PD vijon përplasjet me Ramën: Nga Surreli s'i numëron dot të varfrit dhe të papunët

Partia Demokratike ka vijuar përplasjet në distancë në rrjetet sociale me kryeministrin Rama lidhur me situatën në vend. Pas deklaratës së kryeministrit Rama se PD duhet të ndajë mendjen nëse ka të larguar apo jo nga Shqipëria duke ironizuar llogaritë e Bashës se 7x7=42,  ka reaguar sekretari i Përgjithshëm i PD, Gazmend Bardhi duke i dalë në mbrojtje.

Bardhi tha Rama i mëson shumëzimin duke fituar tenderë e leje ndërtimi dhe se nga Surreli është e vështirë të numërosh të varfrit dhe të papunët.

"Kur tabelën e shumëzimit e mëson si Edi Rama, duke llogaritur sa para fiton nga 1 leje ndërtimi, 1 koncesion, 1 tender, 1 pronë në bregdet, sa vota të siguron 1 kg heroinë, e ke mendjen të gënjesh për të mbuluar dështimin. Çdo shifër e dyfishon sipas interesit politik, njësoj si çmimet e tenderëve sekret. Punonjësit nuk i fut dot në xhepa si lekët e tenderëve dhe as nuk i fsheh dot siç përpiqesh të bësh me dështimet e tua. Sipas INSTAT në Shqipëri ka rreth 974 386 punonjës në sektorin privat bujqësor dhe jo bujqësor. Qeveria ka lënë jashtë ndihmës financiare mbi 750 mijë qytetarë dhe nuk ka shpërndarë ndihmën e premtuar për mijëra të tjerë. Nga Surreli është vështirë të numërosh të varfrit dhe të papunët. Për të provuar dhimbjen e atyre që s'kanë marrë ende asnjë lek, nuk ka nevojë për makinë llogaritëse. Duhen vetëm sy, vesh dhe përgjegjshmëri në qeverisje", shkruan Bardhi.

Lajmi kryesor:

Basha me aleatët: Qeveria dështoi me COVID-19, paketat gjysmake! Rama ironizon: Vaj medet PD (VIDEO)

TAG:
• gazmend bardhi