“Si mundet të luftojë korrupsionin krye i korruptuari i këtij vendi?” Kjo ishte pyetja që avokati Idajet Beqiri i bëri Sali Berishës nga emisioni ‘Studio Live’ në Report TV.

Gjatë intervistës së të hënës, Beqiri vuri në dyshim legjitimitetin moral të Berishës për të udhëhequr protesta kundër korrupsionit, duke e paraqitur atë si pjesë të problemit dhe jo zgjidhjes.

“Si mundet të dalë në protestë e të luftosh korrupsionin, kur ti je krye i korruptuari i këtij vendi, që nuk ke lënë gjë pa bërë, grabitur e vjedhur. Ai është i pandehur për korrupsion. Nuk ka lezet fjala e tij kur flet për korrupsionin. Ai i Gërdecit do të flasë për korrupsion? Dogji të gjallë 300 vetë dhe 26 i la të vdekur. Si do të flasë Berisha për korrupsion me 500 milionët që i vodhi në Rrugën e Kombit. Ai u vodhi shqiptarëve 4 miliardë euro me firmat piramidale dhe i bëri rrush e kumbulla me familjen. Vrau 3000 vetë dhe 3000 të tjerë u vetëvranë nga humbja e shtëpive. Tani do luftojë Berisha korrupsionin? Është qesharake”, tha Beqiri.

Duke komentuar protestën e dhunshme të 22 marsit, Beqiri tha se ajo kishte qëllime kriminale dhe një objektiv: baltosjen e Shqipërisë në prag të anëtarësimit të saj në BE.

“Për Hamasin e Saliut ishte efikase protesta. Qëllimi i kryengritjes së armatosur është baltosja e imazhit të Shqipërisë, e cila është në prag të hyrjes në Bashkimin Europian. Ky person që shkoi në Greqi dhe bashkë me Belerin mori mësimin e duhur që Shqipëria nuk duhet të hyjë në BE dhe e deklaroi hapur edhe në mediat greke, ai po e konkretizon me këtë kryengritje që po bën në Shqipëri. Ky është qëllimi kriminal i kësaj proteste”.

Duke e çuar më tej argumentin, ai e lexon gjithë protestën si një lëvizje të dëshpëruar për mbijetesë politike, jo si reagim qytetar.

“Kemi të bëjmë me një person të dëshpëruar në maksimum. Berishën nuk e beson më njeri brenda PD-së. Nëse do ta besonin, nuk do të kishte 2000 veta në protestë dhe populli do ta përkrahte. Populli e sheh arsyen për çfarë i bën Berisha këto protesta. Ai do me çdo kusht ta lërë vendin pa opozitë reale, ka shumë frikë se do t’i hiqen ofiqet e kryetarllëkut. PD është kthyer në një parti familjare”, tha Beqiri.

Një tjetër pikë ku Beqiri u ndal gjatë intervistës me Report TV është raporti i Berishës me ndërkombëtarët. Sipas Beqirit, përpjekjet e PD-së për të marrë mbështetje jashtë vendit kanë marrë një 'JO' të prerë.

“I gënjeu njerëzit me Amerikën dhe u tha që ka mbështetjen e Trump dhe se ai do t’i heqë non-gratën. Ai tha se Rama do të arrestohet në Amerikë, por Rama vajti në Amerikë dhe e nderoi popullin shqiptar me mesazhet dhe takimet që pati atje. Kur Berisha pa këtë sukses dhe nuk iu hoq non-grata, ndonëse ia pagoi Chris LaCivita-s 6 milionë euro për këtë punë. Ai në fakt mori 60 milionë për këtë punë, por ia la dopio 6-ën Saliut. Ai tani hidhet sikur është pro-Gjermanisë dhe sillet sikur Gjermania po e mbështet. La flamurin amerikan dhe mori flamurin gjerman. U gënjen mendja të mendojnë se mund të shkojë Jorida në Gjermani dhe mund t’i ketë marrëdhëniet e mira me 2-3 vetë nga Bundestagu dhe ata mendojnë sikur shteti ndërtohet me marrëdhënie personale. Unë erdha mbrëmë vonë nga Brukseli. Këta të PD-së kanë vajtur dhe kanë kërkuar mbështetje për Saliun dhe ndihmë për ta fuqizuar PD-në. Mesazhi që kanë marrë ka qenë i prerë: “Zhdukni Sali Berishën, mos hajdeni kot. Është non-grata dhe kriminel, është vrasës, distancohuni prej tij dhe ejani t’ju ndihmojmë””, tha ai.

Ai e cilësoi protestën e PD-së si shumë problematike edhe për faktin se kjo parti i fut të miturit në grupet e zjarrit që sulmojnë institucionet.

“Protesta ishte vrastare. 15 policë u plagosën. Kishte tentativë vrasjeje ndaj tyre. Ai hodhi molotovë dhe bomba tek Partia Socialiste. Krimi tjetër është marrja e fëmijëve në protesta. Fëmijët largohen nga protesta, ndërsa ai i fut tek grupi i zjarrit, tek molotovët. Kjo parti po inkriminon filizat e këtij vendi. Si mund të quhet ndryshe përveç se Hamas? Populli shqiptar po e braktis Partinë Demokratike" tha ai.

Rendit zhvillimet sipas orarit:
Ora 18:27
‘SPAK të hetojë Rrugën e Kombit’, Beqiri për Report TV: Berisha u ka vjedhur shqiptarëve 500 milionë euro

Avokati Idajet Beqiri i bëri thirrje SPAK-ut të hënën që të hetojë Rrugën e Kombit ndërsa hodhi akuza kundër Sali Berishës për vjedhjen e 500 milionë eurove nga ky projekt.

“Që të mos bësh një mal me letra dhe dosje, ke Rrugën e Kombit janë 500 milionë euro që u janë vjedhur shqiptarëve. Rruga e Kombit ka mbetur rrugëve. Deri në Rrëshen ka ardhur kjo është për të vënë duart në kokë. SPAK merret me gjëra koti. S’kanë punë tjetër vetëm do të merren me përgjime telefonash? Është turp i dheut. Të mos merret apo t’i lëjë në harresë pasuritë që duhet tu kthehen shqipërisë dhe shqiptarëve. SPAK duhet tu japë përgjigje privatizimeve që janë bërë në kohën e Sali Berishës dhe Ilir Metës, me Albpetrolin, me Armon, me Bankën , Telekomit. Berisha ka bërë korrupsion të hapur me Chris LaCivita. Ku i gjeti Partia Demokratike 6 milionë euro? SPAK mbeti tek llogoret e Saliut. Do të shkulet ndonjëherë prej andej? Nëse nuk shkulen në djall vafshin’ tha Beqiri në Report TV. 

U.D/Shqiptarja.com