Meta: Në 2017 presidenti nga
populli, të ndryshohet Kushtetuta

Kreu i LSI-së Ilir Meta propozon ndryshimin e Kushtetutës në mënyre qe ne vitin 2017 Presidenti te zgjidhet nga populli. Ne emisionin “Debat”, të gazetarit Alfred Peza, në televizionin "Vizion plus" duke analizuar procesin e zgjedhjes se Bujar Nishanit, ne postin e kreut te shtetit por edhe kritikat e faktorit ndërkombëtar për këtë proces, Meta deklaroi se Presidenti duhet te zgjidhet nga populli dhe për këtë LSI do te ndërmarrë hapa konkrete.

Meta nuk e fshehu ambicien qe një ditë të kandidojë për postin e Presidentit te Republikës. Ndërsa sqaroi prapaskenat e zgjedhjes se Presidentit, Meta deklaroi se ne rast se nuk do te arrihej tek zoti Nishani, vendi do te shkonte ne zgjedhje te parakohshme ne 26 korrik.

INTERVISTA E PLOTE
Z. Meta, Zv. ndihmës Sekretari amerikan i Shtetit, z. Rreker, ka deklaruar sot se zgjedhja e presidentit ishte një rast i humbur për konsensus se i zgjodh vetëm nga vota partiake. Si e konsideroni?
Dihet që Parlamenti përbëhet nga partitë dhe zgjedhja e Presidentit bëhet nga Parlamenti sipas Kushtetutës. Unë do të apeloja ndaj PD-së dhe PS-së që në të ardhmen presidenti të zgjidhet direkt nga populli për të marrë fund çdo lloj keqkuptimi apo keqinterpretimi i asaj që presidenti të jetë përfaqësues i popullit. Në këtë mënyrë, presidenti të mos jetë më produkt i negociatave dhe i diskutimeve midis partive por do të ishte mirë, që me kompetencat aktuale, të zgjidhej vetë nga qytetarët. Kështu merr fund çdo lloj shqetësimi.

A është e mundur çështja e zgjedhjes së presidentit nga populli? Si mund të realizohet?
Ne mendojmë se eksperiencat e tre rasteve, të viti 2002, 2007 dhe aktualisht, kur Kushtetuta kërkonte një konsensus me 84 vota ndërsa tani lejon që të zgjidhet edhe me shumicë të thjeshtë dhe kur ëprsëri dëgjojmë që është apo jo presidenti përfaqësues i popullit, e vetmja rrugë që kjo çështje të marrë zgjidhje përfundimtare por edhe e vetmja mënyrë ëpr të pasur një transparencë totale është që presidenti të zgjidhet nga populli. Secili që ka një ambicie për të shërbyer në postin e rëndësishëm të Presidentit të Republikës të ballafaqohet me qytetarët, pa ndryshuar kompetencat apo në thelb sistemin politik që kemi.

Do ndërmerrni hapa konkretë në këtë drejtim?
Do të përpiqemi por kuptohet që për të bërë këto lloj ndryshimesh duhet vullneti i dy partive kryesore dhe shpresojmë që ato ta japin këtë konsensus në të ardhmen. Mendoj se është një çështje tërësisht e realizueshme sepse kur u bë ndryshimi i Kushtetutës dhe krijoi mundësinë që presidenti të zgjidhej me 71 vota, shqetësimi ishte që të evitohej një krizë e mundshme parlamentare dhe zgjedhje të panevojshme për këtë çështje. Në këtë mënyrë evitohen zgjedhjet e parakohshme në çdo rast por edhe thellohet në maksimum transparenca. Ne do të ndërmarrim hapat tona në këtë drejtim në shtator.

Z. Arvizu deklaroi pak ditë më parë se kanë tre persona që kanë vendosur për presidentin. Ka qenë kjo një nga vërejtjet që ju kanë bërë të reflektoni me këtë propozim?
Unë jam krenar për këtë. Nuk ka asnjë shqetësim për këtë çështje ashtu sikurse presidenti i zgjedhur i vlerësua më shumë të drejtë edhe nga z. Reeker si një mik i SHBA-ve. Ky është një vlerësim që edhe ambasadori Arvizu ma ka shprehur kohë më përpara për z. Nishani. Është një vlerësim që e kam gjetur tek shumë aktorë vendas por edhe ndërkombëtarë. Mendoj që z. Nishani është simbol i korrektesës institucionale dhe absolutisht zgjedhja e tij, pavarësisht se erdhi pas zhvillimeve të papritura, është një zgjedhje absolutisht legjitime.

Po për deklaratën e z. Reeker që ky ishte një rast i humbur?
Unë mendoj se është në kuptimin që do të ishte mirë që presidenti të ishte zgjedhur me 140 vota sikurse kemi shpresuar të gjithë ne. Në fund të fundit pse të mos kërkojmë më të mirën, 10 me yll por edhe nënta nuk është e keqe.

