Kanë nisur punimet për ndërtimin e Unazës Veriore të Tiranës, pjesë e projekti të Unazës së Madhe. Kantieri i parë është hapur në lotin e 2 të Unazës Veriore, ndërsa në total në këtë pjesë janë 7 lote. Gjurma e këtij loti ndjek shtratin e Lumit të Tiranës.
“Ky është kantieri i parë që hapim në këtë pjesë. Me fillimin e punimeve këtu mbyllim 40% të volumeve të mbetura të unazës së madhe të Tiranës. Një nga kompleksitet që kemi është pjesa e shpronësimeve. Fatkeqësisht shumë shtëpi janë të palegalizuara, por ne do të marrim masat për të strehuar edhe ato familje që kanë banesat e palegalizuara. 60 banesa do të shpronësohen vetëm në lotin e 2, por disa janë të pa-legalizuara. Shumica e banesave në Unazën Veriore janë të pa legalizuara”, tha Balluku.
Balluku kërkoi po ashtu nga ndërtuesi dhe ARRSH që të respektohen afatet për mbylljen e punimeve.
“Koha e dorëzimit të veprës është 11 muaj, është një afat ambicioz dhe shpresoj shumë që ta mbajmë këtë afat. Duke qenë se projekti është i studiuar, dhe shpronësimet po vijojmë, shpresojmë të ruajmë afatet kontraktuale. Nëse mbyllet brenda 1 viti ky lot, Tirana do të marrë frymë lirisht. Do kemi një unazë të madhe që do të marrë volumin e trafikut që vjen nga akset kombëtare”, tha Balluku.