Deputeti i ‘Rithemelimit’, Luçiano Boçi ka hedhur akuza ndaj rritjes së çmimeve të karburantit duke i cilësuar si një metodë e qeverisë për të vjedhur qytetarët. Në një postim në rrjetin e tij social Facebook, Boçi ka sqaruar se këto çmime janë një zhvatje e qytetarëve dhe emigrantëve e gjitha ‘një skenar’ nga Rama, të cilin e konsideron si grabitqar për të rrjepur para.

‘ÇMIM PËR TË ZHVATUR EMIGRANTËT E QYTETARËT

Ka një arsye themelore që çmimi i naftës në Shqipëri rritet e nuk u ul asnjëherë, përkundrejt rënies së tij në bursa.

Arsyeja është sa e thjeshtë aq dhe kanibaleske.

Kjo është periudha kur sasia e mjeteve në qarkullim dyfishohet dhe kërkesa për karburant gjithashtu, sepse emigrantët e shumtë kthehen në vendlindje dhe me pushime.

Grabitqari këtë rast pret për të sulmuar prenë e vet.

Rama këtë ka pritur për të rrjepur emigrantët e qytetarët!

E shndërron sentimentin njerëzor të mallit për vendin, në mall për fitimin e vet marramendës.

Me keq se e turpshme!

Kështu biznesi i tij qeverisës, arkëton miliona euro nga xhepat e njerëzve që i kanë me djersë e gjak, por që dihet si përfundojnë.

Përfundojnë në llogaritë e qeveritarëve dhe “bosave” të PPP-ve.

Ndërkohë oligarkët e karburanteve marrin pjesën e tyre me një fitim marramendës.

Ndërsa ata që zhvaten, grabiten më shumë me borde e pa borde, janë ata që nuk firmosin në asnjë bordero të bordellos-shtet, emigrantët patriotë dhe çdo qytetar i thjeshtë i këtij vendi.’- shkruan ai.

Lidhur me rritjen e çmimeve të karburantit një denoncim ka ardhur edhe nga Partia e Lirsë ka kërkuar shkrijen e Bordit të Transparencës me argumentin se po abuzojnë me çmimet që vendosin për hidrokarburet.

Kujtojmë se në vendimin e fundit Bordi i Transparencës rriti me 9 lekë çmimin e naftës, duke nisur nga pasditja e djeshme, tregtohet me 248 lekë për litër, ndërsa benzina u ul me 4 lekë dhe shkoi në 201 lekë për litër. Çmimi i gazit u rrit me 1 lekë, duke u shitur 79 lekë.