Një nga tre aktorët kryesorë të procesit të zgjedhjes së presidentit, zoti Edi Rama, është shprehur se ndihet i zhgënjyer për pjesën e dytë të procesit nga roli që ju keni luajtur. Cili është komenti juaj?
Mendoj se është e drejta e zotit Rama për të mbajtur qëndrime të cilat, në radhë të parë, më shumë se sa i drejtohen të vërtetës, i drejtohen anëtarëve dhe simpatizantëve të tij, pra të Partisë Socialiste. Sepse roli im ka qenë tepër i përgjegjshëm nga fillimi e deri në fund të këtij procesi, roli i LSI-së, dhe i imi si përfaqësues i saj. Për arsye se mazhoranca ka pasur të gjitha mundësitë që të zgjidhte presidentin pa i hyrë procesit të konsensusit. Ne kemi insistuar për ta hapur këtë proces, përtej mazhorancës, për të gjetur figurën më konsensuale. Përpjekjet kanë qenë të mëdha. Unë nuk dua të bëj edhe një herë kronologjinë e të gjithë atyre dhe përpjekjeve dhe zhvillimeve të papritura, por kam theksuar që tek rasti i Zaganjorit, zoti Rama humbi një mundësi të artë për të pasur një rast të mrekullueshëm të asaj që presidenti zgjidhët me 140 e vota dhe jo me 70 e ca vota. Humbja e kësaj mundësie, dhe afati i kushtetutës, e futi procesin në rrethana ku mundësia për konsensus më të gjerë vështirësohet.

Ka pasur një mendim që vjen nga afër opozitës dhe zotit Rama, në bazë të të cilit mazhoranca dhe roli i LSI-së në tre raundet e para të zgjedhjes së zotit Zganjori, nuk ka qenë shumë i sinqertë për arritjen e një konsensusi. Cili është komenti juaj?
Duhet të kemi në konsideratë që në momentin që doli emri i zotit Zaganjori, emri i tij doli nga përfaqësuesit e partive të mazhorancës, në orën nëntë të mbrëmjes, ku në orën nëntë të ditës së nesërme, komisioni parlamentar përkatës duhet të bënte regjistrimin e kandidatëve. Nuk ishte luksi në drejtim të kohës për të hyrë në negociata pafund. Ne kemi ardhur tek emri i z. Zaganjori me dëshirën për një mundësi të artë për konsensus. Ky ishte i vetmi qëllim.

Po nga rasti i z. Hoxha keni nxjerrë ndonjë mësim?
Nuk besoj se ka ndonjë arsye për mësim për arsye se unë ruaj vlerësimin maksimal për z. Hoxha dhe për përgjegjshmërinë e tij dhe absolutisht unë besoj që për ti dhënë fund gjithë hamendësimeve, pikëpyetjeve, pikëçuditësve që lindin në këto raste të zgjedhjeve të presidentëve, siç ka ndodhur në 2002, në 2007 apo dhe tani, ka qenë që presidenti të zgjidhej drejtpërdrejt nga qytetarët dhe në për këtë do të ndërmarrim iniciativat tona.

Si do ti përgjigjeni zërave politikë ndaj jush të cilat thonë se gjatë procesit të zgjedhjes së Presidentit të Republikës, ju keni bërë një lojë politike brenda mazhorancës, më pranë grupit të z. Basha për të mos zgjedhur zonjë Topalli si presidente. Ka ndonjë të vërtetë?
Nuk ka asnjë marrëveshje, as me z. Basha as me znj Topalli, ka një marrëveshje me kryetarin e Partisë Demokratike me Z. Berisha dhe i kam qëndruar në të gjitha marrëveshjet në bazë të marrëveshjes që kemi nënshkruar më të. Gjithçka është një aludim. Janë sinuata, janë hamendësime por jemi në demokraci dhe ne i pranojmë ne i respektojmë të gjitha këto. Absolutisht për ne çdo kandidaturë që do të ishte e pranueshme nga të dyja palët, qoftë znj Topalli, qoftë z. Bode, qoftë z. Ruçi në rast se pranoheshin për ne nuk ka asnjë problem, qoftë dhe z. Nano. Pra LSI, ka pasur vetëm një kriter orientimi në këtë proces, të jetë një proces konstruktiv, të kemi dialog, të kemi negociata, të kemi konsensus. Në rast se ne do të kishim atë shkallë civilizimi që do të pranonim një figurë politike të palës tjetër le të themi absolutisht kjo do të ishte gjëja më e mirë. Sepse sa më shumë të ketë presidenti, aq më mirë është mendoj unë. Vendi mund të kaloj situata të vështira dhe natyrisht figura e presidentit duhet të jetë i mësuar me situata të tilla që të ruaj qetësinë dhe të japë një mesazh të ekuilibruar atëherë kur të tjerët i kanë gjakrat e nxehta.

