gjana dhe i mori me vete. Nga rendi i ditës së paraqitur, ka shumë gjasa që etapa e katërt në radhë të jetë mbledhja e ardhshme e Këshillit Kombëtar, që do të mbahet më 30 gusht. Nga leximi i kësaj axhende dhe krahasimi i saj me shqetësimet që mendoj unë se duhet të jenë prioritare për aktivitetin e ardhshëm të PD-së, kam krijuar përfundimisht bindjen se unë personalisht dhe PD kemi vektorë gjithnjë e më të kundërt mendimi dhe veprimi.

Unë mendoj dhe propozoj (siç e kam propozuar edhe në kuvendin e fundit kombëtar, por edhe vite më parë kur isha deputet i kësaj partie) fillimin e një procesi ndryshimi thelbësor të PD-së, ridimensionimin e marrëdhënieve me shoqërinë, përgatitjen e një oferte konkurruese elektorale, ndryshimin e modelit të lidershipit dhe të marrëdhënies së tij me PD-në, ndërkohë që PD vazhdon rutinën 8-vjeçare të humbësit. Për këtë arsye kam vendosur të mos marr pjesë në etapën e katërt të një rutine të tillë humbëse.

Madje, kam vendosur të mos e marr as mandatin e deputetit. Kam pranuar të jem drejtues i fushatës së zgjedhjeve në Qarkun e Lezhës përkundër interesave të mia për t’u ripërfshirë në jetën aktive politike. E kam bërë me vullnet të lirë si një akt angazhimi qytetar dhe intelektual për të dhënë kontributin tim modest në favor të ndryshimit, pas kërkesave të përsëritura dhe ngulmuese të kryetarit të PD-së Basha.

Kam vepruar siç veprova kur isha student në ‘90-ën, siç kam vepruar në dhjetëra raste të angazhimit tim publik, por këtë radhë mendova dhe ende vazhdoj të mendoj kështu, se largimi i Ramës nga pushteti ishte një kusht themelor për ta nxjerrë vendin nga qeverisja më e keqe që ka njohur historia e vendit pas rënies së regjimit të Enver Hoxhës.

Nuk jam penduar, por nga ana tjetër nuk mund të bëhem pjesë e një force politike që nuk ka as vetëdijen më minimale për gjendjen ku ndodhet dhe që nuk ka as përgjegjësinë më të vogël për fatin e mbështetësve të vet apo të gjithë shoqërisë. Kam bindjen (shpresoj të jetë e gabuar) që duke vazhduar rutinën e humbësit, PD po humb një shans historik, të fundit, për të ndryshuar veten dhe shoqërinë. Kështu si po vepron, PD po shndërrohet në një parti që mbron interesat personale të dy liderëve të vet, Berishës dhe Bashës, të një grupi të ngushtë drejtuesish të PD-së dhe ndoshta edhe të disa prej deputetëve të saj duke i tradhtuar interesat e atyre që e kanë mbështetur me aq mund, përkushtim e sakrifica.

E ndërmarr këtë hap si shenjë përgjegjësie për ata mijëra lezhjanë, mirditorë, kurbinas, që na mbështetën dhe që i rezistuan agresionit më të madh elektoral që kishin parë ndonjëherë dhe që, përkundër kësaj, bashkërisht realizuam fitoren më të madhe historike elektorale në Qarkun e Lezhës. Sot, ata janë nën agresionin e pushtetit, janë duke bërë gati plaçkat për të ikur nga sytë këmbët, janë të dëshpëruar dhe të pashpresë. Por mbi të gjitha janë të gënjyer. Unë nuk dua t’i gënjej ata siç po i gënjen lidershipii PD-së.

Po ju them hapur se ndërsa ata janë të braktisur në fatet e tyre, lidershipi i PD-së po bjerr kohën në rutinë zgjedhjesh për poste të kota strukturash të një partie që, kështu si po vepron, po e errëson gjithnjë e më shumë perspektivën e ardhjes në pushtet. E bëj këtë akt, që është më tepër një gjest sesa një sakrificë, për të treguar se dikush duhet dhe mund të reagojë kundër shndërrimit të PD-së në një parti dekori të një sistemi të degraduar, për të treguar se jo kushdo mund të bëhet dekor i një elite të paaftë partiake, që është e aftë vetëm për të mbrojtur interesat vetjake.

E bëj këtë për të dhënë një mesazh alarmi, të cilin ndokush mund ta dëgjojë dhe rrjedhimisht edhe ta bëjë të reflektojë. E konsideroj politikën dhe të qenit deputet si angazhim dhe jo si punë. Për të qenë i lirë, i pakushtëzuar dhe i pakompromentuar në opozitarizmin tim vetjak, nuk do të jem as pjesë e Këshillit kombëtar dhe as deputet në Kuvendin e Shqipërisë dhe do t’i drejtohem Komisionit Qendror të Zgjedhjeve për procedurat formale të sanksionimit të vendimit tim.

