Në Gjykatën e Posaçme është rrëzuar një tjetër kërkesë e Fatmir Mediut, i cili po gjykohet për masakrën e Gërdecit.
Mbrojtësit e ish ministrit të Mbrojtësit kërkuan rieksperim pjesor për kostot e dëmit ekonomiko-financiar të demontimit në fabrikën e Poliçanit, por gjyqtarja Irena Gjoka nuk pranoi, teksa argumentoi se do t’i takojë gjykatës nëse do ta çmojë si provë.
Mbrojtja pretendoi në seancën e kaluar se akti i ekspertimit është me të meta në përmbajtjen e tij dhe pretendoi se procesi i demontimit dhe çmilitarizimit është bërë mbi llogaritje jo të vërteta, jo të sakta.
Mediu thotë se një riekspertim do t’i interesonte edhe SPAK-ut nëse do të interesohej për të vërtetën.
“Ky është një akt ekspertimi i pavlerë. Unë mendoj se Gjykata, edhe prokuroria, e cila thotë se nuk ka pse të bëhet, minimalisht nëse kanë interes për të vërtetën mund ta kishin bërë një akt ekspertimi”, tha ai.
Avokatët kërkuan në seancën e kësaj të mërkure që të merret si provë një ekspertizë private, e përgatitur nga ana e tyre dhe të bëhet pjesë e fashikullit një memo me kundërshtimet e tyre.
Gjatë seancës së kësaj të mërkure mbrojtja ligjore e Mediut paraqiti kundërshtimet e saj në lidhje me përgjigjet e pesë ekspertëve në dy seancat e kaluara, ndërsa seanca e radhës zhvillohet më 17 tetor ora 13: 00.