Rama në Durrës: Persona me poste të larta i morën gjithçka PS-së, por i dhanë kosto! Transformojmë Kadastrën, s'është e deputetëve as e drejtorëve

Në Durrës, Kryeministri Edi Rama u ndal tek humbja e thellë e Sali Berishës dhe Metës, ndërsa ironizoi edhe deklaratat e tyre që premtonin kthimin e pluralizmit. Rama tha se ata duhet të ikin për pambuk që pluralizmi të gëzojë në Shqipëri.

“Si mund të ndodhë që Kamza t’iu kthejë kurrizin. Nuk është e vështirë për ta kuptuar. Mjafton të shkosh në Kamëz edhe të shkosh me një hartë, ku janë shkollat, kopshtet, çerdhet dhe të kesh tre foto me vete nga kopshtet dhe shkollat që ishin para se të drejtonim ne Kamzën. Mjafton të bësh këtë udhëtim, kamzalitë të mjaftë e djathtë 60% votuan si fëmijë që shkojnë në ato shkolla dhe jo si tifozë. Kush kupton këtë, kupton edhe Shkodrën, edhe Tropojën edhe tjerat. Unë nuk mërzitem që ata se kuptojnë, ata duhet të ikin për pambuk, që pluralizmi të lulëzojë në Shqipëri. Nuk shoh asnjë rrezik për demokracinë, për pluralizmin, fjalën e lirë, ku di unë ca janë këto. Ata duhet të ikin për pambuk që pluralizmi të gëzojë në Shqipëri. Nuk shoh asnjë rrezik për demokracinë. Kur shoh ata që dalin, sidomos këta të natës, se janë të ditës ba ma bum ba ma bam dhe ata të natës hau hiu më kujtohet fjala se për lirinë e fjalës ankohet më shumë ai që nuk di ca të bëjë me të. Demokracia shqiptare nuk humb nëse humbin ata. Detyra jonë është që sa herë të dalin përpara ti bëjmë atë që i bëjmë. Demokracia shqiptare nuk humb asgjë kur humbin ata. Detyra jonë, kjo është, sa herë na dalin para ti bëjmë atë që i bëjnë”, tha Rama.

Nga Durrësi, kryeministri Edi Rama bëri një bilanc të punëve që PS duhet të bëjë më mirë. Teksa tha se kanë transformuar sektorin e energjisë kur erdhën në pushtet, kreu i qeverisë tha se tashmë duhet të bëjnë transformimin përfundimtar të Kadastrës.

“Njerzilliku është gjëja që na duhet, vlen për të gjitha institucionet që përfaqësojnë shtetin. Nuk dua të hy në detaje por duhet ta pranojmë që nëse me energjinë kemi bërë një transformim epokal, nga një vend ku gjysma vidhnin e gjysma tjetër paguante edhe për atë gjysmën e ku ishte një qamet i madh. Në zyra të klientit që ishin në bodrume të marra me qira. Nuk mund të themi që kemi bërë po atë revolucion me kadastrën. OSHE-ja nuk është një ndërmarrje për t’u mjelë, nuk është një vend për të çuar në punë veterinerë e agronomë. Merita kryesore është e mbështetjes që i dha PS-ja atij transformimi. Tek kadastra ne duhet të bëjmë një transformim përfundimtar, është bërë punë tek kadastra po nuk është e pranueshme më, është bankë e nuk shkohet për të punuar aty ku është drejtoria e kredive me diplome veterineri. Nuk ndodh kjo. Është banka e pronave të shqiptarëve. Ajo është banka e pronave e askujt tjetër. Kadastra nuk është pronë e deputetëve, këshilltarëve, zyrtarëve, por është Banka e pronave. Ne nuk mund ta lëmë të pambaruar ose të vazhdojë edhe nja 10 vjet tjera sa të mbarojnë gjithë kushërinjtë dhe gjithë miqtë. E gjithë ajo punë që është bërë për hartat nuk mund ta lemë të pambaruar. Këtë vend po nuk e bëri PS-ja nuk e bën askush tjetër nuk ka mundësi edhe sikur të dojë, ata të tjerët edhe po të duan nuk kanë mundësi nuk dinë s’kanë haber fare për 1001 arsye është vetëm kjo parti që mund ta bëjë, vetëm në këtë periudhë kohë mund të bëjmë kthesën përfundimtare. Durrësi është i rëndësishëm jo për Durrësin por për ekonominë e Shqipërisë.”- tha Rama.

Kryesocialisti Edi Rama në turin falënderues në Durrës tha se nuk ndihet aspak krenar për udhëheqës të Partisë Socialiste me detyra të larta, të cilët kanë turpëruar besimin e qytetarëve me veprimet e tyre.

"Kur i themi ne duam të vazhdojmë punën për Durrësin, a Shijakun a Shqipërinë, jemi të vetmit që mund ta bëjmë por kjo s’do të thotë që kemi bërë gjithçka mirë. Kemi bërë gabime dhe gjëra për të cilat nuk jam krenar, nuk flas për ju që jeni këtu poshtë, as për Anin, as Entonin, por flas për udhëheqës të PS. I kanë dhënë dhe kosto në gjithë këto vite. Kanë marrë detyra të larta dhe kanë turpëruar besimin, mbështetjen, flamurin e familjen tonë. Në fund të ditës, përgjegjësia është individuale, por një familje, edhe e vogël, edhe e një kompanie apo e një skuadre sporti, apo një organizate nuk mban përgjegjësi çfarë bën një individ kur del nga shinat po si reagon në raport për problemin. Do të thotë merr masat dhe ajo gjë nuk duhet të përsëritet dhe të tjerët duhet të nxjerrin mësim, që mund ta meritojnë këtë besim dhe mbështetje. E keni këtu në Durrës modelin historik të suksesit që lidhet me një gjë themelore që është begenisja e njerëzve. Arsyeja pse ju fitoni, më besoni se është për shkak të një tradite. E si se ku qëndron çelësi i suksesit, ju jeni një organizatë që njihni votuesit me emra dhe mbiemra, ju e dini ku i pikon çatia çdo shtëpie në çdo rrugicë dhe bashkia s’ka mundur t’ja u zgjidhë dot të gjitha problemet njerëzve që kanë halle, por ama ka treguar hap pas hapi që çdo ditë bën diçka dhe zgjidh diçka. Të gjithë duhet të mësojnë në këtë pikë”.-tha Rama nga Durrësi.