Grupi Parlamentar i Partisë Socialiste nuk njeh asnjë vendim të asnjë instance që buron nga shkulmi anti-amerikan i një personazhi ‘non grata’ nga SHBA. Kjo është përgjigja që vjen nga Partia Socialiste, pas miratimit të rezolutës së Këshillit Kombëtar të PD-së, për procesin e zgjedhjes së presidentit, që mandatoi Rithemelimin për të marrë pjesë në negociata. Ministrja për Marrëdhëniet me Parlamentin, Elisa Spiropali, pjesë e grupit të punës në PS, për zgjedhjen e presidentit të ri, shkruan se PS, nuk ka ndërmend të ketë asnjë kontakt, me atë burim të së keqes për Shqipërinë, duke ju referuar Berishës.

‘Nëse është e vërtetë që Saliu paska mbledhur një kuvend për të vendosur kusht që hyjnë në negociata për Presidentin e ri vetëm nëse pranohet kandidati i tyre, atëherë ngushëllime kuvendarëve në fjalë dhe një kujtesë nga ana jonë: Grupi Parlamentar Socialist nuk njeh asnjë vendim të asnjë instance që buron nga shkulmi anti-amerikan i një personazhi të listës së zezë të Shteteve të Bashkuara të Amerikës dhe nuk ka ndërmend të ketë asnjë kontakt me atë burim të së keqes për Shqipërinë.’- shkruan Spiropali.

Me ngritje dorë, Këshilli Kombëtar i PD-së i dalë nga Kuvendi i 30 prillit, i mbledhur për herë të parë, miratoi sot rezolutën që mandaton Komisionin e Rithemelimit për procesin e zgjedhjes së presidentit të ri të vendit. Ndonëse Berisha ka deklaruar me zë se nuk do marrë pjesë në proces, sipas rezolutës, Komisioni i Rithemelimit do të zgjedhë grupin e punës, që do të negociojnë me partitë opozitare për emrin e kreut të ri të shtetit. Por, nga ana tjetër PS e bëri të qartë, nuk do të ulet në tryezën e bisedimeve me një person të shpallur ‘non grata’ nga SHBA. Rithemelimi, e bën të qartë, se do të votojnë në Kuvend kundër çdo kandidati që propozohet nga maxhoranca. Megjithëse, votat kundër të Rithemelimit nuk ndikojnë në zgjedhjen e presidentit, sepse Berisha ka vetëm 17 deputetë, ndërkohë që kreu i shtetit mund të zgjidhet në raundin e katërt me 71 vota të cilat PS i posedon.

Në mbledhjen e Konferencës së Kryetarëve, më 10 maj, do të caktohet data për raundin e parë të votimit të Presidentit Të Republikës. Propozimi u bë nga përfaqësuesit e opozitës, Enkelejd Alibeaj dhe Fatmir Mediut, që gjeti mirëkuptimin e Taulant Ballës. Kryetari i grupit parlamentar të PS tha se data e raundit të parë të votimit duhet të jetë 16 maji, por që përfundimisht pritet të merret vendimi pas 6 ditësh, kur edhe do të përcaktohen të gjitha afatet e tjera si dorëzimi i kandidaturave, dokumentacioni etj.