Pse nuk i qëndruat besnik qëndrimit tuaj bërë publik pas takimit të parë me z. Berisha. Kur u deklarua se i keni thënë që është rast i humbur votimi me 71 vota në qoftë se zgjidhet një president me shumë nga mazhoranca aktuale? Dhe e dyta, kur flisni për President me profil të lartë politik, mesa dimë z. Nishani është i till, ç’ndryshim ka z. Nishani me znj. Topalli?
Për të qenë më pranë të vërtetës. Zgjedhja e Presidentit në mënyrë arrogante nga ana e mazhorancës pa bërë një përpjekje për konsensus, pa hyrë në diskutime, pa hyrë në negociata, pa bërë disa përpjekje që unë i vlerësoj të sinqerta natyrisht që do kishte qenë situatë jo pozitive. Ndërsa mënyra se si u veprua mendoj se dëshmoi vullnet për të arritur konsensus. Fakti që u propozua emri i z. Zaganjori jashtë PD apo jashtë mazhorancës, një profil i pranueshëm nga të gjithë, absolutisht që ishte një përpjekje e sinqertë për konsensus. Fakti që u propozua z. Hoxha apo fakti që u shtrua në tryezën e bisedimeve për herë të fundit me katër emra, ku përveç z. Hoxha i cili ka bashkëpunuar me të gjithë qeveritë si drejtues i një institucioni tepër prestigjioz, apo u prezantua dhe një emër tepër i njohur z. Imami, i cili është vërtet ministër i Mbrojtjes i qeverisë aktuale, ka qenë ministër i reformës institucionale, ministër i Drejtësisë në qeveritë e socialistëve, pra një njeri që ka punuar me të dyja palët. Pra, pati përpjekje. Mendoj se ne ndërtuam një proces. Procesi ka afatet e tij dhe kohën e tij. Opozitës iu dha mundësia për të bërë propozimet e saj, ndërkohë që edhe emra të tjerë u përfshinë, një pjesë e të cilëve nuk pranuan të viheshin në dispozicion për arse se nuk është se nuk dëshironin të shërbenin në një detyrë kaq të rëndësishme, por sepse ata janë mosbesues ndaj politikës, sepse fillimisht emrat e tyre dalin dhe më pas emrat e tyre baltosen pa të drejtë me shpifje, me intriga e kështu me radhë. Ne nuk duam të bëhemi pjesë e këtij debati të padrejtë shpeshherë. Në këtë mënyrë ne përfunduam në një emër që ishte një emër me disa cilësi tepër pozitive për të qenë konsensual. Në fund të fundit një ministër i vlerësuar nga vetë zoti Rama.

Sa pranë zgjedhjeve të parakohshme ishim?
Absolutisht që në rast se nuk do të zgjidhej Presidenti do të kishim kaluar në zgjedhje. Kushtetuta ishte e prerë.

Përveç negociatave që dihen a ka qenë një moment i caktuar në dy takimet me zotin Rama ose edhe jashtë këtyre takimeve që keni qenë me afër se kurrë për një konsensus?
Mendoj se arritja e një konsensusi maksimal ka qenë rasti i zotit Zaganjori, sepse mendoj se të dyja palët, këtu kam parasysh zotin Berisha por dhe zotin Rama, do ta kishin të vështirë të pranonin një figurë politike të njërës palë, kushdoqoftë, pavarësisht nga respekti apo nga konsiderata që mund të kishin, pavarësisht nga respekti që zoti Rama ka për zotin Nishani, pavarësisht nga respekti që zoti Berisha ka për zotin Mejdani, apo zotin Nano e kështu me radhë. Por, do të ishte e vështirë nga njëra palë pranimi i njërës palë i një kandidati politik të palës tjetër. Politika jonë ende nuk e ka arritur këtë stad për të arritur në këto zgjedhje, kur këto nuk i imponon Kushtetuta.

Pra, tek zoti Zaganjori ka pasur një vullnet që opozita mund të pranonte?
Unë mendoj se kjo do të ishte kandidatura më e mundshme për t’u pranuar sepse pas tërheqjes së tij, pas konsumimit të raundi të tretë, kur ai shpresonte ende për konsensus. Kjo ka ndodhur të premten pasdite, por të hënën ishte raundi i katërt. Absolutisht që koha ka qenë shumë e shkurtër dhe njëkohësisht edhe pasiguria jonë ka qenë e madhe për të tentuar përsëri për kandidatura që janë pak larg politikës. Kjo ishte arsyeja që në fund shkuam me katër emra, të cilët janë politike, kanë shumë cilësi për të qenë të pranueshëm për PS, por dhe jopolitikë.

Meqë thatë që kishte më pak shanse për kandidatët politikë, zoti Nano ka pasur zero shanse?
Për të qenë i sinqertë shanset e tij nuk kanë qenë të larta. Unë këtë e kam thënë dhe në takimin e zhvilluar me të kur ai paraqiti idetë e tij për arsye sepse përpjekja për të gjetur një President konsensual, sipas vlerësimit tim, e bënin të vështirë që zoti Nano të pranohej nga PD, nga zoti Berisha pavarësisht nga deklaratat e vlerësimet e tij për figurën e zotit Nano, pasi në fund të fundit ka qenë rival historik i tij.

Z. Meta pse u bënë tani lëvizjet në qeveri dhe pse pikërisht këto lëvizje?
Besoj se i kam konsumuar disa prej arsyeve se pse. Është një riorganizim kapacitetesh, forcash në të gjitha frontet e LSI-së, qeverisja, parlamenti e partia dhe besoj se janë lëvizje të gjetura dhe do të hapin rezultatin e tyre.

Ka ndonjë arsye për lëvizjen e z. Naço kaq shpejt nga posti i tij i deritanishëm?
Nuk ka asnjë arsye përveç riorganizimit të LSI-së. Pra që nga zhvendosja e z. Vasili në krye të Komitetit të LSI-së për shkak të eksperiencës së tij. Njëkohësisht vendosja e z. Haxhinasto si figura kryesore e LSI-së në qeveri për arsye se çështjet kryesore që shqetësojnë shqiptarët janë ekonomia, punësimi e kështu në vijim. Z. Naço ka shkuar në postin e Nënkryetarit të Kuvendit. Mendoj që me këtë riorganizim rritet efikasiteti i LSI-së në të gjitha drejtimet përfshi edhe Parlamentin.