Kështu, mes qëndrimit në PD, ku për shkak të përgjegjësisë dhe natyrës sime kritike do të detyrohem të jem më shumë i angazhuar në opozitarizmin brenda PD-së dhe daljes jashtë kësaj partie për të bërë opozitën e pushtetit, po zgjedh këtë të fundit: opozitën ndaj pushtetit.

 

Rendit zhvillimet sipas orarit:
Ora 09:45
Mark Marku hoqi dorë nga mandati i deputetit, pritet ta marrë Elda Hoti, kandidatja e Republikanëve

PD mori në Lezhë 4 mandate dhe me dorëheqjen e Mark Markut nga mandati, pritet që vendin e tij ta marrë Elda Hoti si më shumë e votuara në listën e deputetëve të PD-AN. Elda Hoti erdhi në listë si pjesë e koalicionit të PD, si kandidate e Partisë Republikane.

"Mandati i ndërprerë i deputetit ose i anëtarit të këshillit të bashkisë i kalon kandidatit vijues të listës së të njëjtës parti politike në zonën zgjedhore përkatëse, përveçse kur plotësimi i vakancës me kandidatin e radhës ul përfaqësimin e gjinisë së nënpërfaqësuar. Në këtë rast plotësimi i vakancës bëhet nga kandidati i parë në listë i gjinisë së nënpërfaqësuar pavarësisht renditjes në listë. Emrat e tjerë të asaj gjinie ngjiten në listë duke marrë renditjen e kandidatit paraardhës të së njëjtës gjini. Ky rregull nuk zbatohet kur emrat e gjinisë përkatëse kanë shteruar", thuhet në Kodin Zgjedhor.

Elda Hoti renditej e 5 në listë me 2733 vota, duke mos u bërë dot pjesë e listës fituese nga zgjedhjet e 25 prillit, por duket se do të jetë në Kuvend, pas lënies së mandatit nga Mark Marku, i cili ishte edhe drejtues politik i PD në qarkun e Lezhës.

/M.Q./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Bledi: 27/08/2021 15:56

    Kush ka mend ne koke te iki para shtatorit, ato qe do rrijne dihet mire se Jane veçse lepiresa qe presin ndonje kocke nga lart.

    Përgjigju
  • Jok: 27/08/2021 15:24

    Keto qe thote Marku i kemi ditur te gjithe qe para disa vitesh. Cudi.

    Përgjigju
  • gerti: 27/08/2021 14:52

    Qe dha doreheqjen beri mire por nje pyetje del qarte PROFESOR TANI E KUPTOVE...?? me gjithiate ME MIRE VONE SE KURRE.... PD eshte parti komuniste e mbushur me vrases e hajdute... Eshte fatkeqesi per vendin qe ka kete opozite e cila i jep Rames pushtet te perjetshem. Rrofte shoku Sali non grata...

    Përgjigju
  • LORA: 27/08/2021 12:08

    Cile largohen te paret nga anija qe do mbytet ? Minjte. Sodoqofte po celet mundesia per themelimin e nje opozite reale ne Shqiperine tone.

    Përgjigju
  • Bravo: 27/08/2021 10:43

    Ky meriton kryetar të PD Mark Marku sepse e ka kuptuar se PD-ha po degradon akoma me te njejtat figura Basha Berisha ! PD me Bashen as në 2050 nuk vjen në pushtetit , me shume shanse ka të fitoje LSI 70 deputet sesa Pd-ja

    Përgjigju
  • Sunit hesapi: 27/08/2021 09:37

    Po ky donte te behej minister se aty ka lek,deputet i thjeshte mer rruge si nje mesues.Mark tumi eshte nje taleban I partise terroriste demokradhjes

    Përgjigju
  • DYRDYL KASAP REXHEP BULE LEKA [ KEPI ]: 27/08/2021 08:41

    O Mark Marku je shum i vonuar me kritikat e tua. Ku ishe ti deri dje o Mark kur partia anti Shqiptare vidhte Shqiptarët i vriste shiste Detin po ti në ktë koh nuk the një fjal. Po tani që familja mafjoze hajdute berisha të shau e kuptove që ti aty ske shanc e prandaj u tërhoqe .

    Përgjigju
  • florinda: 27/08/2021 08:09

    Po duhet bërë se infekojn dhe të tjerë

    Përgjigju
  • Eri: 27/08/2021 08:08

    Veprim deshperues por shume dinjitoz. Pergezime

    Përgjigju
  • Sondazhi i ditës:

    Si do jenë ndryshimet në Kodin Zgjedhor që do bëjnë PS-Rithemelimi?



×

Lajmi i fundit

'Tempulli' deri tani u sekuestruan mbi 1600 kg drogë, Balla: Do vijojmë

'Tempulli' deri tani u sekuestruan mbi 1600 kg drogë, Balla: Do vijojmë