Paris 2024/ Historia e Imane Khelif, boksieres që po përflitet kaq shumë

Imane Khelif e Algjerisë e detyroi kundërshtaren e saj italiane Angela Carini të dorëzohej në raundin e parë të një përballje paraprake për peshën e lehtë të boksit (66 kg) në Lojërat Olimpike Paris 2024.

Rezultati krijoi diskutime të menjëhershme sepse Khelif ka dështuar më parë në testet e testosteronit dhe të përshtatshmërisë gjinore. Kur Khelif e goditi me grusht në fytyrë në raundin e parë, Carini u largua në ankth dhe i bëri shenjë ekipit të saj që t'i afrohej anës së ringut.

Në atë moment, italiania e braktisi ndeshjen dhe i dha fitoren Khelif. Carini qëndroi në qendër të ringut dhe qau ndërsa vendimi u zyrtarizua, duke refuzuar të shtrëngonte duart me algjerianen.

"Unë kurrë nuk jam goditur kaq shumë në jetën time. Është në dorën e IOC-së të gjykojë.", tha Carini më pas. Kjo ishte përballja e parë e Carinit në Lojërat Olimpike dhe zgjati vetëm 46 sekonda. Khelif tani kalon në çerekfinale, por përparimi i saj në turne nuk është ajo që po diskutohet mes sportdashësve.

Kush është Imane Khelif?

E lindur më 2 maj 1999, Khelif është një boksiere algjeriane që ka garuar që nga viti 2018. Në vitin 2022, Khelif fitoi Kampionatin Afrikan dhe Mesdhetar dhe arriti në finalen e Kampionatit Botëror në Stamboll. Ajo u mund nga Katie Broadhurst e Irlandës dhe mori medaljen e argjendtë. Paraqitja e parë olimpike e Khelif ishte në Tokio 2020 kur ajo u eliminua në raundin çerekfinal nga një tjetër pjesëmarrëse irlandeze, Kellie Harrington.

Polemikat rreth Imane Khelif?

Pavarësisht se arriti në finalen e Kampionatit Botëror në mars 2023, Khelif u skualifikua pak para ndeshjes për "arsye mjekësore". Në javët që pasuan, doli se Khelif u hoq nga gara pasi testet e drogës konfirmuan nivele të larta të testosteronit. Pas këtij incidenti, presidenti i IBA-së Umar Kremlev deklaroi se këto rezultate vërtetuan se Khelif dhe atletet e tjera femra me nivele të larta të testosteronit mbanin kromozome mashkullore. Në përgjigje të kësaj, Komiteti Olimpik i Algjerisë tha se "dënon me forcë shënjestrimin dhe keqpërdorimin joetik të atletes sonë të nderuar, Imane Khelif, me propagandë të pabazë nga disa media të huaja.", sipas deklaratës përmes BBC.

Ky incident i fundit në një ndeshje olimpike ka qenë jo pak i diskutueshëm pasi edhe vetë kryeministrja italiane Giorgia Meloni reagoi për këtë çështje. "Ne duhet të jemi të kujdesshëm, në një përpjekje për të mos diskriminuar", tha kryeministrja Meloni për The Daily Mail. “Kjo, nga këndvështrimi im, nuk ishte një garë në kushte të barabarta.”, shtoi ajo.

 Khelif, e cila ka humbur nëntë nga ndeshjet e saj në karrierë, tha për BBC Sport: "Unë jam këtu për të marrë medaljen e artë. Unë i luftoj të gjithë."

Pse Imane Kelif lejohet të konkurrojë pasi ka dështuar në testin e përshtatshmërisë gjinore?

IBA-ja nuk e drejton më boksin olimpik, kështu që turneu i boksit Paris 2024 është organizuar nga IOC-ja, e cila është e vendosur në këtë çështje. Lin Yu-ting i Tajvanit po konkurron gjithashtu në boksin e femrave në Paris, pasi u skualifikua nga kampionati botëror i vitit të kaluar pasi doli me testosteron të lartë si Khelif.

IOC-ja e ka mbrojtur me forcë pozicionin e saj. "Unë thjesht do të thosha se të gjithë ata që konkurrojnë në kategorinë e femrave janë në përputhje me rregullat e pranueshmërisë së konkurrencës.”, tha zëdhënësi i IOC-së Mark Adams në fillim të kësaj jave.

“Ato janë gra në pasaportat e tyre. Kanë konkurruar dhe vazhdojnë të konkurrojnë në garat e femrave, kanë humbur dhe kanë fituar ndaj femrave të tjera ndër vite.”

Çfarë tha IOC-ja për fitoren e fundit të Imane Kelif?

"Çdo person ka të drejtë të ushtrojë sport pa diskriminim. Të gjithë atletët që marrin pjesë në turneun e boksit të Lojërave Olimpike Paris 2024 janë në përputhje me rregulloret e pranueshmërisë dhe hyrjes në garë, si dhe të gjitha rregulloret mjekësore të zbatueshme të vendosura nga Njësia e Boksit Paris 2024 (PBU).

Ashtu si në garat e mëparshme olimpike të boksit, gjinia dhe mosha e sportistëve bazohen në pasaportën e tyre. Këto rregulla zbatoheshin edhe gjatë periudhës së kualifikimit, duke përfshirë turnetë e boksit të vitit 2023.”, thuhet në deklaratën e bërë nga IOC-ja një ditë më parë.

S.DH/Shqiptarja.com

TAG:
• Angela Carini
• Imane Khelif
• Lojërat Olimpike
• paris 2024