Emërimi i z. Tavo në shëndetësi ka lidhje me shpërblimin që ju i jepni për kalimin nga PS në forcën tuaj politike?
Nuk ka asnjë lidhje sepse po të ishte kështu do të ishte bërë shumë më përpara. Kjo ka lidhje edhe me vlerësimin si një njeri me eksperiencë që për të gjithë është e vlefshme, edhe kur janë të suksesshëm, edhe largimi nga detyra e ekzekutivit. Kjo në thelb i forcon profilit për të ardhmen. Z. Vasili ka qenë një ministër i shkëlqyer në vlerësimin tim. Absolutisht perfekt në një sektor tepër të vështirë dhe problematik.

Ka pasur disa kritika mbi lëvizjet e tjera. Keni ndonjë gjë për të shtuar në lidhje me to?
Ne kritikat i mirëpresim. Mendoj se kritikat do të zhgënjehen. Z. Haxhinasto ka qenë në detyrën e ministrit të Jashtëm për mëse dy vite dhe ka bërë një performancë të shkëlqyer në raport me sfidat e politikës së jashtme dhe në raport me partnerët tanë euroatlantikë. Por problemi kryesor i qytetarëve është ekonomia dhe punësimi. Prandaj z, Haxhinasto, si figura kryesore e LSI-së në qeverisje, u zhvendos në këtë sektor që është problemi më i rëndësishëm dhe më kryesor dhe i ka të gjitha mundësitë për ta përmbushur këtë mision me shumë përgjegjshmëri. Ndërkohë që z. Panariti është një figurë e re politike por që ka eksperiencat e duhura dhe ka një formim të përgjithshëm të jashtëzakonshëm dhe një eksperiencë të rëndësishme. Unë jam i sigurt se do të ketë një performancë shumë të mirë.

Pozicioni i zotit Panariti si nënkryetar i partisë për Tiranën, ka ndonjë emër që do ta zëvendësojë?
Akoma jo, por ka disa emra për këtë detyrë, për të cilët do të diskutojmë edhe me kryetarin e Bashkisë kur të merret një vendim.

A ka pasur diçka që nuk ka shkuar midis Kryetarit të Bashkisë dhe nënkryetarit të bashkisë?
I vetmi problem është se zoti Basha është shumë i mërzitur me mua për ndërrimin e zotit Panariti. Ky është i vetmi problem që ka qenë midis meje dhe zotit Basha, ndërrimi i zotit Panariti, por që besoj se edhe këtë do ta kalojmë.
Lëvizja Socialiste për Integrim ka treguar që ka talente dhe ka figura të cilat herë pas here kanë treguar se kanë performuar mirë, megjithëse njerëzit shpeshherë kanë qenë skeptikë.
Ne na pëlqen kur ndeshemi me skepticizmin e fillimit, sepse është një shtysë për ti zhgënjyer në procesin pozitiv.

Në mbledhjen e dy ditëve më parë për reformën zgjedhore, ju ishit ulur në krahun e opozitës, ka ndonjë domethënie kjo gjë?
Unë besoj se kjo ka ndonjë thënie të veçantë sepse në krye të tavolinës ishte z. Madhi dhe ç’domethënie ka kjo. Kjo s’do të thotë që ai është kryetarë dhe z. Mediu është nënkryetarë i Partisë Republikane. Dhe natyrisht unë jam pas asnjë lloj paragjykimi për më tepër që kur rri me kolegët e mazhorancës më shumë të merr malli për atë opozitë.

Ishte një diskutim në atë tryezë ku dolët me një deklaratë në lidhje me reformën elektorale, është një kërkesë e përsëritur, është një tryezë e përsëritur kur kanë ngelur dhe dy javë nga puna e Komisionit Parlamentarë të reformës, dhe shqetësimi kryesor i juaji si parti të treta është korrigjimi i sistemit. Konkretisht çfarë kërkoni nga tryeza?
Ne si LSI e para kërkojmë që të përfundojë reforma zgjedhore dhe natyrisht të marrë zgjidhje çështja e barazisë së votës. Përmes ndrysh8imit të sistemit, përmes korrektimit, përmes një rindarje të zonave në mënyrë të tillë që pak a shumë vota të jetë e barabartë apo pragu të jetë i barabartë për përfaqësimin e partive të ndryshme. Dhe së dyti besoj se shumë e rëndësishme është duke ndjekur dhe mesazhet e z. Riker dhe z. Fyle që ishin shprehur sot. Sepse tani është urgjente që këto çështje ti mbyllim dhe të mbyllen njëherë e mirë, sepse janë angazhime të marra dhe mbi bazë të realizimit të cilave do të lehtësonim për marrjen e statutit të vendit kandidatë nag ana e Bashkimit Europian. Ndaj këto interesa të ngushta partiake duhet të lihen mënjanë dhe në radhë të parë, PD, PS duhet të tregojnë vullnet që të mbyllen këto çështje, të mbyllen brenda këtyre dy tre javëve.

A ekziston realisht ky vullnet sipas jush?
Duhet të dali dhe nga hiri ky vullnet dhe përgjegjësia duhet të jetë shumë e madhe pasi do të ishte krejtësisht pa kuptim, për disa angazhime të cilat duhet të ishin përfunduar përpara çështjes së zgjidhjes së presidentit. dhe pas kaq paralajmërimesh nga partnerët ndërkombëtarë ne të sakrifikojmë diçka më të madhe për disa kalkulime të ngushta elektorale për vitin 2013.

