Nënë Vitores bëjini një dhomë më shumë

Nënë Vitores dhe bashkëshortit të saj iu është rrënuar plotësisht shtëpia në Bubq. Kujtimet e një jete të tërë, sakrificat e një pune të gjatë në kooperativë, ikën sa hap e mbyll sytë me tërmetin e 26 nëntorit 2019. Dy të moshuarit kalojnë ditët e ftohta në çadër në pritje të një zgjidhjeje, me ëndrrat për një shtëpi më të mirë.

Janë qindra shtëpi e mijëra fshatarë në kushte të tilla anembanë fshatrave të prekur nga tërmeti mu në zemër të Shqipërisë, që mund të kthehen në një burim e forcë ekonomike për veten dhe Shqipërinë, vetëm me shumë punë, sakrificë e mundim.

Bëjini një dhomë e një banjo më shumë në planin e ri për rindertimin e shtëpisë nënë Vitores. Pastaj, ministritë përkatëse, pushteti vendor të impenjohen si në një emergjencë kombëtare për të mësuar çdo fshatar si t’i mirëmbajë, të futen në rrjetin e turizmit lokal e botëror e të presin familje, çifte, të rinj në vende unikale, plot diell, gjelberim, ujë e natyrë të bukur.

Imagjinoni shtëpinë e re të nënë Vitores me një pamje aq të bukur mbi kodrat e buta, ajri i pastër, bagëtitë, pulat dhe gjelat dhe ushqim të thjeshtë, të pastër e të mirë. E gjithë Shqipëria që është përqëndruar të punojë në Tiranë, Durrës, Fier, Vlorë, ka nisur të kërkojë të “arratistet” përherë e më shumë e të shplodhet pranë natyrës. Nëse fshatarët tanë do të kthehen në vatra mikëpritëse të vogla, mund të shndërrohen në minienergji e çmuar për ekonominë, por edhe për veten. Ata kanë një objektiv që do t’i bëjë të jetojnë më gjatë dhe më mirë, vendi do të ketë një energji të pashtershme pozitive.

xy/a.m./Shqiptarja.com

TAG:
• bubq
• demet nga termeti