'Përfundon brenda 3 muajsh', nis menjëherë puna për ndërtimin nga Turqia e Spitalit rajonal të Fierit (VIDEO)

Ka nisur puna për ndërtimin e Spitalit të Fierit, investim prej 60-70 milionë eurosh nga Turqia. Ashtu siç u premtua dje nga përfaqësuesi turk ditën e sotme janë paraqitur në vendin ku do të bëhen punimet specialistë të kompanisë turke dhe të Bashkisë Fier. Janë marrë kampione për tokën.

Ditën e djeshme, gjatë një vizitë që Kryeministri Rama ka zhvilluar në Fier, turqit premtuan se puna do të nisë menjëherë.

Ai tha se spitali në Fier do të kushtojë rrej 60-70 mln euro dhe do të punohet 24 orë në 24. Në kulmin e punimeve do të jenë 1000-1200 punonjës, nga të cilët 20-30% do të jetë shqiptarë.

Kujtojmë se fermerët, pronarë të tokave ku parashikohet të ndërtohet Spitali i ri i Fierit kanë protestuar për kompensimin. Ata dje patën një takim me Kryeministrin Rama.

Njëri prej fermerëve është shprehur se Rama u ka thanë që vendi është vendosur dhe nuk negociohet.

Ndërtimi i spitalit rajonal të Fierit ishte një prej marrëveshjeve që u firmosën në Ankara gjatë vizitës dyditore që Kryeministri Rama zhvilloi në Turqi.

K.T./b.ha./Shqiptarja.com

TAG:
• edi rama
• Fier
• turqia
• spitali i fierit