Në momentin që ndodhemi ka fajtorë apo duhet të presim konsumimin e kohës fizike dhe të flasim më pas për emra të përveçëm?
Për emra të përveçëm nuk e di. Sepse nuk është e rëndësishme të vëmë emra. Tani PD dhe PS e kanë këtë çështje. Duhet të gjejnë një zgjidhje dhe duhet ta zgjidhin sa më shpejt këtë çështje. Të gjithë të tjerët janë shumë të angazhuar dhe e kanë dhe më të thjeshtë për tu angazhuar për ta mbyllur këtë çështje.

Në lidhje me sistemin zgjedhor, për të cilin ju keni bërë një luftë të vazhdueshme politike. Keni ju një formulim konkret se si duhet të ndryshojë sistemi zgjedhorë në mënyrë që të eliminohet çdo diskriminim ?
Absolutisht që është tërësisht e zgjidhshme dhe nuk mund të ketë një rindarje qarqeve perfekte elektorale. Mund të realizohet korrektimi shumë i thjeshtë, formulat janë paraqitur në mënyrë që asnjë parti mos të humbas votat në mënyrë të padrejtë. pra të gjitha këto janë çështje vullneti nuk mendoj se është çështje formule. Formula gjendet në bazë vullnetit.

Ekziston pikërisht kjo marrëveshje midis partive të vogla parlamentare në lidhje me këtë ndryshim ?
Ne jemi dakord me çdo ndryshim. Formulat janë disa por mjafton të bëhet. Ne jemi fleksibël

Ka pasur një ulje, një dakordësi, një vullnet?
Nuk ka ekzistuar një vullnet i tillë deri tani. Përfaqësuesi ynë në këtë komision ka qenë zoti Tavo dhe përfaqësues dhe të partive të tjera, përfshirë zotin Mediu, zotin Idrizi dhe kolegë të tjerë, ë cilët kanë bërë përpjekje të mëdha për ta futur në rendin e ditës këtë çështje, pra çështjen e korrigjimit të sistemit. Deri tani nuk është bërë diçka por kjo çështje tani duhet të marrë fund.

Ju keni thënë se duhet një pakt kombëtar për integrimin. I ngeleni prapë këtij qëndrimi?
Absolutisht që po sepse për një pakt sa më shpejt të bëhet aq më mirë është.

A do ndikohet ekzistenca, funksionimi i kësaj mazhorance, i këtij koalicioni qeveritar nga plotësimi apo mosplotësimi i kësaj pike që lidhet me reformën elektorale?
Marrëveshja ka shumë çështje dhe natyrisht që dhe kjo është një nga çështjet e rëndësishme të kësaj marrëveshje. Marrëveshja gjykohet në kompleks dhe natyrisht që këtu ka dy aktorë kryesorë për shkak të vetos që i kanë atribuuar vetvetes dhe njëri-tjetrit.

Mosndryshimi, moskorrektimi i sistemit zgjedhor mund të bëhet shkak që LSI mund të shkojë edhe deri në prishjen e koalicionit qeveritar?
Nuk dëshiroj të jem paragjykues. Unë shpresoj që të ketë një reflektim jo vetëm për shkak të një kërkese të LSI por për shkak të kërkesës së shumë forcave politike në mazhorancë dhe në opozitë, për shkak edhe të kërkesës së partnerëve ndërkombëtare që këto çështje të zgjidhen sa më shpejt në mënyrë qe dhe ne të ecim sa më shpejt. Ne kemi hyrë me vullnetin për të parë përpara.

Nëse Shqipëria në vjeshtë nuk merr statusin e vendit kandidat dhe duke qenë se një nga pikat themelore të krijimit të kësaj qeverie ishte pikërisht integrimi evropian i vendit, a do të ishte ky një shkak i qenësishëm?
Është herët të vlerësohet në varësi nga zhvillimet, por unë nuk mund të jem paragjykues. Unë jo vetëm që nuk e dëshiroj këtë gjë, por ne do të bëjmë të gjitha përpjekjet që kjo gjë të mos ndodhë.

Përveç reformës zgjedhore është dhe ajo Parlamentare dhe ajo e imuniteteve. A do duhej të përmbylleshin dhe a janë në kohë për t’u përmbyllur këto reforma?
Përsa i takon zgjidhjes së çështjes së imuniteteve ne do të ndërmarrim një iniciativë në byronë parlamentare si LSI që të finalizojmë një iniciativë për të ftuar palët për të ecur në këtë drejtim për arsye sepse për një kohë të gjatë i është bërë një ftesë opozitës që të paraqesë kërkesat e saj dhe kjo gjë deri tani nuk ka ndodhur dhe në këtë mënyrë ne do të ndërmarrim një iniciativë tjetër. Unë kam biseduar me zotin Manjani, me zotin Tavo për këtë çështje.

Kë do të përfshijë si kategori, vetëm deputetët?
Të gjithë ata që kanë imunitet aktualisht. Ne duam që të formalizojmë një iniciativë të tillë.

Keni diskutuar me PD dhe partitë e tjera?
Ne nuk kemi pasur një diskutim, por besoj se kjo do ti nxisë dhe të tjerët të bëjnë formulimet e tyre. Për ne nuk është problemi i protagonizmit, por është mesazhi se tani duhet vepruar.
Ka një trend në rajon ku forcat e treta politike janë shumë të rëndësishme dhe përcaktuese. Si ju duket ky trend?
Çdo fenomen është produkt i një momenti dhe i një rrethane të caktuar. Natyrisht që kanë ndodhur disa ndryshime të rëndësishme në disa vende që lidhet edhe me lodhjen nga partitë tradicionale në një kohë të vështirë me probleme financiare dhe sociale. Unë mendoj se rritja e alternativave të reja është një element pozitiv për aq kohë sa i shërben stabilitetit të një vendi të caktuar dhe nuk e cenojnë këtë stabilitet për objektiva të ngushta partike.
A është e gatshme LSI në një situatë të tillë të vështirë për vendin të marrë të njëjtat angazhime si simotrat e saja në vendet e tjera të rajonit?
Për LSI-në është e rëndësishme të mos kemi situata të tilla. Kjo do të thotë që Shqipëria të ruajë qëndrueshmërinë e saj sepse kjo është kryesorja për qytetarët shqiptarë. Njëkohësisht të jemi sa më energjikë dhe kreativë për t’iu përgjigjur të gjitha këtyre pasojave në një mënyrë sa më efikase, që këto pasojë të ndihet sa më pak për qytetarët.

A do ta ruajë profilin e fortë LSI që luajti në çështjen e presidenti?
LSI nuk e ka qëndrim në vetvete të ruajë një profil të ndryshëm nga partitë e tjera. Qëllimi kryesor është që kjo forcë politike të ndikojë sa më pozitivisht për normalizimin e politikës shqiptare, për të kapërcyer disa tabu për të cilat mendoj tashmë janë rrëzuar. Edhe bashkëqeverisja me PD-në është një mesazh i tillë emancipues. Në këtë drejtim sa herë të jetë e nevojshme që LSI të investohet në mënyrë të vendosur një zhvillim i cili ndihmon vendin dhe të gjithë për të kaluar një ngërç absolutisht që do ta bëjë. Kuptohet kjo ka nevojë edhe për modestinë përkatëse që do të thotë se LSI do të marrë ato përgjegjësi që do t’i jepen se përgjegjësitë merren në bazë të votave.

Si ju duket lëvizja e Z. Nano?
Çdo lëvizje e re është e mirëpritur, është pozitive. Politiak ka nevojë për iniciativa të reja. E rëndësishme është që ato të jenë pozitive dhe t’i shërbejnë proceseve integruese të vendit.

Ndërkohë që zoti Nano ju ka kritikuar edhe ju në disa deklarata të tij. Cili është komenti juaj?
Nuk besoj se zoti Nano ti jetë drejtuar LSI-së dhe mua personalisht, sepse ai na ka vlerësuar publikisht për kontributet që japim për integrimin e vendit, por çdo kritikë që vjen, aq më tepër edhe nga zoti Nano, ne do ta marrim në konsideratë.
Lëvizja Socialiste për Integrim ndodhet në një proces të rëndësishëm pas zgjedhjeve të forumeve rinore, ka hyrë në një pjesë të procesit të saj të brendshëm për zgjedhjen edhe të kryetarit të LSI-së. Mund të na e shpjegoni konkretisht se çfarë është bërë gjatë këtyre zgjedhjeve, dhe si do rrjedhin ngjarjet deri në shtator, kur të jetë edhe finalizimi?
LSI kishte tre evenimente të rëndësishme, organizuese dhe ripërtëritëse, dy prej të cilave i përfundoi me sukses, Konventën zgjedhore të LGI-së dhe të LRI-së. Për arsye të çështjes së presidentit, pasi e gjithë vëmendja po përqendrohej tek kjo çështje, Konventa zgjedhore e e LSI-së është vendosur për tu zhvilluar me 29 dhe 30 shtator. Natyrisht kjo do të thotë që në një proces tepër demokratik do të zgjidhen të gjitha forumet e LSI-së përmes konkurrimit. Duke nisur nga kryetari e deri tek të gjitha strukturat e tjera.

Do rizgjidhni sipas parimit një anëtar një votë, apo do të keni kandidatura të tjera? Në ç’fazë jeni për këtë proces?
Kryetari dhe delegatët do të zgjidhen sipas parimit një anëtar një votë. Një parim që ne në fakt e vendosëm për herë të parë në Shqipëri në 2004-2005. I cili ndonjëherë nuk ka qenë edhe shumë efikas në kushtet tona. Në kuptimin që ndonjëherë edhe mund të keqpërdoret, që do të thotë se kërkon masa të forta organizative. Ekziston ky problem, por ne i qëndrojmë këtij parimi, që është një parim shumë demokratik dhe në fund të fundit, çdo parim, nëse nuk respekton rigozorisht disa norma, mund të degradojë, dhe nuk është faji i parimit.

Ju, de facto jeni tërhequr si Kryetar i Lëvizjes Socialiste për integrim. Si funksionon kjo pjesë deri në kongres?
Aktualisht kryesia është shndërruar në një komitet organizator të konventës, kryetar i së cilës është zoti Vasili, dhe kompetencat praktikisht të organizimit dhe pothuajse edhe kompetencat e kryetarit i ka ky komitet dhe ky kryetar. Pra unë praktikisht më shumë jam një kandidat.

Sa real është votimi brenda LSI përsa i përket zgjedhjes së strukturave të LSI, dhe sa i përmbaheni statutit të LSI? Përshembull dy mandate në katër vjet i bije t’u ketë përfunduar?
Unë jam zgjedhur vetëm një herë si Kryetarë i Lëvizjes Socialiste për Integrim, pavarësisht se Konventa Zgjedhore Kombëtare për arsye të ndryshme le të themi që është shtyrë. Ndaj jo vetëm që kam të drejtë të kandidojë për herë të dytë dhe s’mund të bëj ndryshe dhe pas suksesit të madh që arritëm në zgjedhjet vendore, ku rritja e votave të LSI ishte shumë e ndjeshme. Sesa është reale gara këtë nuk e vendos unë këtë e vendosin dhe gjykojnë të gjithë ata të cilët vendosën të marrin pjesë dhe unë dëshiroj që të ketë kandidatë të vendosin për të garuar.

Janë regjistruar kandidatë të tjerë për Kryetarë?
Javën e ardhshme grupi organizatorë do të merret me procedurat dhe mënyrën se si do të veprohet edhe për kandidatët për kryetarë, edhe për forumet e tjera, edhe për delegatët.
Meqë ju keni arritur sukses, i pranon rregullat e brendshme të partisë për të arritur sukses të tejkaloni dhe dy mandate apo ky do të jetë mandati i dytë dhe i fundit i juaj?
Këto janë çështje që i takojnë Konventës, për mua nuk ka asnjë rëndësi.
Konventa mund të marri në shqyrtim dhe ndryshimet në statut për shkak dhe të zhvillimeve të reja politike?
Konventa ndryshon çdo gjë. Statutin, programin janë kompetencat e saj. Unë nuk mund të marr atributet e konventës sot.

Keni filluar të punoni me listat e kandidatëve, ndarjen e zonave elektorale në qarqe në rrethe për zgjedhjet e 2013?
Ne kemi disa ndarje detyrash, përgjegjësish por tani vëmendja kryesore është te konventa dhe te zgjedhja e plotë legjitime e gjithë strukturave dhe pas konventës do të vendosë dhe për organizmin dhe marrjen e përgjegjësive për zgjedhjet e 2013-ës.

A keni filluar të mendoni se me kë parti do të bashkëpunoni, me kë koalicion, do garoni vetë apo me koalicion të partive të tjera?
Ne kemi një marrëveshje me PD dhe nuk kemi arsye që të mendojmë, për aq kohë sa kemi edhe një vit që kjo marrëveshje të përfundojë, se çdo të ndodhi pas saj. Pra nuk është e dobishme...për të bërë hamendësime të ndryshme. Çdo gjë do të vendoset në kohën e duhur. Është ende tepër herët.

E përjashtoni kategorisht një koalicion me PS në zgjedhjet e 2013-ës?
Nuk më duket e natyrshme për gjithë zhvillimet e deritanishme. Por e theksoj dhe njëherë tjetër që interesi i LSI është të respektojë këtë marrëveshje dhe natyrisht të bëjë një bilanc të saj dhe të marr vendimin e duhur për të ardhmen.
Është e mundur mbi bazën e pritshmërive dhe mbi bazën e sistemit aktual zgjedhor që partia e LSI të krijojnë një koalicion të vetëm partish, të majta, të djathta, të qendrës në mënyrë që të maksimalizojë votat? E keni menduar këtë gjë?
Nuk kemi menduar asnjë alternativë të posaçme por sigurisht kjo mbetet një alternativë për të ardhmen.
Çështja për referendumin e importit ose jo të plehrave. Besoj se e keni ndjekur vendimin e Komisionit Qendror të Zgjedhjeve në lidhje me kërkesën një grupi organizatash jo qeveritare për referendum, si e vlerësoni?
Nëse referendumet janë një praktikë tepër demokratike dhe që duhet angazhuar me përgjegjshmëri. Për ato konsulta që unë kam zhvilluar me specialistë të këtyre fushave, kam marrë garancitë se legjislacioni i miratuar është në përputhje të plotë me direktivat e Bashkimit Europian. Për aq sa unë kam vënë re në debatet që janë zhvilluar nga përkrahësit e referendumit apo nga kundërshtarët e ligjit, kam vënë re se pretendimi i tyre, shqetësimi i tyre, është se qeveria nuk do ta zbatojë si duhet ligjin. Pra, jo se ky ligj nuk është në përputhje me direktivat evropiane, jo se ky ligj nuk është një hap përpara në raport me legjislacionin e mëparshëm por se si qeveria do ta menaxhojë këtë ligj. Pra bie një dyshim te qeveria por jo një problem real tek ligji. Dhe nj shqetësim në këtë drejtim mbetet se nj pjesë e industrisë sot, e cila punon me këto lëndët e para që vijnë nga ky import, rrezikon që të mbyllet dhe natyrisht që do të ketë dhe pasojat e veta sociale.
Shqipëria nuk ka të njëjtin standard të kontrollit të kufijve të doganave apo elementeve të tjerë që lidhen me parandalimin e importit të elementeve të ndaluara si vendet e tjera të Bashkimit Europian.
Dua t’iu siguroj se jam shumë i ndjeshëm për çështjet e mjedisit. Unë mendoj se ka nevojë për debat të sinqertë, për debat konstruktiv. Mund të kishte pasur një debat edhe më përfshirës që në momentin e hartimit të këtij ligji sepse ndoshta kjo ndihmonte për të pasur një proces më normal të diskutimit e miratimit, të një konsensusi më të gjerë me grupet e interesit, me shoqatat. Është më shumë çështje mosbesimi. Dhe në këto raste ka nevojë për dialog mendoj unë.
Ju dhe LSI jeni pro apo kundër këtij referendumi?
Unë besoj se ky ligj përderisa është hartuar mbi bazën e direktivave evropiane, e konfirmuar kjo nga Komisioni Europian, përderisa është plotësisht i mundur për t’u monitoruar edhe nga shoqatat e ndryshme që ne kemi këtu nga shoqëria civile.
Pra, jeni kundër referendumit?
Jam për dialog. Me dialog kuptoj një bashkëpunim më të ngushtë të të gjithë iniciatorëve me Ministrinë e Mjedisit, me qeverinë, me organizmat përkatës të këtij ligji për të marrë të gjitha garancitë që ky ligj do zbatohet në mënyrë korrekte.
Duke qenë se qeveria ka marrë një vendim, i cili është kundërshtuar, ky mund të jetë një test sesi merren vendimet me sensibilitet publik.
Unë e theksova më parë që qeveria duhet të kishte krijuar një proces shumë më përfshirës, konstruktiv me të gjitha këto grupe përpara se ky projekt të kalonte në qeveri dhe më pas në Parlament. Qëllimet janë të mira, në raport me ligjet më parë është shumë i mirë. Pra, është shumë më mbrojtës për ambientin sepse numri i të gjithë këtyre produkteve të importit është reduktuar shumë në të kaluarën dhe është menduar pak më thjeshtë. Natyrisht është ndezur një debat. Debati është ndezur në momentet e fundit dhe kjo ka kompromentuar në një farë mënyre gjithë këtë proces.
Cili është mendimi juaj për një zgjidhje për çështjen e KQZ-së dhe a do të ketë LSI përfaqësuesin e saj në të gjithë piramidën e monitorimit të zgjedhjeve?
LSI do të mbështesë çdo zgjidhje që sjell konsensus. Ndërsa përfaqësimi ynë varet nga ndryshimet që do t’i bëjnë kodit. Ne kemi qenë të hapur dhe gjithmonë e kemi theksuar që ose të ketë një administrim i cili ka në bazë të tij një pluralizëm politik ose të jetë mirëfilli teknik i cili për ne nuk është i pamundur. Ideja është që në bazë të një vullneti pozitiv për të çliruar gjithçka nga paragjykimet dhe nga ngarkesat partiake. Të gjithë të mos jenë më përfaqësues partish por të jenë persona jashtë partive.
Do bëni një propozim konkret në lidhje me këtë formulë?
Edhe mundet por për që PD dhe PS t’i zgjidhin përfundimisht këto çështje natyrisht me transparencë.
A ka rrezik që nëse piramida e zgjedhjeve të jetë politike, LSI të mos jetë e përfaqësuar?
Në rast se kjo piramidë do të jetë politike sigurisht që LSI duhet të jetë për faktin se është e konfirmua edhe formalisht si forcë e tretë politikë. Tani nuk ka asnjë lloj arsye dhe unë nuk kam pse paragjykoj.
Z. Meta, cili është qëndrimi juaj në lidhje me debatin për rrugën e Elbasanit?
Nuk kam qenë shumë i përqendruar në lidhje me këtë ngjarje por nga bisedat që kam bërë me përfaqësues të bashkisë, edhe me kryetarin e saj, mendoj se është e qartë që Bashkia e Tiranës ka prioritet mbjelljen e pemëve dhe jo prerjen e tyre.
Si e vlerësoni përformancën e Bashkisë së Tiranës? A është bërë ajo që pritej?
Mendoj se është treguar përkushtim. Janë dhënë disa zgjidhje të shpejta sikurse është ajo e zgjedhjes së qendrës së kryeqytetit sa i takon çështjes se trafikut, janë hedhur bazat e mëdha për planin urbanistik të kryeqytetit, për një bulevard të ri që do ti japë një dimension tjetër kryeqytetit. Mendoj se janë bërë hapa të rëndësishëm por nuk mendoj se mund të bëjmë një bilanc të qartë.
Kemi parë që janë bërë disa ndryshime në qeveri të propozuara nga LSI, por kemi parë dhe ndryshimet nga radhët e PD për vendin e ministrit të Brendshëm ku është propozuar zoti Noka. Ka pasur një skepticizëm nga opozita mbi figurën e zotit Noka duke qenë se Ministria e Brendshme sidomos Policia e Shtetit është përgjegjëse në ruajtjen e qetësisë publike gjatë dhe pas zgjedhjeve.
Policia e Shtetit ka një ndikim tepër pozitiv në proceset zgjedhore në drejtim të qetësisë, sigurisë dhe sidomos të mosndërhyrjes për favorizime të caktuara, gjë që është vlerësuar shumë dhe nga partnerët ndërkombëtarë. Ndaj edhe nga pakënaqësitë e shprehura për emrin e ri të ministrit të Brendshëm, unë mendoj se kjo nuk do të thotë asgjë për standardin e zgjedhjeve të ardhshme sepse mendoj se Policia e Shtetit dhe të gjitha institucionet përgjegjëse japin të gjitha garancitë jashtë cdo ndikimi politik e partiak.
Në shtator LSI ka konventën dhe kjo presupozon dhe startin e garës për zgjedhjet e ardhshme të 2013-ës, sepse dihet që 5-6 muaj përpara zgjedhjeve partitë politike ndezin motorët. Cilat janë objektivat e LSI?
Për 2013-ën unë shikoj vetëm fitore, Dimensioni i saj do të varet nga puna jonë.
Nuk ka numër mandatesh?
Jemi ende herët dhe kryesorja nuk është numri i tyre por është rëndësia e tyre.

(sg/shqiptarja.com)

TAG:
• kqz
• OSBE